ໃນພິທີ ສະຫາຍ ພົນຈັດຕະວາ ອຸ່ນຄຳ ສີແຫວນວົງສັກ ຜູ້ບັນຊາການທະຫານຊາຍແດນກອງທັບ ປະຊາຊົນລາວ ໄດ້ຜ່ານບົດລາຍງານຜົນສຳເລັດການກໍ່ສ້າງ ກອງບັນຊາການທະຫານຊາຍແດນກອງທັບປະຊາຊົນລາວ ອີງຕາມ ຂໍ້ຕົກລົງຂອງກະຊວງປ້ອງກັນປະເທດມອບໝາຍໂຄງການກໍ່ສ້າງສໍານັກງານກອງບັນຊາການທະຫານຊາຍແດນ ກອງທັບປະຊາຊົນລາວ ໃຫ້ບໍລິສັດລາວີນາໂກ 36 ຈໍາກັດຜູ້ດຽວ, ອີງຕາມ ສັນຍາໂຄງການກໍ່ສ້າງສໍານັກງານກອງບັນຊາການທະຫານຊາຍແດນ ກອງທັບປະຊາຊົນລາວ ລະຫວ່າງ ກົມທະຫານຊາຍແດນ ກົມໃຫຍ່ເສນາທິການ ກັບ ບໍລິສັດລາວີນາໂກ 36 ຈໍາກັດຜູ້ດຽວ ແລະ ອີງຕາມການລົງມືຈັດຕັ້ງປະຕິບັດບັນດາໜ້າວຽກຕ່າງໆຂອງໂຄງການໃນໄລຍະຜ່ານມາຮອດປັດຈຸ
ບັນໄດ້ສໍາເລັດ ຊຶ່ງເປັນອາຄານແບບຖາວອນ, ມີເນື້ອທີ່ດິນທັງໝົດ 3,2 ເຮັກຕາ ປະກອບມີ ຕຶກອາຄານສໍານັກງານກອງບັນຊາການ 5 ຊັ້ນ, ສະໂມສອນຫຼັງ, ອາຄານຫ້ອງການ, ໝວດກໍ່ສ້າງ, ໝວດຂົນສົ່ງ, ໝວດສື່ສານ ແລະ ໝວດກົດລັບ, ພ້ອມນີ້, ຍັງມີ ອາຄານຫ້ອງໝວດຊ້ອມແປງຈໍານວນ, ອາຄານໂຮງໝໍ 2 ຊັ້ນ, ອາຄານໝວດປ້ອງກັນ, ອາຄານຫໍພັກໂສດ ແລະ ພະນັກງານ 2 ຊັ້ນ, ອາຄານສາງອາວຸດ, ອາຄານສາງອຸປະໂພກ-ບໍລິໂພກ , ເຮືອນຄົວ, ກາລາລົດຂົນສົ່ງ, ກະລາຊ້ອມແປງ ນອກນີ້, ຍັງມີປະຕູໂຂງ, ຜາມໄຊ, ເດີ່ນກິລາ, ປໍ້ານໍ້າມັນ, ລະບົບໄຟຟ້າ, ນໍ້າປະປາຄົບຊຸດ, ເຄື່ອງໃຊ້ຫ້ອງການ, ເຟີນີເຈີ ແລະ ອື່ນໆ ຕາມແບບທີ່ກໍານົດ; ພິເສດສະໂມສອນໄດ້ມີການຕິດຕັ້ງໜ້າຈໍແອວອີດີອີກດ້ວຍ. ລວມມູນຄ່າກໍ່ສ້າງທັງໝົດ: 12,122,618 ໂດລາ.
ໂອກາດນີ້, ສະຫາຍ ສະຫາຍ ພົນເອກ ຫວຽນ ເຕີນ ເກືືອງ ໄດ້ກ່າວມອບອາຄານ ໂຄງການກໍ່ສ້າງກອງບັນຊາການທະຫານຊາຍແດນກອງທັບປະຊາຊົນລາວ ທີ່ໄດ້ກໍ່ສ້າງສຳເລັດ ຊຶ່ງເປັນການສະແດງໃຫ້ເຫັນເຖິງ ສາຍພົວພັນອັນພິເສດ ແລະ ສະນິດແໜ້ນລະຫວ່າງສອງຊາດ, ສອງກອງທັບ, ປະຊາຊົນທັງສອງຊາດ ທີ່ສະແດງໃຫ້ເຫັນມິດຕະພາບ ອັນເປັນມູນເຊື້ອ ດີຕໍ່ກັນ ທັງເປັນປະຫວັດສາດໜ້າໃໝ່ ເພື່ອເປັນການເສີມຂະຫຍາຍສາຍພົວພັນ ຫວຽດນາມ-ລາວ-ລາວ-ຫວຽດນາມ ໃຫ້ແໜ້ນແຟ້ນຍິ່ງໆຂຶ້ນ.
ໂອກາດດັ່ງກ່າວ, ສະຫາຍ ພົນໂທ ສາຍໃຈ ກົມມະສິດ ໄດ້ກ່າວຮັບໂຄງການດັ່ງກ່າວ ຊຶ່ງເປັນໂຄງການໜຶ່ງທີ່ມີຄວາມໝາຍສຳຄັນທາງດ້ານປະຫວັດສາດຂອງກອງທັບປະຊາຊົນລາວ, ທັງເປັນນິມິດໝາຍທີ່ດີໃຫ້ແກ່ສາຍພົວພັນມິດຕະພາບອັນຍິ່ງໃຫຍ່, ຄວາມສາມະຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ສອງກອງທັບລາວ-ຫວຽດນາມ, ເວົ້າລວມ, ເວົ້າສະເພາະ ກໍຄືສອງກອງບັນຊາການທະຫານຊາຍແດນລາວ-ຫວຽດນາມ ໃຫ້ຈະເລີນງອກງາມຍິ່ງໆຂຶ້ນ. ໃນທ້າຍພິທີ, ຄະນະຜູ້ແທນທັງສອງຝ່າຍ ໄດ້ຂຶ້ນຕັດແຖບຜ້າເປີດນໍາໃຊ້ຕຶກອາຄານ ກອງບັນຊາທະຫານຊາຍແດນ ກອງທັບປະຊາຊົນລາວ ຢ່າງເປັນທາງການ.(ຂ່າວ:ກອງທັບ)
ຄໍາເຫັນ