 |
ທ່ານ ພຸດທະວັນ ນັນທະວົງ ກ່າວວ່າ: ລາວ-ຫວຽດນາມ ໄດ້ເພີ່ມພູນຄູນສ້າງສາຍພົວ ພັນຮ່ວມມືຮອບດ້ານ. ໃນນັ້ນ, ການຮ່ວມມືດ້ານເສດຖະກິດ-ການຄ້າກໍນັບມື້ນັບຂະຫຍາຍຕົວ; ໃນດ້ານ ການລົງທຶນ, ນັບແຕ່ ສປປ ລາວ ເປີດຮັບການລົງທຶນຈາກຕ່າງປະເທດມາຮອດປັດຈຸບັນກໍໄດ້ມີການ ລົງທຶນຈາກບັນດາປະເທດທີ່ມີຄວາມສົນໃຈມາລົງທຶນຢູ່ ສປປ ລາວ. ໃນນັ້ນ, ການລົງທຶນຂອງ ຫວຽດນາມມີທັງໝົດ 289 ໂຄງການທຶນຈົດທະບຽນ 6.7 ຕື້ໂດລາ, ຈັດຢູ່ອັນດັບ 2 ຂອງບັນດາປະ ເທດ ແລະ ເຂດແຄວ້ນທີ່ເຂົ້າມາລົງທຶນຢູ່ລາວ. ສະເພາະໃນ 6 ເດືອນຕົ້ນປີ 2026 ການລົງທຶນຂອງ ຫວຽດນາມເຂົ້າມາລາວບັນລຸເກືອບ 600 ລ້ານໂດລາ, ເພີ່ມຂຶ້ນຫຼາຍກວ່າ 4.2 ເທົ່າເມື່ອທຽບໃສ່ໄລ ຍະດຽວກັນໃນປີ 2025; ການລົງທຶນສ່ວນໃຫຍ່ແມ່ນເປັນການລົງໃນຂະແໜງບໍ່ແຮ່, ພະລັງງານ ໄຟຟ້າ, ຂະແໜງກະສິກໍາ, ໂທລະຄົມມະນາຄົມ (UNITEL), ທະນາຄານ ແລະ ຂະແໜງບໍລິການ ອື່ນໆ.
 |
ງານວາງສະແດງສິິນຄ້າໃນຄັ້ງນີ້, ຖືວ່າເປັນງານວາງສະແດງສິນຄ້າລະດັບຊາດ ແລະ ເປັນນິ ມິດໝາຍສໍາຄັນອັນໜຶ່ງທີ່ສະແດງໃຫ້ເຫັນຄວາມເອົາໃຈໃສ່ປະກອບສ່ວນຢ່າງຕັ້ງໜ້າໃຫ້ແກ່ວຽກ ງານ ການຮ່ວມມືຮອບດ້ານລະຫວ່າງສອງພັກ, ສອງລັດຖະບານກໍຄືປະຊາຊົນລາວ - ຫວຽດນາມ ໂດຍສະ ເພາະດ້ານການຄ້າ, ການລົງທຶນ ແລະ ການທ່ອງທ່ຽວຂອງສອງປະເທດໃຫ້ເຕີບໃຫຍ່ຂະຫຍາຍຕົວ ຢ່າງບໍ່ຢຸດຢັ້ງ, ທັງເປັນການປະກອບສ່ວນຢ່າງຕັ້ງໜ້າເຂົ້າໃນການສ້າງສາ ແລະ ພັດທະນາເສດຖະກິດ - ສັງຄົມຂອງທັງສອງຊາດ. ພ້ອມກັນນັ້ນ, ກໍເພື່ອເປັນການສືບຕໍ່ປະຕິບັດຕາມແຜນການຮ່ວມມື ທີ່ພວກເຮົາເຄີຍໄດ້ປະຕິບັດມາເປັນປະຈໍາແຕ່ລະປີ, ນັບແຕ່ສອງລັດຖະບານໄດ້ລົງນາມຮ່ວມກັນເປັນ ຕົ້ນມາ, ກະຊວງ ອຄ ລາວ ແລະ ກະຊວງອຸດສາຫະກຳ ແລະ ການຄ້າຫວຽດນາມ ໄດ້ຈັດ ງານວາງສະແດງສິນຄ້າຮ່ວມກັນ. ສໍາລັບປີ 2026 ເຫັນວ່າບໍລິສັດຂອງຫວຽດນາມ ແລະ ລາວ ມີຄວາມສົນໃຈໃນການເຂົ້າຮ່ວມງານຫຼາຍພໍສົມຄວນ ຊຶ່ງເຮັດໃຫ້ບໍລິມາດ ແລະ ຄວາມຫຼາກຫຼາຍ ຂອງສິນຄ້າເພີ່ມຂຶ້ນ, ມີຫົວໜ່ວຍທຸລະກິດເຂົ້າຮ່ວມງານໃນຄັ້ງທັງໝົດ 250 ຫ້ອງ. ໃນນີ້, ມີບໍລິສັດ ເຂົ້າຮ່ວມທັງໝົດ 140 ບໍລິສັດ, ປະເພດສິນຄ້າທີ່ນໍາເຂົ້າຮ່ວມວາງສະແດງປະກອບມີ: ປະເພດສິນຄ້າ ກະສິກໍາປຸງແຕ່ງ, ເຄື່ອງຫັດຖະກຳແຜ່ນແພໄໝ-ຜ້າ ແລະ ເຄື່ອງຕັດຫຍິບ, ອາຫານ ແລະ ເຄື່ອງດື່ມ, ເຄື່ອງເຟີນີເຈີ, ສິນຄ້າໂອດັອບ, ເຄື່ອງໃຊ້ການແພດ, ທາດເຄມີ, ຝຸ່ນ, ການຢາ, ເຄື່ອງອຸປະໂພກ-ບໍລິໂພກ ແລະ ອື່ນໆ.
