ເພີ່ມທະວີການເຊື່ອມຈອດ ແລະ ຄວາມເຂັ້ມແຂງ ເພື່ອການພັດທະນາແບບຍືນຍົງຂອງນະຄອນອາຊຽນ

 ເຈົ້າຄອງນະຄອນຫຼວງວຽງຈັນ, ມີ ທ່ານ ນາງ ເບີນາເດຍ ອີຣາວາຕີ ຈັນດຣາເດວີ ເລຂາທິການອົງການຕົວເມືອງ ແລະ ການປົກຄອງທ້ອງຖິ່ນອາຊີ-ປາຊີຟິກ, ມີບັນດາເຈົ້າຄອງ-ຮອງເຈົ້າຄອງນະຄອນຫຼວງອາຊຽນ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ອາດສະພັງທອງ ສີພັນດອນ ກ່າວວ່າ: ເປັນເວລາກວ່າ 57 ປີ ທີ່ປະຊາຄົມອາຊຽນ ໄດ້ກຳເນີດຂຶ້ນ ແລະ ມີການຂະຫຍາຍຕົວເປັນແຕ່ລະໄລຍະ. ປະຊາຄົມອາຊຽນມີພື້ນທີ່ເຖິງ 4.800.000 ກິໂລຕາແມັດ (ກມ2), ມີປະຊາກອນຫຼາຍກວ່າ 679 ລ້ານກວ່າຄົນ, ກວມ 8% ຂອງປະຊາກອນໂລກ ຊຶ່ງຖືວ່າປະຊາຄົມອາຊຽນ ເປັນຊຸມຊົນທີ່ໃຫຍ່ຂອງໂລກ ດ້ວຍສະພາບພູມສັນຖານ, ທ່າແຮງ ແລະ ນະວັດຕະກຳໃໝ່ໆ ໄດ້ເຮັດໃຫ້ບັນດານະຄອນ ຫຼື ປະເທດອາຊຽນ ສາມາດເຊື່ອມຈອດກັນໄດ້ງ່າຍຂຶ້ນ ເປັນຕົ້ນການເຊື່ອມຈອດດ້ານພື້ນຖານໂຄງລ່າງຄົມມະນາຄົມ, ເຊື່ອມຈອດດ້ວຍການສ້າງຄວາມຮັບຮູ້ ຫຼື ລະບຽບການ ແລະ ການເຊື່ອມຈອດທາງດ້ານວັດທະນະທໍາ-ສັງຄົມ. ສຳລັບການເຊື່ອມຈອດດ້ານພື້ນຖານໂຄງລ່າງຄົມມະນາຄົມ: ອີງໃສ່ສະພາບທາງພູມສັນຖານ ແລະ ຄວາມກ້າວໜ້າທາງດ້ານເຕັກໂນໂລຊີ ເຮັດໃຫ້ສາມາດສ້າງເສັ້ນທາງຄົມມະນາຄົມເຊື່ອມກັນ ໄດ້ຫຼາຍທາງຄື: ທາງບົກ, ທາງນໍ້າ ແລະ ທາງອາກາດ; ບັນດານະຄອນອາຊຽນ ສາມາດນໍາໃຊ້ ແລະ ເຊື່ອມຕໍ່ເສັ້ນທາງເຫຼົ່ານັ້ນ ເພື່ອໄປມາຫາສູ່ ແລະ ຕິດຕໍ່ພົວພັນ. ປັດຈຸບັນ ນວ ກໍມີທ່າແຮງ ເພື່ອເຊື່ອມຈອດກັບຫຼາຍນະຄອນ; ໃນນັ້ນ, ສໍາລັບທາງອາກາດ ກໍມີສາຍການບິນໂດຍກົງກັບຫຼາຍນະຄອນໃນປະຊາຄົມອາຊຽນຄື: ວຽງຈັນ-ບາງກອກ, ວຽງຈັນ-ຮ່າໂນ້ຍ, ວຽງຈັນ-ພະນົມເປັນ, ວຽງຈັນ-ສິງກະໂປ ແລະ ວຽງຈັນ-ກົວລາລຳເປີ ແລະ ໄດ້ພະຍາຍາມຊຸກຍູ້ໃຫ້ລັດຖະບານ ໄດ້ອະນຸມັດເປີດສາຍການບິນໂດຍກົງກັບອີກຫຼາຍໆນະຄອນຕື່ມອີກ. ຫຼາຍນະຄອນໃນປະຊາຄົມອາຊຽນ ມີເສັ້ນທາງລົດໄຟ. ສໍາລັບ ນວ ກໍມີເສັ້ນທາງລົດໄຟ ຈາກ ນວ ຫາຊາຍແດນລາວ-ຈີນ ແລະ ລົດໄຟຈາກ ນວ-ແຂວງໜອງຄາຍ ແລະ ຕໍ່ໄປຫາກຸງເທບມະຫານະຄອນ (ລາຊະອານາຈັກໄທ) ແລະ ປັດຈຸບັນ ກຳລັງສໍາຫຼວດເສັ້ນທາງລົດໄຟ ແລະ ທາງດ່ວນ ເພື່ອເຊື່ອມໄປຫາຊາຍແດນລາວ-ຫວຽດນາມ ແລະ ທາງທິດໃຕ້ຊາຍແດນລາວ-ກຳປູເຈຍ. ສໍາລັບການຄົມມະນາຄົມທາງນໍ້າ ນວ ມີແມ່ນໍ້າຂອງທີ່ຜ່ານຫຼາຍປະເທດ ຊຶ່ງກໍສາມາດໃຊ້ແມ່ນໍ້າຂອງໃນການຄົມມະນາຄົມ.
