 |
ທ່ານ ສົມໝາຍ ແກ້ວມະນີ ຮອງຫົວໜ້າພະແນກສາທາລະນະສຸກແຂວງ ໄດ້ລາຍງານໃຫ້ຮູ້ວ່າ: ໃນ 6 ເດືອນຕົ້ນປີ 2026 ໄດ້ສຳເລັດການຈັດຕັ້ງປະຕິບັດ ວສຊ ຢອດຢາໂປລີໂອແຫ່ງຊາດໃນ 8 ເມືອງທົ່ວແຂວງສາລະວັນ 2 ຮອບ ສາມາດບັນລຸໄດ້ 100%; ສຳເລັດການຈັດງານສະເຫຼີມສະຫຼອງວັນສາທາລະນະສຸກ ຄົບ ຮອບ 61 ປີ ແລະ ວັນບໍລິຈາກເລືອດໂລກ ຄົບຮອບ 22 ປີ; ເຝົ້າລະວັງ ແລະ ຄວບຄຸມພະຍາດໄຂ້ຍຸງລາຍບໍ່ມີການລະບາດຮຸນແຮງ ມາຮອດປັດຈຸບັນມີພຽງແຕ່ 205 ກໍລະນີ (ເປັນແບບກະແຈກກະຈາຍ ແຕ່ບໍ່ມີຜູ້ເສຍຊີວິດ); ສຳເລັດການສ້າງຂະບວນການ ທຳລາຍແຫຼ່ງເພາະພັນໜອນນໍ້າຍຸງລາຍໃນ 5 ບ້ານເທສະບານ ເມືອງສາລະວັນ; ສຳເລັດການເປີດນຳໃຊ້ໂຮງຮຽນສາທາລະນະສຸກ ທີ່ໄດ້ຮັບການຊ່ວຍເຫຼືອຈາກແຂວງຢາລາຍ ສສ ຫວຽດນາມ ໃນມູນຄ່າ 15 ຕື້ດົງ; ສຳເລັດກອງປະຊຸມພົບປະແລກປ່ຽນບົດຮຽນ ລະຫວ່າງພະແນກສາທາລະນະສຸກແຂວງສາລະວັນ ກັບ ພະແນກສາທາລະນະສຸກແຂວງກວາງຈິ ສສ ຫວຽດນາມ; ໄດ້ຮັບທຶນກໍ່ສ້າງສຸກສາລາບ້ານປົ່ງ ເມືອງຄົງເຊໂດນ ມູນຄ່າ 49 ພັນກວ່າໂດລາ ໂດຍພາຍໃຕ້ໂຄງການແມ່ນໍ້າຂອງແມ່ນໍ້າຄົງຄາ ຈາກສະຖານທູດອິນເດຍ ແລະ ໄດ້ຮັບທຶນກໍ່ສ້າງສຸກສາລາບ້ານທ່າຄັນຊຸມຊົວ ເມືອງລະຄອນເພັງ 86 ພັນກວ່າໂດລາ ຈາກສະ ຖານທູດຍີ່ປຸ່ນ; ຮ່ວມກອງປະຊຸມສະຫຼຸບການດຳເນີນງານ ພັດທະນາຄວາມຮ່ວມມືທາງດ້ານສາທາລະນະສຸກ ແລະ ສຸຂະພາບປະຊາກອນຊາຍແດນ ແລະ ການລົງນາມ MOU; ສຳເລັດການປິດໂຄງການ JSI ແລະ ມອບຮັບລົດຈຳນວນ 2 ຄັນ ແລະ ໄດ້ຮັບລົດຊ່ວຍເຫຼືອຄົນເຈັບ (ລົດອຳບູລັງ) ຈາກກະຊວງສາທາລະນະສຸກ ຊຶ່ງໄດ້ຮັບການຊ່ວຍເຫຼືອຈາກ ສ.ເກົາລີ ມອບໃຫ້ໂຮງໝໍແຂວງສາລະວັນ.
ກອງປະຊຸມຍັງໄດ້ຮັບຟັງການລາຍງານ ຜົນການຈັດຕັ້ງປະຕິບັດວຽກງານສຸກສາລາປະຈຸດອນ ປີ 2025 ເມືອງຕະໂອ້ຍ, ພ້ອມທັງຜ່ານແຜນການປັບປຸງໂຮມ, ສ້າງໃໝ່ ແລະ ຍຸບສຸກສາລາ ເພື່ອຫັນໄປສູ່ການປັບປຸງເປັນໂຮງໝໍຕາແສງໃນອະນາຄົດ. ຕອນທ້າຍກອງປະຊຸມ ຜູ້ເຂົ້າຮ່ວມໄດ້ປະກອບຄໍາເຫັນ ແລະ ເປັນເອກະພາບ ເພື່ອຊອກຫາວິທີທາງແກ້ໄຂຂໍ້ຄົງຄ້າງ, ສົ່ງເສີມດ້ານດີ ແລະ ວາງທິດທາງ 6 ເດືອນທ້າຍປີ 2026 ໃຫ້ບັນລຸຕາມຄາດໝາຍທີ່ກຳນົດໄວ້. ພາບ-ຂ່າວ: ສ.ພະຈັນ
ຄໍາເຫັນ