 |
ໃນເວທີປຶກສາຫາລືທີ່ມີຄວາມໝາຍສໍາຄັນນີ້, ທ່ານ ຄໍາມອນ ຈັນທະຈິດ ກໍາມະການສໍາຮອງສູນກາງພັກ ຮອງຫົວໜ້າຄະນະໂຄສະນາອົບຮົມສູນກາງພັກ ແຫ່ງ ສປປ ລາວ ທີ່ໄດ້ຮັບການເຊື້ອເຊີນເຂົ້າຮ່ວມ ແລະ ໄດ້ແບ່ງປັນຄວາມຄິດເຫັນ ໃນເວທີສໍາຄັນລະດັບພາກພື້ນ ຮ່ວມກັບບັນດາການນໍາ, ເຈົ້າໜ້າທີ່ລະດັບສູງ, ຜູ້ຊ່ຽວຊານດ້ານສື່ມວນຊົນ ແລະ ດ້ານອື່ນໆ ໃນພາກພື້ນອາຊຽນ - ຈີນ. ທ່ານກ່າວວ່າ: ໃນໂລກທີ່ກໍາລັງປ່ຽນແປງຢ່າງໄວວານີ້, ການໄດ້ມາພົບປະ ແລະ ແລກປ່ຽນຄວາມຄິດເຫັນໃນເວທີນີ້ ຖືເປັນສິ່ງທີ່ມີຄຸນຄ່າຫຼາຍ. ເວທີປຶກສາຫາລື ພາຍໃຕ້ຫົວຂໍ້; “ການລວມຕົວຂອງສື່ມວນຊົນ ເພື່ອການເຕີບໂຕຮ່ວມກັນ: ເປີດບົດໃໝ່ໃນການພົວພັນຄູ່ຮ່ວມມືຍຸດທະສາດຮອບດ້ານ ອາຊຽນ-ຈີນ” ບໍໍ່ແມ່ນແຕ່ຫົວຂໍ້ຂອງການປະຊຸມເທົ່ານັ້ນ, ແຕ່ແມ່ນພາບສະທ້ອນຂອງວິໄສທັດ ແລະ ຄວາມຫວັງຮ່ວມກັນ ທີ່ພວກເຮົາມີຕໍໍ່ອະນາຄົດ ຂອງພາກພື້ນນີ້, ທັງເປັນໂອກາດສໍາຄັນ ທີ່ຈະໄດ້ທົບທວນຄືນຜົນສໍາເລັດຂອງການຮ່ວມມືດ້ານສື່ມວນຊົນ ລະຫວ່າງ ອາຊຽນ ແລະ ຈີນ ໃນໄລຍະ 5 ປີຜ່ານມາ, ພ້ອມທັງເປີດເສັ້ນທາງໃໝ່ໃນການກ້າວໜ້າຮ່ວມກັນ ໃນອະນາຄົດ. ຜ່ານການແລກປຽນ ແລະ ຮ່ວມມືຢ່າງໃກ້ຊິດ ສື່ມວນຊົນ ໄດ້ກາຍເປັນຂົວຕໍໍ່ ແລະ ເຊື່ອມໂຍງທີ່ສໍາຄັນ ໃນການເສີມສ້າງຄວາມເຂົ້າໃຈ, ຄວາມໄວ້ເນື້ອເຊື່ອໃຈ ແລະ ມິດຕະພາບ ລະຫວ່າງ ປະຊາຊົນ ບັນດາປະເທດອາຊຽນ ແລະ ຈີນ.
