ທ່ານ ສົມມາດ ພົນເສນາໄດ້ກ່າວວ່າ:ໃນວາລະທໍາອິດ, ກອງປະຊຸມໄດ້ພິຈາລະນາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ, ແຜນງົບປະມານແຫ່ງລັດ, ແຜນເງິນຕາ 5 ປີ ຄັ້ງທີ IX (2021-2025) ແລະ ປີ 2025 ແລະ ທິດທາງແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ X (2026-2030) ແລະແຜນປີ 2026 ສະເໜີໂດຍ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ແລະ ໃນວັນທີ 12 ພະຈິກ 2025 ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ໄດ້ລາຍງານສະຫຼຸບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ.
ຫຼັງຈາກນັ້ນ, ທ່ານ ສົມມາດ ພົນເສນາ ໄດ້ຕາງໜ້າຄະນະປະຈຳສະພາແຫ່ງຊາດ ໄດ້ສະເໜີບົດປະກອບຄວາມເຫັນຕໍ່ບົດລາຍງານຂອງລັດຖະບານ ທັງ 2 ສະບັບ ແລະ ບັນດາທ່ານສະມາຊິກສະພາແຫ່ງຊາດ(ສສຊ)ໃນຖານະທີ່ເປັນຕົວແທນແຫ່ງ ສິດ ແລະ ຜົນປະໂຫຍດ ຂອງປະຊາຊົນບັນດາເຜົ່າ ໄດ້ພ້ອມກັນຄົ້ນຄວ້າ ແລະ ປະກອບຄຳເຫັນຢ່າງກວ້າງຂວາງ, ເລິກເຊິ່ງ ແລະ ໄດ້ຊັກຖາມລັດຖະບານ, ຊຶ່ງສະມາຊິກລັດຖະບານ ກໍໄດ້ຊີ້ແຈງໃຫ້ຄວາມກະຈ່າງແຈ້ງ ຕໍ່ຄໍາຊັກຖາມ ແລະ ບັນຫາຕ່າງໆ ຢ່າງກົງໄປກົງມາ. ພິເສດກອງປະຊຸມ ຍັງໄດ້ຮັບຟັງການອະທິບາຍຊີ້ແຈງຂອງທ່ານ ນາຍົກລັດຖະມົນຕີ ແລະ ທ່ານປະທານສະພາແຫ່ງຊາດ ກໍໄດ້ມີຄໍາເຫັນສະຫຼຸບສັງລວມ, ຊຶ່ງສັງລວມຫຍໍ້ໃຫ້ບັນດາທ່ານຊາບດັ່ງນີ້:
ກອງປະຊຸມສະແດງຄວາມຊົມເຊີຍແລະເຫັນດີເປັນເອກະພາບ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ, ແຜນເງິນຕາ 5 ປີ ຄັ້ງທີ IX (2021-2025) ແລະ ແຜນປີ 2025 ແລະ ທິດທາງແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ X (2026-2030) ແລະແຜນປີ 2026 ແລະ ການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນໃນກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດຊຸດທີ IXຂອງລັດຖະບານ ສະແດງອອກ ໃນຜົນງານທີ່ຍາດມາໄດ້ ເປັນຕົ້ນ ອັດຕາການເຕີບໂຕເສດຖະກິດ (GDP)ໄລຍະ 5 ປີ (2021-2025) ຂະຫຍາຍຕົວ 4.24%, ສໍາລັບປີ 2025 ຄາດວ່າຈະຂະຫຍາຍຕົວໃນລະດັບ 4.8%,ບາງຂະແໜງການຈະສາມາດປະຕິບັດໄດ້ຕາມຄາດໝາຍ ເປັນຕົ້ນ ຂະແໜງ ກະສິກໍາ ແລະ ອຸດສາຫະກໍາ, ການເກັບລາຍຮັບໄດ້ເກີນແຜນ, ການຄ້າຕ່າງປະເທດເກີນດູນ, ເງິນເຟີ້ມີທ່າອ່ຽງຫຼຸດລົງ, ການປະຕິບັດບາງຄາດໝາຍດ້ານວັດທະນະທໍາ-ສັງຄົມ, ຊັບພະຍາກອນທໍາມະຊາດ ແລະ ສິ່ງແວດລ້ອມ ມີຄວາມຄືບໜ້າທີ່ດີ.
