 |
ພິທີດັ່ງກ່າວ, ໄດ້ຈັດຂຶ້ນໃນວັນທີ 4 ຕຸລາຜ່ານມາທີ່ສາງນໍ້າມັນນາທອງ ເມືອງຊໍາເໜືອ ແຂວງຫົວພັນ ໂດຍມີທ່ານ ຄໍາແພງ ໄຊສົມແພງ ເຈົ້າແຂວງຫົວພັນ, ທ່ານ ບຸນຍົກ ບຸດສະວົງ ຮອງຜູ້ອໍານວຍການລັດວິສາຫະກິດນໍ້າມັນເຊື້ອໄຟລາວ, ມີພະແນກການ, ຫ້ອງການ, ຄະນະກໍາມະການຄຸ້ມຄອງທຸລະກິດນໍ້າມັນເຊື້ອໄຟຂັ້ນແຂວງ ແລະ ພະນັກງານລັດຖະກອນທີ່ກ່ຽວຂ້ອງເຂົ້າຮ່ວມ.
ການນໍາເຂົ້ານໍ້າມັນຄັ້ງນີ້, ແມ່ນນໍາເຂົ້ານໍ້າມັນກາຊວນມາດຕະຖານຄຸນນະພາບ ຢູໂຣ 5 ຈໍານວນ 2,600 ກວ່າໂຕນ ຫຼື ປະມານ 3.2 ລ້ານລິດ. ນໍ້າມັນດັ່ງກ່າວ, ຖືກຂົນສົ່ງຜ່ານທາງເຮືອກໍາປັ່ນ ມາຂຶ້ນທີ່ທ່າເຮືອຫງີເຊີນ ແລະ ບັນຈຸຊົ່ວຄາວທີ່ສາງນໍ້າມັນແອັງຟາດ ແຂວງແທັງຮວ່າ ເປັນການຊົ່ວຄາວ. ສຳລັບການຂົນສົ່ງນໍ້າມັນ ຈາກສາງບັນຈຸຊົ່ວຄາວເຂົ້າສູ່ ສປປ ລາວ ໄດ້ແບ່ງອອກເປັນ 2 ເສັ້ນທາງຄື: ເສັ້ນທາງແຂວງຊຽງຂວາງ ຂົນສົ່ງຜ່ານດ່ານສາກົນນໍ້າກັ່ນ ແລະ ເສັ້ນທາງແຂວງຫົວພັນ ຂົນສົ່ງຜ່ານດ່ານສາກົນນໍ້າໂສຍ ແລະ ບັນຈຸຢ່າງຖາວອນທີ່ສາງນໍ້າມັນບ້ານນາທອງ ເມືອງຊໍາເໜືອ. ໂຄງການນໍາເຂົ້ານໍ້າມັນເສັ້ນທາງໃໝ່ນີ້ ມີຈຸດປະສົງເພື່ອຮອງຮັບການພັດທະນາເສດຖະກິດ, ຕອບສະໜອງຄວາມຕ້ອງການດ້ານພະລັງງານ ຂອງພາກອຸດສາຫະກໍາ ແລະ ໂຄງລ່າງພື້ນຖານທີ່ກໍາລັງຂະຫຍາຍຕົວ,ສ້າງຄວາມໝັ້ນຄົງດ້ານພະລັງງານ ເພີ່ມທາງເລືອກໃນການນໍາເຂົ້ານໍ້າມັນເຊື້ອໄຟທີ່ມີຄຸນນະພາບ,ຕອບສະໜອງຄວາມຕ້ອງການປະຊາຊົນ ຮັບປະກັນການສະໜອງນໍ້າມັນໃຫ້ພຽງພໍ ແກ່ປະຊາຊົນໃນພາກເໜືອ,ເສີມສ້າງການຮ່ວມມື ລາວ-ຫວຽດ ສະແດງເຖິງຄວາມສໍາພັນອັນດີງາມລະຫວ່າງສອງປະເທດ ໂດຍສະເພາະ ແຂວງຫົວພັນ ແລະ ແຂວງແທັງຮວ່າ ໃຫ້ນັບມື້ກ້າວເຂົ້າສູ່ລວງເລິກ ແລະ ງອກງາມຍິ່ງຂຶ້ນ.
 |
ການນໍາເຂົ້ານໍ້າມັນຜ່ານເສັ້ນທາງສາຍນີ້, ໄດ້ຜ່ານການກະກຽມມາຢ່າງລະອຽດ ໂດຍລັດວິສາຫະກິດນໍ້າມັນເຊື້ອໄຟລາວ ໄດ້ສົມທົບກັບພາກສ່ວນທີ່ກ່ຽວຂ້ອງຂັ້ນແຂວງ ດໍາເນີນການຄົ້ນຄວ້າ ແລະ ສໍາຫຼວດແຫຼ່ງພະລັງງານນໍ້າມັນເຊື້ອໄຟທີ່ມີຄຸນນະພາບ ເພື່ອຮັບປະກັນການຕອບສະໜອງທີ່ມີປະສິດທິພາບສູງສຸດ, ຊຶ່ງຖືເປັນບາດກ້າວສໍາຄັນ ໃນການສ້າງຄວາມໝັ້ນຄົງ ດ້ານພະລັງງານ ໃຫ້ແກ່ປະເທດ ແລະ ເສີມສ້າງຄວາມເຂັ້ມແຂງຂອງຄວາມສໍາພັນມິດຕະພາບ ລະຫວ່າງລາວ-ຫວຽດນາມ ໃຫ້ຂະນົງແກ່ນຍິ່ງຂຶ້ນ.
(ແຫຼ່ງຂ່າວ: ຈາກແຂວງຫົວພັນ)
ຄໍາເຫັນ