ທ່ານ ຄໍາມອນ ຈັນທະຈິດ ໄດ້ກ່າວອີກວ່າ: ສໍາລັບການຮ່ວມມືດ້ານສື່ມວນຊົນ ລະຫວ່າງ ສປປ ລາວ ແລະ ອາຊຽນ ບໍໍ່ພຽງແຕ່ການແລກປ່ຽນຂໍ້ມູນຂ່າວສານ, ຄວາມຮູ້ ແລະ ເຕັກນິກຕ່າງໆເທົ່ານັ້ນ, ແຕ່ຫາກຍັງເປັນການສ້າງສາຍໃຍຄວາມເຂົ້າໃຈ ຄວາມໄວ້ວາງໃຈ ແລະ ການຮ່ວມມືທີ່ຍືນຍົງ ໃນລະດັບພາກພື້ນ, ທັງເປັນການເປີດປະຕູໃຫ້ສື່ພາຍໃນ ໄດ້ກ້າວທັນໂລກ, ໄດ້ຮຽນຮູ້ເຕັກໂນໂລຊີໃໝ່ ແລະ ສ້າງສັນເນື້ອຫາສາລະທີ່ມີຄຸນນະພາບ, ສາມາດເຊື່ອມໂຍງໄດ້ໃນລະດັບພາກພື້ນ. ການຮ່ວມມື ລາວ-ຈີນ ຜ່ານມາ, ໄດ້ລົງເລິກຮ່ວມມືຍຸດທະສາດຮອບດ້ານ ແລະ ສ້າງຄູ່ຮ່ວມຊາຕາກໍາ ລາວ-ຈີນ ໄດ້ຮັບໝາກຜົນແບບບຸກທະລຸ ຢ່າງຕໍ່ເນື່ອງ. ສ່ວນດ້ານສື່ມວນຊົນ, ການຮ່ວມມືນັບມື້ກ້າວເຂົ້າສູ່ລວງເລິກ ໂດຍສະເພາະ ການແລກປ່ຽນຂໍ້ມູນຂ່າວສານ, ຮູບພາບ, ການໃຫ້ບຸລິມະສິດ ໃນການເຂົ້າເຖິງຂໍ້ມູນ ແລະ ຮູບພາບ ສໍາລັບອົງການສື່ ທີ່ໄດ້ລົງນາມຮ່ວມອະນຸສັນຍາຮ່ວມກັນ. ພິເສດ ແມ່ນການເອື້ອອໍານວຍຄວາມສະດວກ ໃຫ້ຕົວແທນຫ້ອງການຜູ້ຕາງໜ້າອົງການສື່ທາງການຂອງ ສປ ຈີນ ໄດ້ເຄື່ອນໄຫວທຸກເຫດການສໍາຄັນທີ່ ພັກ-ລັດ ແຫ່ງ ສປປ ລາວ ຈັດຂຶ້ນ.
ທ່ານ ຄໍາມອນ ຈັນທະຈິດ ຍັງກ່າວຢໍ້າວ່າ: ສື່ມວນຊົນ ບໍໍ່ພຽງແຕ່ເປັນຜູ້ສະທ້ອນສັງຄົມເທົ່ານັ້ນ, ແຕ່ຍັງເປັນຜູ້ຮ່ວມສ້າງສັງຄົມ. ທຸກຂ່າວ ທຸກບົດຄວາມ ທຸກຄໍາເຫັນ ທຸກພາບ ທີ່ຖືກສົ່ງອອກໄປ ລ້ວນແຕ່ມີພະລັງໃນການກໍານົດທິດທາງຄວາມຄິດ ແລະ ສ້າງທັດສະນະໃຫ້ແກ່ສັງຄົມ. ນີ້ຄືເຫດຜົນວ່າ: ຄວາມຮັບຜິດຊອບຂອງສື່ ບໍໍ່ແມ່ນເລື່ອງເລັກນ້ອຍ, ແຕ່ເປັນພາລະກິດທີ່ຜູກພັນກັບອະນາຄົດຂອງປະເທດ ແລະ ຂອງພາກພື້ນໂດຍລວມ. ໃນໄລຍະຜ່ານມາ, ການຮ່ວມມືດ້ານສື່ມວນຊົນ ອາຊຽນ-ຈີນ ໄດ້ມີການຂະຫຍາຍຕົວຢ່າງໂດດເດັ່ນ ທັງທາງດ້ານການແລກປ່ຽນຂໍ້ມູນຂ່າວສານ, ການພັດທະນາທັກສະວິຊາສະ ເພາະ ແລະ ການນໍາໃຊ້ເຕັກໂນໂລຊີໃໝ່ໆ ເຂົ້າໃນວຽກງານສື່. ບົດບາດຂອງສື່ມວນຊົນ ບໍໍ່ໄດ້ຈໍາກັດຢູ່ແຕ່ການນໍາສະເໜີຂ່າວສານເທົ່ານັ້ນ, ແຕ່ຫາກຍັງເປັນພະລັງຂັບເຄື່ອນທາງສັງຄົມ ທີ່ຊ່ວຍສ້າງທັດສະນະທີ່ດີ ແລະ ກະຕຸ້ນການມີສ່ວນຮ່ວມ ຢ່າງສ້າງສັນຂອງປະຊາຊົນ.
