ພິທີສະເຫຼີມສະຫຼອງວັນສ້າງຕັ້ງກອງທັບປົດປ່ອຍປະຊາຊົນຈີນ ຄົບຮອບ 99 ປີ

ໃນພິທີ, ສະຫາຍ ພົນເອກ ຄໍາລຽງ ອຸທະໄກສອນ ໄດ້ກ່າວອວຍພອນ ແລະ ຕີລາຄາສູງຕໍ່ມູນເຊື້ອອັນສະຫງ່າລາສີ ຂອງກອງທັບປົດປ່ອຍປະຊາຊົນຈີນ, ພ້ອມທັງໄດ້ຍົກໃຫ້ເຫັນຄວາມໝາຍສຳຄັນ ຂອງສາຍພົວພັນ ລາວ-ຈີນ ວ່າ: ປີນີ້ແມ່ນປີຄົບຮອບແຫ່ງການສ້າງຕັ້ງສາຍພົວພັນການທູດ ລາວ-ຈີນ ຄົບຮອບ 65 ປີ ແລະ ເປັນປີມິດຕະພາບ ລາວ-ຈີນ. ພາຍໃຕ້ການຊີ້ນໍາຍຸດທະສາດ ຂອງຜູ້ນໍາສູງສຸດ ຂອງສອງພັກ, ສອງລັດ, ສາຍພົວພັນ ລາວ-ຈີນ ໄດ້ກ້າວເຂົ້າສູ່ຍຸກສະໄໝທີ່ດີທີ່ສຸດໃນປະຫວັດສາດ, ການຮ່ວມມືຕົວຈິງ ລະຫວ່າງ ສອງກອງທັບ ໃນຂົງເຂດວຽກງານການເມືອງ, ການຝຶກຊ້ອມຮົບຮ່ວມ ເຊັ່ນ: ລົດໄຟສັນຕິພາບ, ໂລ່ມິດຕະພາບ, ການແພດທະຫານ ແລະ ການບຳລຸງສ້າງ ໄດ້ຮັບຜົນງານອັນອຸດົມສົມບູນ ເປັນການປະກອບສ່ວນອັນສຳຄັນເຂົ້າໃນການສ້າງຄູ່ຮ່ວມຊາຕາກຳ ລາວ-ຈີນ ໃຫ້ມີຄວາມໝັ້ນຄົງໜຽວແໜ້ນ. ຈາກນັ້ນ, ສະຫາຍ ພັນເອກ ຫຼີປິ່ງ ຫົວໜ້າຫ້ອງການທີ່ປຶກສາທູດ ຝ່າຍປ້ອງກັນຊາດ ສປ ຈີນ ປະຈໍາ ສປປ ລາວ ໄດ້ສະແດງຄວາມຍິນດີຕ້ອນຮັບ ແລະ ຍົກໃຫ້ເຫັນຜົນງານປະຫວັດສາດອັນສະຫງ່າລາສີຕະຫຼອດ 99 ປີ ຂອງກອງທັບປົດປ່ອຍປະຊາຊົນຈີນ ທີ່ໄດ້ຢຶດໝັ້ນການນຳພາຂອງພັກ, ຜ່ານຜ່າທຸກຄວາມຫຍຸ້ງຍາກ ເພື່ອຄວາມເປັນເອກະລາດຂອງຊາດ ແລະ ປົກປ້ອງສັນຕິພາບໂລກ.

ພ້ອມທັງເນັ້ນວ່າ: ໃນການກ້າວເຂົ້າສູ່ຍຸກສະໄໝໃໝ່ ກອງທັບຈີນ ໄດ້ຢຶດໝັ້ນເອົາແນວຄິດສັງຄົມນິຍົມ ທີ່ມີສີສັນພິເສດຂອງຈີນ ໃນຍຸກສະໄໝໃໝ່ ຂອງທ່ານ ສີ ຈິ້ນຜິງ ເປັນເຂັມຊີ້ທິດ, ສຸມໃສ່ເພີ່ມທະວີການຝຶກຊ້ອມຮົບ ເພື່ອບັນລຸເປົ້າໝາຍຕໍ່ສູ້ໃນວາລະ ຄົບຮອບ 100 ປີ ຂອງການສ້າງກອງທັບ. ພ້ອມດຽວກັນນັ້ນ ປະເທດຈີນ ຢຶດໝັ້ນນະໂຍບາຍປ້ອງກັນຊາດແບບປ້ອງກັນຕົວ ແຕ່ເດັດດ່ຽວບໍ່ຖອຍຫຼັງໃນບັນຫາຜົນປະໂຫຍດຫຼັກແຫຼ່ງ, ໂດຍສະເພາະອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຈີນ ແລະ ກອງທັບຈີນ ຈະໃຊ້ທຸກມາດຕະການທີ່ຈຳເປັນ ເພື່ອປົກປ້ອງອະທິປະໄຕ ແລະ ຄວາມເປັນຈິດໜຶ່ງໃຈດຽວກັນຢ່າງໝັ້ນຄົງ. ໃນພິທີອັນຊົງກຽດທີ່ເຕັມໄປດ້ວຍໄມຕີຈິດມິດຕະພາບອັນອົບອຸ່ນ ແລະ ເລິກເຊິ່ງ, ບັນດາການນໍາ ແລະ ແຂກຖືກເຊີນທຸກທ່ານໄດ້ພ້ອມກັນອວຍພອນໃຫ້ແກ່ຄວາມວັດທະນາຖາວອນ ຂອງສອງປະເທດ ລາວ-ຈີນ, ອວຍພອນໃຫ້ສອງກອງທັບ ນັບມື້ເຕີບໃຫຍ່ເຂັ້ມແຂງ ແລະ ໃຫ້ສັນຕິພາບຈົ່ງເກີດມີຂຶ້ນໃຫ້ແກ່ພາກພື້ນ ແລະ ໃນໂລກ.

ຂ່າວ: ລຸນທອງ ສີບຸນເຮືອງ