ພິທີເປີດໂຄງການໄດ້ຈັດຂຶ້ນເມື່ອບໍ່ດົນມານີ້ ທີ່ໂຮງແຮມລາວພລາຊາ ໂດຍມີບັນດາອົງການພາກລັດ, ສະຖາບັນຄົ້ນຄວ້າ, ມະຫາວິທະຍາໄລແຫ່ງຊາດລາວ, ຜູ້ຊ່ຽວຊານດ້ານການລ້ຽງສັດ, ສະມາຄົມຜູ້ລ້ຽງງົວແລະຜູ້ຕາງໜ້າຈາກສາທາລະນະລັດເກົາຫຼີເຂົ້າຮ່ວມ.
ຂະແໜງການລ້ຽງສັດແມ່ນໜຶ່ງໃນຂະແໜງບູລິມະສິດທີ່ລັດຖະບານ ສປປ ລາວ ກຳນົດໄວ້ ເພື່ອຫັນຂະແໜງກະສິກຳໃຫ້ທັນສະໄໝ ແລະ ພັດທະນາເສດຖະກິດຊົນນະບົດ. ແນວໃດກໍຕາມ, ຟາມລ້ຽງງົວຈຳນວນຫຼາຍຍັງສືບຕໍ່ອາໄສການບັນທຶກຂໍ້ມູນດ້ວຍມື, ເຮັດໃຫ້ການຕິດຕາມສຸຂະພາບສັດ, ປະສິດທິຜົນການຂະຫຍາຍພັນ ແລະ ການລະບາດຂອງພະຍາດປະສົບຄວາມຫຍຸ້ງຍາກ. ການນຳລະບົບບໍລິຫານຈັດການການລ້ຽງສັດດິຈິຕອນເຂົ້າມານຳໃຊ້ ຄາດວ່າຈະຊ່ວຍເພີ່ມຜະລິດຕະພາບຂອງຟາມ, ພ້ອມທັງເສີມສ້າງລະບົບການຕິດຕາມທີ່ມາ (traceability) ແລະ ສະໜັບສະໜູນການສົ່ງອອກງົວໃນອະນາຄົດ.
ແພລດຟອມດິຈິຕອນດັ່ງກ່າວໄດ້ນຳເອົາລະບົບປ້າຍຫູ RFID (Radio-Frequency Identification), ພ້ອມກັບການຕິດຕາມທີ່ຂັບເຄື່ອນດ້ວຍ AI ແລະ ການຈັດການຂໍ້ມູນເທິງລະບົບຄລາວ (cloud-based data management) ເພື່ອສະໜອງຂໍ້ມູນແບບທັນເວລາກ່ຽວກັບສັດແຕ່ລະໂຕ ໃຫ້ແກ່ຊາວກະສິກອນ ແລະ ພາກສ່ວນຄຸ້ມຄອງການລ້ຽງສັດ. ລະບົບດັ່ງກ່າວສາມາດລະບຸຕົວຕົນຂອງສັດດ້ວຍລະບົບດິຈິຕອນ, ຕິດຕາມການເຄື່ອນຍ້າຍ, ຕິດຕາມສຸຂະພາບ, ບັນທຶກການຂະຫຍາຍພັນ ແລະ ບໍລິຫານການຜະລິດ, ຊຶ່ງຊ່ວຍໃຫ້ຕັດສິນໃຈໄດ້ວ່ອງໄວຂຶ້ນ ແລະ ປັບປຸງການບໍລິຫານຟາມໃຫ້ມີປະສິດທິຜົນ.