 |
ທ່ານຮອງລັດຖະມົນຕີກະຊວງ ອຄ ກ່າວຕື່ມວ່າ: ງານວາງສະແດງໃນຄັ້ງນີ້, ຈະເປັນການປະ ກອບສ່ວນໃນການເພີ່ມມູນຄ່າການຄ້າ ແລະ ການລົງທຶນລະຫວ່າງສອງປະເທດເພື່ອໃຫ້ບັນລຸໄດ້ຕາມ ຈຸດປະສົງ ແລະ ເປົ້າໝາຍທີ່ທັງສອງລັດຖະບານໄດ້ວາງໄວ້. ການກໍານົດທິດທາງຂອງລັດຖະບານ 2 ປະເທດກໍຄືສອງກະຊວງ, ກະຊວງອຸດສາຫະກຳ ແລະ ການຄ້າລາວ ແລະ ຫວຽດນາມໄດ້ມີການຮ່ວມ ມືກັນດ້ານເສດຖະກິດ-ການຄ້າລະຫວ່າງສອງປະເທດໄດ້ມີການພັດທະນາ ແລະ ເຕີບໂຕຢ່າງແຂງ ແຮງ, ການແລກປ່ຽນການຄ້າມີການຂະຫຍາຍຕົວ, ການດຸ່ນດ່ຽງການຄ້ານໍາເຂົ້າ-ສົ່ງອອກຈຶ່ງສົມດູນ ກັນ ຊຶ່ງມູນຄ່າການຄ້າສອງຝ່າຍລາວ-ຫວຽດນາມໃນປີ 2025 ບັນລຸໄດ້ 2.98 ຕື້ໂດລາ, ເພີ່ມ 32.7% ທຽບໃສ່ປີ 2024. ໃນນັ້ນ, ມູນຄ່າການນໍາເຂົ້າສິນຄ້າຈາກຫວຽດນາມບັນລຸ 1.08 ຕື້ໂດລາ ເພີ່ມຂຶ້ນ 43.1% ທຽບໃສ່ປີຜ່ານມາ ແລະ ມູນຄ່າສົ່ງອອກໄປຫວຽດນາມຄາດວ່າຈະບັນລຸ 1.9 ຕື້ໂດລາ ເພີ່ມຂຶ້ນ 27.3%. ໃນ 5 ເດືອນຕົ້ນປີ 2026, ຍອດລວມມູນຄ່າການນຳເຂົ້າ-ສົ່ງອອກສິນ ຄ້າລາວ-ຫວຽດນາມ ບັນລຸປະມານ 1 ຕື້ໂດລາ ທຽບໃສ່ໄລຍະດຽວກັນປີ 2025 (1.56 ຕື້ໂດລາ). ໃນນັ້ນ, ລາວນໍາເຂົ້າສິນຄ້າຈາກຫວຽດນາມບັນລຸ 292 ລ້ານໂດລາ ແລະ ສົ່ງອອກສິນຄ້າ ໄປຫວຽດນາມບັນລຸ 783 ລ້ານໂດລາ. ພ້ອມນັ້ນ, ສອງຂະແໜງອຸດສາຫະກຳ ແລະ ການຄ້າສອງປະ ເທດກໍພວມສືບຕໍ່ເອົາໃຈໃສ່ປະສານສົມທົບກັນເປັນປົກກະຕິ ເພື່ອຈັດຕັ້ງບັນດາການເຄື່ອນໄຫວສົ່ງ ເສີມການຄ້າ, ເຊື່ອມຕໍ່ການຄ້າລະຫວ່າງລາວ ແລະ ຫວຽດນາມແນໃສ່ຊຸກຍູ້ສົ່ງເສີມເພີ່ມມູນຄ່າການ ຄ້າສອງຝ່າຍຫັນໄປສູ່ຄາດໝາຍໃຫ້ບັນລຸ 5 ຕື້ໂດລາໃນຕໍ່ໜ້າ ແລະ 10 ຕື້ໂດລາໃນປີ 2030 ຕາມການຕົກລົງຂອງສອງລັດຖະບານ.
(ຂ່າວ-ພາບ: ວັນເພັງ)
ຄໍາເຫັນ