ແຕ່ເຖິງຢ່າງໃດກໍຕາມ, ກອງປະຊຸມຍັງສະແດງຄວາມເປັນຫ່ວງ ຕໍ່ການປະຕິບັດບາງຄາດໝາຍຂອງແຜນການ 5 ປີ ຄັ້ງທີ IX (2021-2025), ແຜນການປີ 2025 ແລະ ວາລະແຫ່ງຊາດ ເປັນຕົ້ນເຖິງວ່າເສດຖະກິດມີການເຕີບໂຕ, ແຕ່ຄຸນນະພາບຍັງບໍ່ທັນສູງ, ລາຍໄດ້ສະເລ່ຍຕໍ່ຫົວຄົນຍັງຕໍ່າກວ່າຄາດໝາຍ,ການພັດທະນາຂົງເຂດກະສິກໍາ ຍັງບໍ່ທັນໄດ້ຮັບພັດທະນາເທົ່າທີ່ຄວນ, ການປຸ່ງແຕ່ງຍັງບໍ່ທັນມີຄວາມຫຼາກຫຼາຍ, ລາຄາສິນຄ້າບາງໝວດ ຍັງເພີ່ມຂຶ້ນສູງ, ການສ້ອມແປງເສັ້ນທາງທີ່ເປ່ເພຍັງຊັກຊ້າ, ການຄຸ້ມຄອງໂຄງການສໍາຫຼວດຂຸດຄົ້ນແຮ່ທາດ ຍັງບໍ່ທັນມີປະສິດທິພາບ ແລະ ປະສິດທິຜົນ, ການພັດທະນາຄຸນນະພາບການສຶກສາ ແລະ ສາທາລະນະສຸກ ຍັງບໍ່ທັນໄດ້ດີ, ການອອກໃບຕາດິນຍັງມີຄວາມຄືບໜ້າໜ້ອຍ, ການແກ້ໄຂປະກົດການຫຍໍ້ທໍ້ດ້ານສັງຄົມ ຍັງບໍ່ທັນໄດ້ດີ, ກອງປະຊຸມສະເໜີໃຫ້ ລັດຖະບານ ຄົ້ນຄວ້າວິທີການແກ້ໄຂບັນຫາດັ່ງກ່າວ ໃຫ້ມີຜົນສໍາເລັດ.
ເພື່ອຮັບປະກັນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ປະຈໍາປີ 2026ກອງປະຊຸມສະເໜີ ໃຫ້ລັດຖະບານ ເອົາໃຈໃສ່ ການພັດທະນາຕາມທິດການສ້າງເສດຖະກິດເອກະລາດ ເປັນເຈົ້າຕົນເອງ ແລະ ຕາມທິດ ສີຂຽວ ແລະ ຍືນຍົງ, ເກັບລາຍຮັບ ໃຫ້ຄົບຖ້ວນ ບັນລຸໄດ້20% ຂອງ GDP ຂຶ້ນໄປ, ພ້ອມທັງປະຕິບັດລາຍຈ່າຍງົບປະມານໃສ່ການພັດທະນາວຽກຈຸດສູມບຸລິມະສິດຂອງລັດຖະບານເຊັ່ນ ການພັດທະນາຂະແໜງການສຶກສາ, ສາທາລະນະສຸກ, ການພັດທະນາຊົນນະບົດ, ແກ້ໄຂຄວາມທຸກຍາກ, ການກໍ່ສ້າງສ້ອມແປງເສັ້ນທາງ, ການກໍ່ສ້າງຕ້ານຕາຝັ່ງເຈື່ອນຕາມເຂດຊາຍແດນ.
