ທ່ານ ບຸນແຝງ ພູມມະໄລສິດ ກ່າວວ່າ: ກອງປະຊຸມຄັ້ງນີ້ ເປັນຂີດໝາຍອັນໜຶ່ງໃນການລິເລີ່ມການປະ ກາດໃຫ້ສັງຄົມຮັບຊາບກ່ຽວກັບສະມາຄົມວິຊາຊີບການຢາ ຄໍາວ່າ: ວິຊາຊີບທາງດ້ານການຢາ ແມ່ນການນໍາໃຊ້ຫຼັກການວິຊາສະເພາະເພສັຊກອນ ຫຼື ການຢາເຂົ້າໃນການລ້ຽງຊີບ, ເຂົ້າໃນການດຳເນີນການເຄື່ອນໄຫວໃນວຽກງານປະຈໍາວັນບໍ່ວ່າໃນຂົງເຂດລັດ ແລະ ເອກະຊົນ ຊຶ່ງປະກອບມີ: ຜູ້ທີ່ເຮັດບົດບາດໃນການຄຸ້ມຄອງດ້ານການຢາ, ຜູ້ເຮັດການດຳເນີນການຕິດຕາມກວດກາ, ຜູ້ເຮັດການສິດສອນວິຊາການຢາ, ຜູ້ເຮັດການນໍາໃຊ້ຢາຕາມສະຖານທີ່ບໍລິການສາທາລະນະສຸກແຫ່ງຕ່າງໆ ຫຼື ຜູ້ເຮັດທຸລະກິດທັງພາກລັດ ແລະ ເອກະຊົນ ນັບແຕ່ຂອດການຜະລິດ, ນໍາເຂົ້າ, ຈໍາໜ່າຍ-ຂາຍ ແລະ ນໍາໃຊ້. ວິຊາຊີບເພສັຊກອນ ມີການກຳເນີດເກີດຂຶ້ນມາແຕ່ບໍ່ມີການຮ່ວມກັນ, ບໍ່ມີການຕິດຕາມຊຸກຍູ້ຊ່ວຍເຫຼືອລົງເລິກ ສົ່ງເສີມນໍາໃຊ້ຫຼັກການວິຊາຊີບຢ່າງເລິກເຊິ່ງ ເມື່ອທຽບກັບຂະແໜງການແພດອື່ນໆເຊັ່ນ: ວຽກງານວິຊາການທາງການແພດຈະມີສະມາຄົມວາງຢາສະລົບ, ສະມາຄົມຜ່າຕັດຜ່ານທໍ່, ສະມາຄົມປິ່ນປົວພະຍາດພາຍໃນ, ເບົາຫວານ, ກະເພາະ ສ່ວນວິຊາຊີບທາງດ້ານການຢາ ກໍມີພຽງການຢາໂຮງໝໍທີ່ຮັບຮູ້ພຽງຈັດຫາຢາຊື້ຢາ, ຮັກສາຢາ, ຈ່າຍຢາ ເຮັດໃຫ້ບົດບາດການນໍາໃຊ້ວິຊາການທາງການຢາບໍ່ທັນເລິກເຊິ່ງເມື່ອທຽບກັບບັນດາປະເທດທີ່ພັດທະນາແລ້ວ. ບັນຫາທີ່ພວກເຮົາພົບໃນປັດຈຸບັນ ກໍຄືສະພາບການສະໜອງຢາ, ການຈໍລະຈອນນໍາໃຊ້ ຍັງຂາດວິຊາການນໍາພາ ສ່ວນຫຼາຍແມ່ນເຮັດໄປຕາມຜົນປະໂຫຍດ, ການສ້າງລາຍຮັບກໍາໄລເປັນຫຼັກ ແຕ່ບໍ່ຄໍານຶງເຖິງການໃຊ້ວິຊາການ ເຮັດໃຫ້ເກີດມີຜົນສະທ້ອນ ແລະ ບັນຫາຫຼາຍຢ່າງຕາມມາ. ດັ່ງນັ້ນ, ຈຶ່ງໄດ້ສ້າງເປັນກຸ່ມວິຊາການ ຍັງສາມາດຍົກລະດັບການເຄື່ອນໄຫວຂອງຜູ້ປະກອບການໃຫ້ເຕີບໃຫຍ່ຈາກການຊ່ວຍເຫຼືອຊຶ່ງກັນ ແລະ ກັນທາງດ້ານວິຊາການຊ່ວຍຈໍາກັດບັນຫາສິ່ງຫຍໍ້ທໍ້ໃນການດຳເນີນການກະທຳທີ່ບໍ່ສອດຄ່ອງກັບລະບຽບວິຊາສະ ເພາະ ເປັນການປະກອບສ່ວນເຮັດໃຫ້ການພັດທະນາຂະແໜງສາທາລະນະສຸກເຕີບໃຫຍ່ ແລະ ເຂັ້ມແຂງ.
ຈາກນັ້ນ, ທ່ານ ສຸລິສັກ ສູນວໍລະວົງ ປະທານສະມາຄົມເພສັຊກອນລາວ ຮອງຫົວໜ້າກົມອາຫານ ແລະ ຢາໄດ້ຂຶ້ນລາຍງານວຽກງານການຈັດຕັ້ງປະຕິບັດ ແລະ ທິດທາງແຜນການໃນຕໍ່ໜ້າຕື່ມອີກ.
(ຂ່າວ: ວັນເພັງ, ພາບ: ກະຊວງສາທາລະນະສຸກ)
ຄໍາເຫັນ