ກອງປະຊຸມມີຂຶ້ນ ເພື່ອປຶກສາຫາລື ແລະ ແລກປ່ຽນຄໍາຄິດເຫັນຮ່ວມກັນ ພ້ອມທັງການ ໃຫ້ທິດຊີ້ນໍາດ້ານນະໂຍບາຍ ທີ່ຕິດພັນກັບການຈັດຕັ້ງປະຕິບັດທຸກວຽກງານທີ່ປິ່ນອ້ອມເສົາຄໍ້າເສດຖະກິດອາຊຽນ ເຊັ່ນ: ປຶກສາຫາລືກ່ຽວກັບການຜັນຂະຫຍາຍ ຜົນຂອງກອງປະຊຸມເຈົ້າໜ້າທີ່ອາວຸໂສເສດຖະກິດອາຊຽນຄັ້ງທີ 2 SEOM2/55, ແລກປ່ຽນຄໍາຄິດເຫັນກ່ຽວກັບການເປັນປະທານອາຊຽນຂອງ ສປປ ລາວ ໃນປີ 2024 ນີ້, ໂດຍ ສະເພາະ ສປປ ລາວ ໃນນາມເປັນປະທານອາຊຽນ ປີ 2024 ຈະໄດ້ລາຍງານຕໍ່ກອງປະຊຸມ ກ່ຽວກັບຄວາມຄືບໜ້າການຈັດຕັ້ງປະຕິບັດແຜນວຽກບຸລິມະລິດ PEDs ສໍາລັບປີ 2024.
ກອງປະຊຸມ ຍັງໄດ້ປຶກສາຫາລືກັນກ່ຽວກັບ ຖະແຫຼງການອາຊຽນວ່າດ້ວຍການເພີ່ມທະວີການເຊື່ອມຈອດຕ່ອງໂສ້ການສະໜອງ (ASEAN Declaration on Enhancing Supply Chain Connectivity); ພິຈາລະນາຮັບຮອງເອົາບົດລາຍງານຈາກຫຼາຍໜ່ວຍງານ ພາຍໃຕ້ເສົາຄໍ້າປະຊາຄົມເສດຖະກິດອາຊຽນ.
ນອກນັ້ນ, ກອງປະຊຸມຍັງ ໄດ້ປຶກສາຫາລື ພ້ອມທັງໃຫ້ທິດຊີ້ນໍາໃນຫຼາຍບັນຫາເຊັ່ນ: ຈະໄດ້ຫາລື ກ່ຽວກັບ ແຜນວຽກບຸລິມະສິດ ປີ 2024 ວ່າມີຄວາມຄືບໜ້າໃນການຈັດຕັ້ງປະຕິບັດແນວໃດ; ກອງປະຊຸມຈະໄດ້ຮັບຟັງ ການລາຍງານຄວາມຄືບໜ້າໃນການລົງນາມ ຫຼື ການຈັດຕັ້ງປະຕິບັດບັນດາສັນຍາຕ່າງໆ ຂອງອາຊຽນ, ຮັບຊາບ ຜົນກອງປະຊຸມໜ່ວຍງານດ້ານການຮ່ວມມື (ACCWG) ຄັ້ງທີ 7 ຊຶ່ງໄດ້ຫາລືກ່ຽວກັບການສະເໜີເຂົ້າເປັນສະມາຊິອາຊຽນຂອງປະເທດ ຕີມໍເລັດສະເຕ, ກອງປະຊຸມດັ່ງກ່າວໄດ້ຈັດຂຶ້ນໃນ ເດືອນມິຖຸນາ ຜ່ານມາທີ່ ນະຄອນຫຼວງວຽງຈັນ 2024.
ກອງປະຊຸມໄດ້ຮັບຟັງການລາຍງານຜົນ ແລະ ຄວາມຄືບໜ້າໃນການເຈລະຈາຂອບວຽກວ່າດ້ວຍເສດ ຖະກິດດີຈີຕອນ (DEFA), ພ້ອມທັງການປຶກສາຫາລືເອກະສານທີ່ໄດ້ປັບປຸງຈາກກອງເລຂາອາຊຽນ ຕິດພັນກັບຄວາມເປັນໄປໄດ້ໃນການສ້າງຕັ້ງ ໜ່ວຍງານອຸທອນ ເຊິ່ງຢູ່ພາຍໃຕ້ອະນຸສັນຍາວ່າດ້ວຍ ການສົ່ງເສີມການແກ້ໄຂຂໍ້ຂັດແຍ່ງ (EDSM). ນອກຈາກນັ້ນ, ກອງປະຊຸມຈະໄດ້ປຶກສາຫາລືກ່ຽວກັບກົນໄກການມີສ່ວນຮ່ວມລະຫວ່າງ ພາກລັດ ກັບ ພາກທຸລະກິດ ໂດຍອີງຕາມເອກະສານທີ່ກອງເລຂາອາຊຽນໄດ້ເຮັດການສຶກສາມາແລ້ວນັ້ນ ເພື່ອປັບປຸງກົນໄກການ ມີສ່ວນຮ່ວມລະຫວ່າງພາກລັດ ກັບ ພາກທຸລະກິດ ພາຍໃນອາຊຽນ ແລະ ອາຊຽນ ກັບ ສະພາທີ່ປຶກສາທຸລະກິດ (ASEAN-BAC).
