 |
ທ່ານ ເດຊານຸລາດ ແສນດວງເດດ ກ່າວເປີດງານວ່າ: ມຊ ສ້າງຕັ້ງຂຶ້ນໃນປີ 1996 ແລະ ເປັນມະຫາວິທະຍາໄລສັງລວມທີ່ໃຫຍ່ທີ່ສຸດຂອງ ສປປ ລາວ. ຕະຫຼອດ 30 ປີຜ່ານມາ ມະຫາວິທະຍາໄລໄດ້ປະຕິບັດພາລະກິດອັນສໍາຄັນໃນການສ້າງ ແລະ ພັດທະນາຊັບພະຍາກອນມະນຸດ, ສົ່ງເສີມວຽກງານຄົ້ນຄວ້າວິທະຍາສາດ ແລະ ຂະຫຍາຍການຮ່ວມມືສາກົນ ແລະ ຫວັງເປັນຢ່າງຍິ່ງວ່າຜ່ານງານວາງສະແດງໃນຄັ້ງນີ້ ມຊ ຈະມີການຮ່ວມມືເພີ່ມຂຶ້ນກັບບັນດາມະຫາວິທະຍາໄລຂອງກວາງຊີ ໂດຍສະເພາະບັນດາສະຖາບັນການສຶກສາຊັ້ນສູງທີ່ມາວາງສະແດງໃນຄັ້ງນີ້.
ທ່ານ ໄກສອນ ເພັງໂສພາ ກ່າວວ່າ: ງານວາງສະແດງການສຶກສາໃນຄັ້ງນີ້, ບໍ່ພຽງແຕ່ເປັນເວທີໃຫ້ນັກຮຽນ-ນັກສຶກສາລາວໄດ້ຮັບຂໍ້ມູນການສຶກສາ, ທຶນການສຶກສາ ແລະ ໂອກາດໃນການສືບຕໍ່ການຮຽນຢູ່ ສປ ຈີນ ທີ່ຖືກຕ້ອງເທົ່ານັ້ນ, ແຕ່ຍັງເປັນຂົວເຊື່ອມແຫ່ງມິດຕະພາບ, ຄວາມເຂົ້າໃຈ ແລະ ການພົວພັນດ້ານການສຶກສາ-ວັດທະນະທໍາ ລະຫວ່າງສອງປະເທດ ໃຫ້ນັບມື້ນັບແໜ້ນແຟ້ນຂຶ້ນກວ່າເກົ່າ. ກວາງຊີແມ່ນໜຶ່ງໃນຄູ່ຮ່ວມມືດ້ານການສຶກສາທີ່ສໍາຄັນຂອງກະຊວງ ສສກ. ໃນໄລຍະຜ່ານມາ, ສອງຝ່າຍໄດ້ມີການພົວພັນ ແລະ ຮ່ວມມືຢ່າງກວ້າງຂວາງ ບໍ່ວ່າຈະເປັນການໃຫ້ທຶນການສຶກສາ, ການຝຶກອົບຮົມຄູ-ອາຈານ ແລະ ການຊ່ວຍພັດທະນາຫຼັກສູດຕ່າງໆ. ສິ່ງເຫຼົ່ານີ້ໄດ້ປະກອບສ່ວນສໍາຄັນໃນການພັດທະນາຊັບພະຍາກອນມະນຸດ ໃຫ້ແກ່ ສປປ ລາວ.
ໂອກາດນີ້, ທ່ານ ຫວູຈິນຊາງ ກ່າວວ່າ: ປັດຈຸບັນ ກວາງຊີມີສະຖາບັນການສຶກສາຊັ້ນສູງ 93 ແຫ່ງ ແລະ ມີນັກສຶກສາກວ່າ 1,88 ລ້ານຄົນ. ມີພື້ນຖານການຮຽນການສອນທີ່ທັນສະໄໝ, ຫຼັກສູດຄົບຖ້ວນ ແລະ ເປັນຈຸດໝາຍປາຍທາງທີ່ເໝາະສົມສໍາລັບຊາວໜຸ່ມອາຊຽນໃນການສຶກສາຕໍ່, ມີນັກສຶກສາຕ່າງປະເທດກວ່າ 10,000 ຄົນ. ໃນນັ້ນ, ປະມານ 70% ມາຈາກປະເທດອາຊຽນ.
