ເປີດຂະບວນການໃຫ້ວັກຊິນ ປ້ອງກັນພະຍາດແຫ່ງຊາດ ໂປລີໂອ

ທ່ານ ໄພວັນ ແກ້ວປະເສີດ ກ່າວວ່າ: ສປປ ລາວ ໄດ້ຮັບການລາຍງານ ກໍລະນີທີ່ພົບເຊື້ອພະຍາດໂປລີໂອ ແລະ ພະຍາດໝາກແດງ ທີ່ຖືກຢັ້ງຢືນຈາກຫ້ອງວິເຄາະປະເທດຍີ່ປຸ່ນ ແລະ ສູນວິເຄາະລະບາດວິທະຍາຂອງລາວໃນປີ 2025 ແລະ ໄດ້ຖືກປະກາດ ເປັນປະເທດທີ່ມີການລະບາດຂອງພະຍາດໂປລີໂອ ແລະ ການລະບາດພະຍາດທີ່ກັນໄດ້ດ້ວຍວັກຊິນ ຊຶ່ງໄດ້ເກີດຂຶ້ນໃນຫຼາຍແຂວງ, ຫຼາຍເມືອງ ໂດຍສະເພາະແມ່ນບ້ານຂອງເມືອງທີ່ຕິດຊາຍແດນ, ຈຳນວນບ້ານດັ່ງກ່າວແມ່ນມີອັດຕາການປົກຄຸມຂອງເດັກທີ່ໄດ້ຮັບວັກຊິນກັນພະຍາດຍັງຕໍ່າ ແລະ ຕ່ຳ ຕິດຕໍ່ກັນຫຼາຍປີ, ຈຳນວນເດັກທີ່ບໍ່ໄດ້ຮັບວັກຊິນແມ່ນຖືກສະສົມ, ເພີ່ມຂຶ້ນໃນແຕ່ລະປີເຊັ່ນ: ໃນເຂດຕົວເມືອງທີ່ມີປະຊາກອນຫຼາຍ, ເຂດປະຊາກອນທີ່ມີເດັກນ້ອຍ ແລະ ເຂດເຂົ້າເຖິງຍາກ ຊຶ່ງເປັນສິ່ງທ້າທາຍອັນໃຫຍ່ຫຼວງ ແລະ ສົ່ງຜົນກະທົບ ເຮັດໃຫ້ເກີດມີການລະບາດຂອງພະຍາດໂປລີໂອ ແລະ ພະຍາດໝາກແດງ ຫຼື ພະຍາດທີ່ສາມາດກັນໄດ້ດ້ວຍວັກຊິນ ເພື່ອເປັນການຍົກລະດັບອັດຕາການໃຫ້ວັກຊິນກັນພະຍາດໂປລີໂອ, ພະຍາດໝາກແດງໃຫຍ່-ໜາກແດງນ້ອຍໃຫ້ສູງຂຶ້ນໃນແຕ່ລະເຂດບ້ານ ແລະ ເພື່ອຫຼຸດຜ່ອນການພາດໂອກາດເດັກນ້ອຍທີ່ບໍ່ໄດ້ຮັບວັກຊິນກັນພະຍາດໃນຮອບປົກກະຕິທີ່ຜ່ານມາ. ດັ່ງນັ້ນ, ທາງກະຊວງສາທາລະນະສຸກ ກໍຄືສູນສຸຂະພາບແມ່ ແລະ ເດັກ ຮ່ວມກັບຄູ່ຮ່ວມພັດທະນາ ຈຶ່ງໄດ້ຈັດຕັ້ງປະຕິບັດຂະບວນການຢອດວັກຊິນກັນພະຍາດ ໂປລີໂອ ແລະ ສັກວັກຊິນກັນພະຍາດໝາກແດງໃຫຍ່-ໝາກແດງນ້ອຍ ເພີ່ມໃຫ້ກຸ່ມເດັກອາຍຸລຸ່ມ 5 ປີໃນຂອບເຂດທົ່ວປະເທດ, ເພື່ອຮັບປະກັນໃຫ້ເດັກນ້ອຍໃນກຸ່ມເປົ້າໝາຍທຸກຄົນທັງໃນຕົວເມືອງ ແລະ ຊົນະບົດ ໃຫ້ໄດ້ຮັບວັກຊິນທຸກຖ້ວນໜ້າໂດຍບໍ່ໃຫ້ມີເດັກຄົນໃດພາດໂອກາດ.

ທ່ານ ໄພວັນ ແກ້ວປະເສີດ ກ່າວຕື່ມວ່າ: ພັກ ແລະ ລັດຖະບານແຫ່ງ ສປປ ລາວ ໄດ້ມີຄວາມພະຍາຍາມເອົາໃຈໃສ່ສົ່ງເສີມ ແລະ ເອົາໃຈໃສ່ໃນການຮັກສາສຸຂະພາບໃຫ້ເດັກນ້ອຍທີ່ເກີດມາທຸກຄົນ, ເພື່ອໃຫ້ເຂົາເຈົ້າໄດ້ເຂົ້າເຖິງການບໍລິການຂັ້ນພື້ນຖານ ການຮັກສາສຸຂະພາບທີ່ຈຳເປັນ ແລະ ຖືກຕ້ອງ. ດັ່ງນັ້ນ, ສປປ ລາວ ກໍຄືກະຊວງສາທາລະນະສຸກ ເຫັນວ່າມີຄວາມຈຳເປັນຈະຕ້ອງໄດ້ເຮັດຂະບວນການຢອດ ແລະ ສັກວັກຊິນໃຫ້ເດັກໃນກຸ່ມເປົ້າໝາຍລຸ່ມ 5 ປີທຸກຄົນໃນທົ່ວຂອບເຂດປະເທດ.