ພ້ອມດຽວກັນນີ້, ການເຕີບໂຕຢ່າງໝັ້ນຄົງຂອງການຮ່ວມມືສື່ມວນຊົນ ອາຊຽນ-ຈີນ ນັ້ນບໍໍ່ພຽງແຕ່ມີຜົນງານທາງດ້ານເຕັກນິກ ຫຼື ການແລກປ່ຽນຂ່າວເທົ່ານັ້ນ, ແຕ່ຫາກແມ່ນການສ້າງ “ພື້ນຖານຄວາມໄວ້ໃຈ” ລະຫວ່າງ ປະຊາຊົນອີກດ້ວຍ. ຄວາມໄວ້ໃຈນີ້, ແມ່ນທຶນຮອນທີ່ມີຄ່າທີ່ສຸດ ແລະ ບໍໍ່ສາມາດສ້າງໄດ້ພາຍໃນມື້ໜຶ່ງຍາມດຽວ. ໃນອະນາຄົດ, ການຮ່ວມມືດ້ານສື່ມວນຊົນ ອາຊຽນ-ຈີນ ຄວນຖືກຍົກລະດັບໃຫ້ເລິກເຊິ່ງ ແລະ ກວ້າງຂວາງຫຼາຍຂຶ້ນ ໂດຍເນັ້ນໃສ່ການສ້າງເນື້ອຫາຮ່ວມກັນ, ການພັດທະນາບຸກຄະລາກອນ ແລະ ການແລກປ່ຽນປະສົບການ.
ສື່ມວນຊົນ ຈະຍັງຄົງເປັນກໍາລັງຫຼັກ ໃນການຂັບເຄື່ອນການຮ່ວມມື ຢ່າງຍືນຍົງ ແລະ ສ້າງອະນາຄົດຮ່ວມກັນ ທີ່ມີຄວາມຈະເລີນຮຸ່ງເຮືອງ. ດັ່ງນັ້ນ, ຂໍໃຫ້ເວທີນີ້, ບໍ່ແມ່ນແຕ່ຈຸດເລີ່ມຕົ້ນຂອງແຜນງານໃໝ່ເທົ່ານັ້ນ, ແຕ່ເປັນຈຸດເລີ່ມຕົ້ນຂອງ “ຄວາມມຸ່ງໝັ້ນໃໝ່” ທີ່ພວກເຮົາຈະກ້າວໄປຂ້າງໜ້າຮ່ວມກັນ ດ້ວຍຄວາມໄວ້ເນື້ອເຊື່ອໃຈ, ຄວາມເຄົາລົບ ແລະ ວິໄສທັດທີ່ກ້າວໄກ. ການເຕີບໂຕຮ່ວມກັນ ຈະມີຄວາມໝາຍ ກໍຕໍ່ເມື່ອພວກເຮົາ “ໄປພ້ອມກັນ ແລະ ບໍ່ປະຖິ້ມໃຜໄວ້ທາງຫຼັງ”, ຮ່ວມກັນປຶກສາຫາລື, ຮ່ວມກັນແບ່ງປັນ, ຮ່ວມກັນຊົມໃຊ້ ເພື່ອສ້າງສາຍພົວພັນ, ສາຍໃຈ ໃຫ້ນັບມື້ສະໜິດແໜ້ນຍິ່ງໆຂຶ້ນ.
ຄໍາເຫັນ