 |
ກວາງຊີໄດ້ຈັດຕັ້ງ “ທຶນການສຶກສາລັດຖະບານ ຈີນ-ກວາງຊີ ສໍາລັບນັກສຶກສາອາຊຽນ” ແລະ “ທຶນການສຶກສາລັດຖະບານກວາງຊີສໍາລັບນັກສຶກສາອາຊຽນ” ໂດຍສະ ໜອງໂກຕ້າທຶນການສຶກສາໃຫ້ນັກສຶກສາລາວທຸກປີຈໍານວນ 52 ທຶນສໍາລັບຫຼັກສູດ ປະລິນຍາ ແລະ 60 ທຶນສໍາລັບຫຼັກສູດພາສາຈີນ. ໄດ້ຈັດ “ງານວາງສະແດງການສຶກສາຮຽນຕໍ່ ກວາງຊີ” ໃນບັນດາປະເທດອາຊຽນຢ່າງສໍາເລັດຜົນມາແລ້ວ 29 ຄັ້ງ ຊຶ່ງໄດ້ກາຍເປັນເວທີສໍາຄັນໃຫ້ນັກຮຽນ ແລະ ຜູ້ປົກຄອງໄດ້ເຂົ້າເຖິງແຫຼ່ງຂໍ້ມູນການສຶກສາທີ່ມີຄຸນນະພາບ.
ຈີນ ແລະ ລາວ ເປັນປະເທດບ້ານ ໃກ້ເຮືອນຄຽງທີ່ດີ ມີພູເຂົາ ແລະ ແມ່ນ້ຳເຊື່ອມຕໍ່ກັນມິດຕະພາບຂອງສອງປະເທດມີຄວາມໝັ້ນຄົງຍາວນານ. ປີນີ້ແມ່ນປີຄົບຮອບ 65 ປີແຫ່ງການສ້າງຕັ້ງສາຍພົວພັນທາງການທູດ ລາວ-ຈີນ ແລະ “ປີມິດຕະພາບ ຈີນ-ລາວ”. ການສຶກສາເປັນເສົາຄໍ້າສໍາຄັນຂອງການຮ່ວມມືຍຸດ ທະສາດຮອບດ້ານລະຫວ່າງສອງປະເທດ. ໃນຊຸມປີຜ່ານມາ, ການຮ່ວມມືດ້ານການສຶກສາ ລະຫວ່າງ ກວາງຊີ ແລະ ລາວ ໄດ້ຮັບຜົນສໍາເລັດຢ່າງໂດດເດັ່ນ. ມະຫາວິທະຍາໄລຊົນເຜົ່າກວາງຊີ ແລະ ມະຫາວິທະຍາໄລແຫ່ງຊາດລາວ ໄດ້ຮ່ວມມືກັນສ້າງ ສະຖາບັນຂົງຈືຂຶ້ນມາ ແລະ ໄດ້ດໍາເນີນວຽກ ຢ່າງມີຜົນສໍາເລັດຢ່າງໂດດເດັ່ນ ແລະ ໂດ່ງດັ່ງທົ່ວ ສປ ຈີນ ໂດຍສະເພາະໄດ້ເປີດສອນຫຼັກສູດ ປະລິນຍາຕີສາຂາຄູພາສາຈີນ ຊຶ່ງມີນັກສຶກສາ ຫຼາຍກວ່າ 300 ຄົນ ແລະ ໄດ້ຝຶກອົບຮົມພາສາຈີນໃຫ້ຄົນລາວໃນສັງຄົມຕະຫຼອດ 16 ປີຜ່ານມາໄດ້ຫຼາຍກວ່າ 90,000 ກວ່າຄົນ. ນອກຈາກນັ້ນ, ມະຫາວິທະຍາໄລອາຊີວະສຶກສາກະສິກໍາກວາງຊີ ໄດ້ຮ່ວມມືກັບມະຫາວິທະຍາໄລແຫ່ງຊາດລາວ ແລະ ວິທະຍາໄລເຕັກນິກກະສິກໍາດົງຄໍາຊ້າງສ້າງຕັ້ງ “ວິທະຍາໄລຊ່າງຝີມືກະສິກໍາທັນສະໄໝຈີນ-ລາວ” ໂດຍໄດ້ອົບຮົມນັກສຶກສາຫຼາຍກວ່າ 150 ຄົນ ແລະ ຜູ້ຮັບການອົບຮົມວິຊາຊີບກວ່າ 1,900 ຄົນ ກາຍເປັນຕົວຢ່າງແຫ່ງການບູລະນາການ “AI, ອາຊີວະກະສິກໍາ”.