ທ່ານ ບິລາລ ອູແຣງ ເຊັບ ດູຣານີ ກ່າວວ່າ: ອົງການອຸຍນີເຊັບ ໄດ້ຮ່ວມກັບກະຊວງສາທາລະນະສຸກ ແລະ ຄູ່ຮ່ວມງານ ໃນການເປີດຂະບວນການໃຫ້ວັກຊິນກັນພະຍາດໂປລີໂອໃນຄັ້ງນີ້: ແມ່ນການຢືນຢັນຄືນໃໝ່ເຖິງຄວາມມຸ່ງໝັ້ນຮ່ວມກັນ ໃນການປົກປ້ອງເດັກທຸກໆຄົນໃນ ສປປ ລາວ ຈາກພະຍາດທີ່ສາມາດປ້ອງກັນໄດ້ດ້ວຍວັກຊິນ ແລະ ເພື່ອຮັບປະກັນວ່າ: ຈະບໍ່ມີເດັກນ້ອຍຄົນໃດຖືກຖິ້ມໄວ້ຂ້າງຫຼັງ, ໂປລິໂອ ແມ່ນເຊື້ອໄວຣັສທີ່ຕິດຕໍ່ໄດ້ງ່າຍ ແລະ ສາມາດເຮັດໃຫ້ເກີດອາການອຳມະພາດຕະຫຼອດຊີວິດ, ພະຍາດນີ້ບໍ່ມີທາງປິ່ນປົວໃຫ້ຫາຍຂາດໄດ້ ແຕ່ສາມາດປ້ອງກັນໄດ້ດ້ວຍການໃຫ້ວັກຊິນເທົ່ານັ້ນ. ເຖິງແມ່ນວ່າໃນທົ່ວໂລກຈະມີຄວາມຄືບໜ້າຫຼາຍໃນການກໍາຈັດພະຍາດນີ້ໃຫ້ໝົດໄປ, ແຕ່ເຊື້ອໄວຣັສດັ່ງກ່າວຍັງຄົງແຜ່ລະບາດຢູ່ໃນບາງປະເທດ. ຕາບໃດທີ່ພະຍາດໂປລີໂອ ຍັງຄົງມີຢູ່ ບໍ່ວ່າແຫ່ງຫົນໃດໃນໂລກ, ເດັກນ້ອຍໃນທຸກໆບ່ອນ ກໍຍັງມີຄວາມສ່ຽງຢູ່ສະເໝີ, ອົງການອຸຍນີເຊັບ ມີຄວາມພາກພູມໃຈທີ່ໄດ້ສະໜັບສະໜູນຂະບວນການນີ້ ພາຍໃຕ້ການຮ່ວມມືຢ່າງໃກ້ຊິດກັບລັດຖະບານແຫ່ງ ສປປ ລາວ ແລະ ຄູ່ຮ່ວມງານ. ພວກເຮົາຂໍສະແດງຄວາມຂອບໃຈຢ່າງຈິງໃຈມາຍັງອົງການ Gavi ແລະ ອົງການ GPEI ສໍາລັບການຊີ້ນໍາ ແລະ ການຊ່ວຍເຫຼືອດ້ານເຕັກນິກຢ່າງຕໍ່ເນື່ອງ. ໂດຍສະເພາະການຊ່ວຍເຫຼືອຈາກຣາຊະອານາຈັກ ຊາອຸດິດ ອາຣັບບີ ໂດຍຜ່ານ KSrelief ຊຶ່ງໄດ້ຊ່ວຍໃຫ້ການຈັດຕັ້ງປະຕິບັດວຽກງານສັກຢາກັນພະ ຍາດທີ່ສໍາຄັນ ສາມາດເຂົ້າເຖິງເດັກນ້ອຍກຸ່ມທີ່ມີຄວາມສ່ຽງທີ່ສຸດ ແລະ ການຮ່ວມມືເຫຼົ່ານີ້ໄດ້ສະແດງໃຫ້ເຫັນເຖິງພະລັງຂອງການຮ່ວມແຮງຮ່ວມໃຈ ໂດຍຜ່ານການປະສານງານດ້ານງົບປະມານ, ການສະໜອງວັກຊິນ, ຊ່ຽວຊານດ້ານເຕັກນິກ ແລະ ການມີສ່ວນຮ່ວມຂອງຊຸມຊົນ ແລະ ເພື່ອຮ່ວມກັນສ້າງຄວາມເຂັ້ມແຂງໃຫ້ລະບົບການສັກຢາກັນພະຍາດແຫ່ງຊາດ ແລະ ສ້າງຄວາມທົນທານ ຕໍ່ການລະບາດຂອງພະຍາດທີ່ອາດເກີດຂຶ້ນໃນອະນາຄົດ.

ຂ່າວ-ພາບ: ບຸນອູ້ມ