ທ່ານ ສິລິພົນ ພິທັກສູນຮອງຫົວໜ້າສະຖາບັນ NAFRI ໄດ້ເນັ້ນວ່າ: ການຫັນຂະແໜງການລ້ຽງສັດໃຫ້ທັນສະໄໝ ຜ່ານນະວັດຕະກຳ ແລະ ເຕັກໂນໂລຊີດິຈິຕອນ ແມ່ນບູລິມະສິດແຫ່ງຊາດ. ທ່ານກ່າວວ່າ ການຮ່ວມມືກັບ WHYBIZ ຖືເປັນຂີດໝາຍສຳຄັນໃນການນຳປັນຍາປະດິດ (Artificial Intelligence: AI) ມາປະຍຸກໃຊ້ໃນການບໍລິຫານຈັດການການລ້ຽງສັດຢ່າງເປັນຮູບປະທຳ ແລະ ສະທ້ອນເຖິງຄວາມມຸ່ງໝັ້ນຂອງລັດຖະບານໃນການປັບປຸງຜະລິດຕະພາບໃນຂະແໜງກະສິກຳ, ພ້ອມທັງສະໜັບສະໜູນການພັດທະນາຊົນນະບົດຢ່າງຍືນຍົງ. ພາຍຫຼັງການນຳໃຊ້ປະສົບຜົນສຳເລັດຢູ່ສູນຄົ້ນຄວ້າການລ້ຽງສັດ ແລະ ຟາມລ້ຽງງົວພັນ, ຄາດວ່າໂຄງການຈະຂະຫຍາຍໄປອີກ 18 ແຫ່ງທົ່ວປະເທດ.
ທ່ານ Park Jungwe, ຜູ້ອຳນວຍການ KOTRA ປະຈຳນະຄອນຫຼວງວຽງຈັນ, ໄດ້ກ່າວເນັ້ນວ່າ ໂຄງການນີ້ສະແດງເຖິງການຂະຫຍາຍຕົວຂອງການຮ່ວມມືຍຸດທະສາດລະຫວ່າງສາທາລະນະລັດເກົາຫຼີ ແລະ ສປປ ລາວ ໃນການສົ່ງເສີມກະສິກຳອັດສະລິຍະ, ທ່ານກ່າວວ່າ: ການບໍລິຫານຈັດການການລ້ຽງສັດດິຈິຕອນຈະນຳມາເຊິ່ງຜົນປະໂຫຍດທີ່ສຳຄັນໃນໄລຍະຍາວ ໂດຍຊ່ວຍເພີ່ມປະສິດທິພາບການຂະຫຍາຍພັນ, ສຸຂະພາບສັດ, ຜະລິດຕະພາບຂອງຟາມ ແລະ ຂີດຄວາມສາມາດໃນການບໍລິຫານ, ພ້ອມທັງສະໜັບສະໜູນການປະຕິບັດຕາມມາດຕະຖານສາກົນດ້ານການຕິດຕາມທີ່ມາ.
ໂຄງການນີ້ສະແດງເຖິງຄວາມມຸ່ງໝັ້ນຂອງສາທາລະນະລັດເກົາຫຼີ ໃນການສະໜັບສະໜູນການຫັນປ່ຽນສູ່ດິຈິຕອນ ໃນຂະແໜງກະສິກຳ ຜ່ານການຖ່າຍທອດເຕັກໂນໂລຊີ ແລະ ການຮ່ວມມືລະຫວ່າງພາກລັດ-ເອກະຊົນ. ໂດຍການປະສົມປະສານນະວັດຕະກຳຂອງ ສ ເກົາຫຼີກັບສະຖາບັນຄົ້ນຄວ້າຂອງ ສປປລາວ, ຂໍ້ລິເລີ່ມນີ້ມີເປົ້າໝາຍພັດທະນາວິທີແກ້ໄຂທີ່ສາມາດນຳໃຊ້ໄດ້ຈິງ ແລະ ຂະຫຍາຍນຳໃຊ້ທົ່ວປະເທດ.
ໃນໄລຍະຍາວ, ຄາດວ່າໂຄງການຈະຊ່ວຍປັບປຸງຄຸນນະພາບຂອງງົວ, ເສີມສ້າງລະບົບຄວບຄຸມພະຍາດ, ຫຼຸດຕົ້ນທຶນການຜະລິດ, ເພີ່ມລາຍຮັບໃຫ້ຊາວກະສິກອນ ແລະ ຍົກສູງຂີດຄວາມສາມາດໃນການແຂ່ງຂັນຂອງຊີ້ນງົວລາວໃນຕະຫຼາດພາກພື້ນ ແລະ ສາກົນ.
ຂ່າວ: Kotra
ຄໍາເຫັນ