ປັດຈຸບັນ, ປັນຍາປະດິດ (AI) ກໍາລັງປ່ຽນແປງໂລກຢ່າງໄວວາ. ກວາງຊີກໍາລັງສ້າງສູນກາງການຮ່ວມມື AI ໂດຍຫັນໜ້າໃສ່ອາຊຽນ, ພັດທະນາການສຶກສາດ້ວຍ AI ຢ່າງຮອບດ້ານ, ພ້ອມທັງສ້າງສະຖາບັນປັນຍາປະດິດຈີນ-ອາຊຽນ ເພື່ອຜະລິດບຸກຄະລາກອນດ້ານ AI ແລະ ນະວັດຕະກໍາໃຫ້ແກ່ພາກພື້ນ. ງານໃນຄັ້ງນີ້, ຈັດຂຶ້ນພາຍໃຕ້ຫົວຂໍ້: “ຮຽນຕໍ່ກວາງຊີ ສ້າງອະນາຄົດດ້ວຍປັນຍາ AI ສ້າງຄວາມຝັນ ສັງລວມເອົາປັນຍາອາຊຽນ” ເພື່ອສ້າງເວທີຄຸນນະພາບສໍາລັບນັກຮຽນ ແລະ ຊາວໜຸ່ມລາວ ໃນການສຶກສາຕໍ່ຢູ່ກວາງຊີ ແລະ ຂໍຕ້ອນຮັບບັນດາເພື່ອນມິດສະຫາຍຈາກລາວ, ນັກຮຽນ-ນັກສຶກສາ ໃຫ້ເດີນທາງໄປຢ້ຽມຢາມ ແລະ ສຶກສາຢູ່ກວາງຊີ. ພ້ອມກັນນັ້ນ, ຂໍເຊີນຊວນຜູ້ປະກອບການດ້ານການສຶກສາຂອງລາວເຂົ້າຮ່ວມການແລກປ່ຽນ ແລະ ຮ່ວມມືກັບກວາງຊີ ເພື່ອຮ່ວມກັນສ້າງຮູບແບບການຜະລິດບຸກຄະລາ ກອນໃໝ່ເຊັ່ນ: “ພາສາຈີນ, ທັກສະວິຊາຊີບ” ແລະ “AI, ກະສິກໍາອັດສະລິຍະ”.
ໂອກາດນີ້, ໄດ້ມີພິທີມອບປ້າຍໃຫ້ໂຮງຮຽນດີເດັ່ນ, ພິທີແລກປ່ຽນສັນຍາການຮ່ວມມືລະຫວ່າງບໍລິສັດ. ຈາກນັ້ນ, ທ່ານ ໄກສອນ ເພັງໂສພາ ພ້ອມຄະນະປະທານ ໄດ້ໃຫ້ກຽດຂຶ້ນກົດປຸ່ມເປີດງານວາງສະແດງການສຶກສາສາກົນ ຮຽນຕໍ່ກວາງຊີ ຢ່າງເປັນທາງການ.
ຂ່າວ-ພາບ: ວັນເພັງ
ຄໍາເຫັນ