ທ່ານ ຈະເລີນ ເຢຍປາວເຮີ ຮອງປະທານສະພາແຫ່ງຊາດຕາງໜ້າຄະນະຮັບຜິດຊອບຄົ້ນຄວ້າ ແລະ ຮຽບຮຽງປະຫວັດສາດຂອງສະພາແຫ່ງຊາດຂຶ້ນເຜີຍແຜ່ມະຕິ 26/ກມສພ ຊຶ່ງໄດ້ໃຫ້ຮູ້ວ່າ: ການອອກມະຕິດັ່ງກ່ວານີ້, ກໍເພື່ອເຮັດໃຫ້ການເລືອກຕັ້ງ ສສຊຊຸດທີ X ແລະ ສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ V ດໍາເນີນໄປຢ່າງຖືກຕ້ອງຕາມແນວທາງປ່ຽນແປງໃໝ່ ຂອງພັກເຮົາ ແລະ ໄດ້ຮັບຜົນສໍາເລັດຢ່າງສະຫງ່າງາມ.
ພ້ອມດຽວກັນນີ້, ກໍໄດ້ໃຫ້ຮູ້ກ່ຽວກັບຄວາມສໍາຄັນ ແລະ ຄວາມຈໍາເປັນໃນການເພີ່ມທະວີການນໍາພາ-ຊີ້ນໍາ ຂອງອົງຄະນະພັກທຸດຂັ້ນ ຕໍ່ການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ວ່າ: ການເລືອກຕັ້ງ ສສຊ ແລະ ສສຂ ແຕ່ລະເທື່ອ, ລ້ວນເປັນເຫດການທາງປະຫວັດສາດທີ່ສໍາຄັນ ຂອງຊາດ, ມີຄວາມໝາຍສໍາຄັນ ແລະ ຈຳເປັນໃນການເສີມຂະຫຍາຍສິດ ປະຊາທິປະໄຕ ຂອງປະຊາຊົນລາວບັນດາເຜົ່າ ເພື່ອບູລະນະລະບອບປະຊາທິປະໄຕປະຊາຊົນ, ປັບປຸງລະບົບອໍານາດແຫ່ງລັດ ໃຫ້ມີຄວາມເຂັ້ມແຂງ, ການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V (2026-2030) ເປັນເຫດການການເມືອງທີ່ສໍາຄັນຍິ່ງ ຂອງຊາດ ຊຶ່ງດໍາເນີນໃນບັນຍາກາດທີ່ທົ່ວພັກ, ທົ່ວລັດ, ກຳລັງປະກອບອາວຸດ ແລະ ທົ່ວປວງຊົນ ລາວທັງຊາດ ສະເຫຼີມສະຫຼອງ 3 ວັນປະຫວັດສາດ ທີ່ຍິ່ງໃຫຍ່ຂອງຊາດ ແລະ ໃນບັນຍາກາດທີ່ອົງຄະນະພັກ ຂັ້ນຕ່າງໆ ໄດ້ສໍາເລັດການດໍາເນີນກອງປະຊຸມໃຫຍ່ຂັ້ນຮາກຖານ, ຂັ້ນເມືອງ, ກະຊວງ, ອົງການ, ນະຄອນຫຼວງ, ແຂວງ ແລະ ກອງປະຊຸມໃຫຍ່ ຄັ້ງທີ XII ຂອງພັກປະຊາຊົນປະຕິວັດລາວ, ພ້ອມກັບການປັບປຸງກົງຈັກການຈັດຕັ້ງ ບໍລິຫານປົກຄອງຂັ້ນລັດຖະບານ ແລະ ຂັ້ນທ້ອງຖິ່ນ ຢ່າງລຸ້ນຂ້ຽວ (ທັງຍຸບ, ທັງໂຮມ, ທັງສ້າງຕັ້ງຂຶ້ນໃໝ່ ຄື: ຄະນະກຳມະການປົກຄອງຕາແສງ) ແລະ ໃນທ່າມກາງທີ່ສະພາບການຂອງໂລກ ແລະ ພາກພື້ນພວມຜັນແປໄປຢ່າງສັບສົນ, ຄາດຄະເນໄດ້ຍາກ ຊຶ່ງມີທັງຂໍ້ສະດວກ ແລະ ສິ່ງທ້າທາຍ ຕໍ່ພາລະກິດປົກປັກຮັກສາ ແລະ ພັດທະນາປະເທດຊາດ, ຄຽງຄູ່ກັບຜົນສໍາເລັດອັນໃຫຍ່ຫຼວງຫຼາຍດ້ານ ໃນການປະຕິບັດແນວທາງປ່ຽນແປງໃໝ່ຂອງພັກນັ້ນ ຢູ່ພາຍໃນປະເທດພວກເຮົາ ຍັງປະເຊີນໜ້າກັບສິ່ງທ້າທາຍ ແລະ ຂໍ້ຫຍຸ້ງຍາກຫຼາຍຢ່າງ ເປັນຕົ້ນຄວາມຫຍຸ້ງຍາກທາງດ້ານເສດຖະກິດ-ການເງິນ ທີ່ແກ່ຍາວມາຫຼາຍປີ ແລະ ອິດທິກຳລັງປໍລະປັກ ກໍຍັງສືບຕໍ່ກົນອຸບາຍ ມ້າງເພທໍາລາຍລະບອບໃໝ່ ຂອງພວກເຮົາ ຢ່າງບໍ່ລົດລະ.
ທ່ານ ຈະເລີນ ເຢຍປາວເຮີ ຍັງກ່າວໃຫ້ຮູ້ແີກວ່າ: ອີກປະການໜຶ່ງ, ການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ຈະມີພະນັກງານນໍາພາ-ຄຸ້ມຄອງຂັ້ນສູງຂອງພັກ ແລະ ລັດ ມີຈໍານວນທີ່ເພີ່ມຂຶ້ນ ອອກສະໝັກຮັບເລືອກຕັ້ງເປັນ ສສຊ ແລະ ສສຂ. ນອກນັ້ນ, ຍັງຈະມີຜູ້ສະໝັກຈາກຂົງເຂດຕ່າງໆ ຢູ່ສູນກາງ ແລະ ທ້ອງຖິ່ນ; ໃນນັ້ນ, ມີທັງຂົງເຂດທຸລະກິດ, ການຜະລິດ, ຊັ້ນຄົນ ແລະ ປັນຍາຊົນ ອີກຈໍານວນໜຶ່ງ. ສະນັ້ນ, ການເພີ່ມທະວີການນໍາພາ-ຊີ້ນໍາ ຢ່າງໃກ້ຊິດ, ຕິດແທດຕົວຈິງ ຂອງອົງຄະນະພັກທຸກຂັ້ນ ຕໍ່ການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ຈຶ່ງມີຄວາມສໍາຄັນ ແລະ ຈຳເປັນຢ່າງຍິ່ງ ເພື່ອເຮັດໃຫ້ການເລືອກຕັ້ງຄັ້ງນີ້ ບັນລຸຜົນສຳເລັດ ຕາມຈຸດປະສົງ ລະດັບຄາດໝາຍ.
(ຂ່າວ:ບຸນຕອມ, ພາບ: ເກດ)
ຄໍາເຫັນ