ເປີດປ້າຍຈຸດຝຶກອົບຮົມຢູ່ລາວ ຂອງສະຖາບັນການຊ່າງແຂວງຢູນນານ

ໂດຍໃຫ້ກຽດເຂົ້າຮ່ວມ ຂອງ ທ່ານ ວິໄລ ວົງຂະເສີມ ຮອງປະທານສະຫະພັນສູນກາງກໍາມະບານລາວ, ທ່ານ ນາງ ໂຄຕະມີນ ພົງຍາລັກ ປະທານສະຫະພັນກຳມະບານນະຄອນຫຼວງວຽງຈັນ, ທ່ານ ລີສີ (Li Qi) ຮອງປະທານສະຫະພັນກຳມະບານແຂວງຢູນນານ, ທ່ານ ຫຼີວ ເວີນພິ້ງ（LIU WENPING）ປະທານກຳມະບານ ກຸ່ມບໍລິສັດ ລົງທຶນ ແລະ ກໍ່ສ້າງ ແຂວງຢູນນານ ຮຸ້ນສ່ວນ ຈຳກັດ, ມີຜູ້ຕາງໜ້າຈາກຄະນະກຳມະການຮ່ວມມືລາວ-ຈີນ, ຄະນະນຳກຳມະບານ, ຄູ-ອາຈານ ແລະ ນາຍຊ່າງຝີມືຈາກທັງສອງຝ່າຍເຂົ້າຮ່ວມ.

ໃນພິທີ, ທ່ານ ຫຼີວ ເວີນພິ້ງ ໄດ້ກ່າວເປີດ ແລະ ລາຍງານແຜນການຈັດຕັ້ງປະຕິບັດ ແລະ ຄວາມໝາຍຄວາມສຳຄັນ ໂດຍເນັ້ນວ່າ: ການສ້າງຕັ້ງຈຸດຝຶກອົບຮົມນີ້ເປັນບາດກ້າວຫັນປ່ຽນສຳຄັນຈາກການແລກປ່ຽນເປັນໄລຍະກ້າວໄປສູ່ການສ້າງສີມືແຮງງານຢ່າງເປັນປະຈຳ, ສູນນີ້ຈະຮັບໃຊ້ນິຄົມອຸດສາຫະກຳ ແລະ ຂະຫຍາຍການຮ່ວມມືໄປສູ່ເຂດລຸ່ມນ້ຳລ້ານຊ້າງ-ແມ່ນ້ຳຂອງຜ່ານ 4 ວຽກຫຼັກຄື: ການນໍາພາດ້ານແນວຄິດ, ການຝຶກອົບຮົມທັກສະ, ການຈັດການແຂ່ງຂັນສີມື ແລະ ການເບິ່ງແຍງຜູ້ອອກແຮງງານ, ໂດຍຕັ້ງເປົ້າສ້າງເປັນສະຖາບັນຊ່າງສີມືຢູ່ຕ່າງປະເທດທີ່ມີມາດຕະຖານພາຍໃນປີ 2030.

ຈາກນັ້ນ, ທ່ານນາງ ໂຄຕະມີນ ພົງຍາລັກ ໄດ້ກ່າວຕ້ອນຮັບ ແລະ ສະແດງຄວາມພາກພູມໃຈຕໍ່ການຮ່ວມມືພາຍໃຕ້ໂຄງການ“ໜຶ່ງແລວໜຶ່ງເສັ້ນທາງ” ຊຶ່ງປະຕິບັດຕາມທິດທາງການສ້າງຄູ່ຮ່ວມຊາຕາກຳລາວ-ຈີນ. ພ້ອມນີ້, ທ່ານໄດ້ຍົກໃຫ້ເຫັນຜົນງານການເຄື່ອນໄຫວຮ່ວມກັນແຕ່ປີ 2024-2025 ໃນການຍົກສູງທັກສະສີມືແຮງງານ ແລະ ການຈັດກິດຈະກຳຕ່າງໆເພື່ອເສີມສ້າງສາຍພົວພັນມິດຕະພາບຂອງທັງສອງຝ່າຍໃຫ້ແໜ້ນແກ່ນ.

ທ່ານ ລີສີ ໄດ້ກ່າວຊົມເຊີຍ ແລະ ຂອບໃຈສູນກາງສະຫະພັນກຳມະບານລາວ ແລະ ສະຫະພັນກຳມະບານ ນະຄອນຫຼວງວຽງຈັນ, ພ້ອມທັງເນັ້ນເຖິງຄວາມໝາຍສຳຄັນຂອງໂຄງການໃນການປະກອບສ່ວນສ້າງ "ໜຶ່ງແລວໜຶ່ງເສັ້ນທາງ". ທ່ານໄດ້ຢືນຢັນຄວາມພ້ອມຂອງສະຫະພັນກຳມະບານແຂວງຢູນນານໃນການສະໜັບສະໜູນດ້ານເຕັກນິກ, ວິຊາການ, ຫຼັກສູດ ແລະ ຄູ-ອາຈານຢ່າງເຕັມຮູບແບບເພື່ອໃຫ້ຈຸດຝຶກອົບຮົມດຳເນີນງານຢ່າງມີປະສິດທິພາບ ແລະ ເກີດປະໂຫຍດສູງສຸດ.