ການເຊື່ອມຈອດດ້ານຄວາມຮັບຮູ້, ມີນິຕິກຳ ຫຼື ລະບຽບຮ່ວມກັນ. ໃນນີ້, ດ້ານຄວາມຮັບຮູ້ດ້ານຄວາມເຂົ້າໃຈ ຮຽກກັນວ່າ ເປັນປະເທດອາຊຽນ ນະຄອນອາຊຽນ ກໍໄດ້ເປັນພື້ນຖານຂອງການເຊື່ອມຈອດ ຄວາມເປັນອັນດຽວກັນໃນລະດັບໜຶ່ງ. ນອກນັ້ນ, ຜ່ານມາບັນດານະຄອນອາຊຽນ ໄດ້ມີຖະແຫຼງການຮ່ວມກັນຫຼາຍຄັ້ງ ເພື່ອເປັນພື້ນຖານໃຫ້ແກ່ການຈັດຕັ້ງປະຕິບັດຮ່ວມກັນ. ໃນຕໍ່ໜ້າບັນດານະຄອນອາດຄົ້ນຄວ້າ ເພື່ອນໍາສະເໜີຕໍ່ລັດຖະບານ ແຕ່ລະປະເທດປຶກສາຫາລື ໃນການສ້າງໃຫ້ມີລະບຽບການນໍາໃຊ້ວີຊ່າດຽວ ຊຶ່ງໝາຍວ່າການອອກວີຊ່າໃຫ້ແກ່ນັກທ່ອງທ່ຽວ ຫຼື ການອອກວີຊ່າສໍາລັບແຮງງານ ແມ່ນສາມາດອອກໃຫ້ຢູ່ປະເທດໃດໜຶ່ງ ຂອງປະເທດສະມາຊິກອາຊຽນ ແລ້ວສາມາດນໍາໃຊ້ເຄື່ອນໄຫວໄດ້ໃນບັນດາປະເທດສະມາ ຊິກອາຊຽນດ້ວຍກັນ. ການເຊື່ອມຈອດທາງດ້ານວັດທະນະທຳ-ສັງຄົມ: ບັນດານະຄອນອາຊຽນ ມີພົນ ລະເມືອງຫຼາຍ, ມີຄວາມແຕກຕ່າງທາງດ້ານວັດທະນະທຳ, ປະຊາຊົນໃນບັນດານະຄອນອາຊຽນ ສາມາດໄປມາຫາສູ່ ເພື່ອແລກປ່ຽນວັດທະນະທຳ ແລະ ການທ່ອງທ່ຽວ ລະຫວ່າງກັນໄດ້, ໃນ ນວ ກໍມີຫຼາຍເຜົ່າອາໄສຢູ່ເຊັ່ນ: ເຜົ່າລາວ, ເຜົ່າມົ້ງ, ເຜົ່າກຶມມຸ... ຊຶ່ງເຮັດໃຫ້ມີຄວາມຫຼາກຫຼາຍ ດ້ານວັດທະນະທຳ ແລະ ຫວັງວ່າບັນດານະຄອນອາຊຽນຈະຊຸກຍູ້ສົ່ງເສີມ ໃຫ້ປະຊາກອນມີການໄປມາ-ຫາສູ່ ເພື່ອແລກປ່ຽນດ້ານວັດທະນະທຳ ແລະ ການທ່ອງທ່ຽວ ລະຫວ່າງກັນ, ພວກເຮົາຈະກ້າວໄປສູ່ການເປັນຊຸມຊົນໜຶ່ງ ທີ່ມີວັດທະນະທຳທີ່ອຸດົມສົມບູນ ແລະ ງົດງາມ ໃນແບບວິຖີຂອງຊາວອາຊຽນ.