ກອງປະຊຸມ ຍັງໄດ້ຮັບຟັງລາຍງານການກະ ກຽມສໍາລັບກອງປະຊຸມ ລັດຖະມົນຕີເສດຖະກິດອາຊຽນຄັ້ງທີ 56 (AEM 56th) ແລະ ກອງປະຊຸມທີ່ ກ່ຽວຂ້ອງ ຊຶ່ງຈະຈັດຂຶ້ນໃນລະຫວ່າງວັນທີ 15-22 ກັນຍາ ທີ່ ນະຄອນຫຼວງວຽງຈັນ ສປປ ລາວ. ຕິດພັນກັບການກະກຽມ ກອງປະຊຸມດັ່ງກ່າວ ກອງປະຊຸມ ຈະໄດ້ພິຈາລະນາ ຮ່າງວາລະກອງປະຊຸມສໍາລັບ ກອງປະຊຸມ ລັດຖະມົນຕີສະພາ ເຂດການຄ້າເສລີອາຊຽນ ຄັ້ງທີ 38, ກອງປະຊຸມ ລັດຖະມົນຕີ ສະພາເຂດການລົງທຶນອາຊຽນຄັ້ງທີ 27, ກອງປະຊຸມລັດຖະມົນຕີເສດຖະກິດອາຊຽນ ຄັ້ງທີ 56, ກອງປະຊຸມປຶກສາຫາລືລະຫວ່າງລັດຖະມົນຕີເສດຖະກິດອາຊຽນ ແລະ ປະເທດຄູ່ເຈລະຈາ, ແລະ ກອງປະຊຸມປຶກສາຫາລືລະຫວ່າງລັດຖະມົນຕີເສດຖະກິດອາຊຽນ ແລະ ສະວິດເຊີແລນແບບເປີດສາມຝ່າຍ ຄັ້ງທີ 3. ນອກນັ້ນ, ກອງປະຊຸມຍັງຈະໄດ້ພິຈາລະນາວາລະກອງປະຊຸມສໍາລັບລັດຖະມົນຕີເສດຖະກິດອາຊຽນ ແລະ ຜູ້ອໍາການໃຫຍ່ອົງການສັບສິນທາງປັນຍາໂລກ ແລະ ຫົວຂໍ້ອື່ນໆອີກ.
ທ່ານ ໄຊຊະນະ ໄຊຍະກອນ ຫົວໜ້າກົມເຈລະຈາການຄ້າ ແລະ ຮ່ວມມືເສດຖະກິດສາກົນ ທັງເປັນ ຫົວໜ້າເຈົ້າໜ້າທີ່ອາວຸໂສເສດຖະກິດອາຊຽນ ຂອງ ສປປ ລາວ ໃນນາມປະທານກອງປະຊຸມ ໄດ້ກ່າວສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ແຈ້ງກ່ຽວກັບສະພາບຈຸດພິເສດຂອງ ນະຄອນຫຼວງວຽງຈັນ ຊຶ່ງມີ ສະຖານທີ່ທ່ອງທ່ຽວ ດ້ານວັດທະນາທໍາ ແລະ ປະຫວັດສາດ ທີ່ໜ້າສົນໃຈ ພ້ອມທັງເຊີນຊວນບັນດາ ເຈົ້າໜ້າທີ່ອາວຸໂສເສດຖະກິດອາຊຽນ ແລະ ບັນດາຄະນະຜູ້ແທນທີ່ມາຮ່ວມປະຊຸມໃນຄັ້ງນີ້ ຫາໂອກາດໄປທ່ຽວຊົມສະຖານທີ່ທ່ອງທ່ຽວຕ່າງໆທີ່ສວຍງາມໃນນະຄອນຫຼວງວຽງຈັນ.
ພ້ອມກັນນັ້ນ, ກໍໄດ້ສະແດງຄວາມຂອບໃຈຕໍ່ການໃຫ້ການສະໜັບສະໜູນຂອງບັນດາປະເທດສະມາຊິກອາຊຽນ ຊຶ່ງຈະເຮັດໃຫ້ການເປັນເຈົ້າພາບ ແລະ ເປັນປະທານອາຊຽນ ຂອງ ສປປ ລາວ ປີ 2024 ປະສົບຜົນສໍາເລັດຕາມຄາດໝາຍທີ່ວາງໄວ້. ຂ່າວ-ພາບ: ໃສຫຼ້າຄຳ
ຄໍາເຫັນ