ທ່ານ ອາດສະພັງທອງ ສີພັນດອນ ຍັງກ່າວຕື່ມວ່າ: ນະຄອນຫຼວງວຽງຈັນ ກໍຄືກັບບັນດານະຄອນອື່ນໆ ຢູ່ໃນອາຊຽນ ທີ່ມີການຂະຫຍາຍຕົວເມືອງຢ່າງໄວວາ, ການຫຼັ່ງໄຫຼ ເຂົ້າມາອາໄສຢູ່ໃນຕົວເມືອງ ເຮັດໃຫ້ການຈັດສັນ, ການນໍາໃຊ້ຊັບພະຍາກອນ, ການສັນຈອນມີຄວາມທ້າທາຍ. ລັດຖະບານ ກໍຄື ນວ ໄດ້ກຳນົດແຈ້ງກ່ຽວກັບນະໂຍບາຍພັດທະນາ ນວ. ໃນນັ້ນ, ນະໂຍບາຍທີ່ສໍາຄັນກ່ຽວກັບການພັດທະນາຕົວເມືອງ ແມ່ນນະໂຍບາຍ 6 ສ ຄື: ສະອາດ, ສະຫງົບ, ສີຂຽວ, ສະຫວ່າງ, ສີວິໄລ ແລະ ສະເໜ່. ພວກເຮົາພັດທະນາຕົວເມືອງ ໄປຕາມແຜນຂະຫຍາຍຜັງເມືອງ ຊຶ່ງປັດຈຸບັນສະພາປະຊາຊົນ ນວ ແລະ ກະຊວງໂຍທາທິການ ແລະ ຂົນສົ່ງ ໄດ້ຮັບຮອງແຜນຜັນຂະຫຍາຍຜັງເມືອງສະບັບທີ 3 (ປີ2024 –2030). ພ້ອມນີ້, ພວກເຮົາພັດທະນາ ຕົວເມືອງໄປຕາມທິດສີຂຽວ ໄປຕາມແຜນຈັດຕັ້ງປະຕິບັດຕົວເມືອງສີຂຽວ ຂອງ ນວ (2023–2030). ຈາກການເຊື່ອມຈອດ ຂອງບັນດານະຄອນອາຊຽນ ໃນ 3 ດ້ານ, ຈະເຮັດໃຫ້ສາມາດ ກ້າວໄປສູ່ການແກ້ໄຂບັນຫາຄວາມຫຍຸ້ງຍາກ ທີ່ບັນດານະຄອນອາຊຽນພວມປະເຊີນຢູ່ ເປັນຕົ້ນບັນຫາເສດຖະກິດ, ສິ່ງແວດລ້ອມ, ການປ່ຽນແປງດິນຟ້າອາກາດ-ໄພພິບັດ, ບັນຫາຄວາມທຸກຍາກຂອງປະຊາຊົນ, ບັນຫາການຂະຫຍາຍຕົວຂອງເມືອງ ແລະ ບັນຫາອື່ນໆ ແລະ ຫວັງວ່າ ໃນອະນາຄົດ ໂດຍຜ່ານການເຊື່ອມໂຍງ-ເຊື່ອມຈອດເຫຼົ່ານີ້ ຈະເຮັດໃຫ້ກ້າວໄປສູ່ການເປັນອັນໜຶ່ງອັນດຽວກັນ ແລະ ໃນຖານະນະຄອນຫຼວງຂອງປະເທດອາຊຽນ ຈະຊຸກຍູ້ສົ່ງເສີມໃຫ້ເກີດການເຊື່ອມໂຍງ-ເຊື່ອມຈອດ ໃນບັນດານະຄອນອາຊຽນ ເພື່ອພວກເຮົາຈະກ້າວໄປສູ່ການເປັນຕົວເມືອງພັດທະນາ ທີ່ຍືນຍົງຮ່ວມກັນ.
(ຂ່າວ: ວັນເພັງ - ພາບ: ສຸກສະຫວັນ)