ສະເໜີລັດຖະບານສືບຕໍ່ສ້າງສະຖຽນລະພາບດ້ານເງິນຕາ ເພື່ອຮັບປະກັນສະຖຽນລະພາບທາງດ້ານເສດຖະກິດມະຫາພາກ, ເຮັດໃຫ້ອັດຕາເງິນເຟີ້ໃນລະດັບຕໍ່າ, ຄວບຄຸມໃຫ້ອັດຕາແລກປ່ຽນຄົງທີ່, ເພີ່ມປະລິມານຄັງສໍາຮອງເງິນຕາຕ່າງປະເທດ ໃຫ້ກຸ້ມການນໍາເຂົ້າໄດ້ຢ່າງໜ້ອຍ 5 ເດືອນ ຂຶ້ນໄປ, ສ້າງຄັງແຮດ້ວຍຄໍາ ເພື່ອຮັກສາສະຖານະພາບດ້ານການເງິນຂອງປະເທດເຮົາໃຫ້ໝັ້ນຄົງ, ສະໜອງສິນເຊື່ອດອກເບ້ຍຕ່ຳ ເຂົ້າໃນການຜະລິດ ແລະ ປຸງແຕ່ງສິນຄ້າໃຫ້ພຽງພໍ.
ເພີ່ມທະວີການຊຸກຍູ້, ສົ່ງເສີມ ການຜະລິດກະສິກໍາໃຫ້ແຂງແຮງ ພ້ອມທັງ ເອົາໃຈໃສ່ ຊ່ວຍເຫຼືອຊາວກະສິກອນ ດ້ານເຕັກນິກວິຊາການ, ທຶນຮອນ, ຕະຫຼາດຈໍາໜ່າຍ ແລະ ຟື້ນຟູ ພື້ນທີ່ທໍາການຜະລິດ ທີ່ໄດ້ຮັບຜົນກະທົບຈາກໄພພິບັດທໍາມະຊາດ ໃຫ້ສາມາດສືບຕໍ່ການຜະລິດປົກກະຕິ ເພື່ອຄໍ້າປະກັນສະບຽງອາຫານ ແລະ ເປັນສິນຄ້າ, ຈໍາກັດການນໍາເຂົ້າສິນຄ້າທີ່ສາມາດຜະລິດໄດ້ພາຍໃນຢ່າງເຂັ້ມງວດ, ຄຸ້ມຄອງລາຄາສິນຄ້າ ແລະ ສະບຽງອາຫານ ໃນລະດັບທີ່ເໝາະສົມ.
ສືບຕໍ່ກວດກາຢ່າງເຂັ້ມງວດຕໍ່ບັນດາໂຄງການລົງທຶນ ທີ່ມີປະສິດທິຜົນຕໍ່າ,ສຸມໃສ່ການພັດທະນາໂຄງການພະລັງງານໄຟຟ້າທົດແທນ ເສີມໃສ່ບັນດາສະຖານີ ຈຸດທີ່ຂາດແຄນໄຟຟ້າ ເພື່ອສະໜອງໄຟຟ້າໃຫ້ພຽງພໍກັບການຊົມໃຊ້ພາຍໃນ, ຄຸ້ມຄອງ ແລະ ປັບປຸງໂຄງສ້າງລາຄາໄຟຟ້າ ໃຫ້ເໝາະສົມກັບສະພາບຕົວຈິງ ບໍ່ໃຫ້ກະທົບຕໍ່ຊີວິດເປັນຢູ່ ແລະ ການຜະລິດ.
ສຸມງົບປະມານໃສ່ການກໍ່ສ້າງແລະສ້ອມແປງ ເສັ້ນທາງທີ່ເປ່ເພ ໃຫ້ກັບຄືນສູ່ສະພາບປົກກະຕິໂດຍໄວ ເພື່ອອໍານວຍຄວາມສະດວກ ການຂົນສົ່ງ, ການສັນຈອນໄປ-ມາຂອງປະຊາຊົນ ແລະ ການທ່ອງທ່ຽວ, ຄວບຄຸມ ລົດບັນທຸກນໍ້າໜັກເກີນ ແລະ ມີມາດຕະການ ຕໍ່ຜູ້ລະເມີດຢ່າງເຂັ້ມງວດ.
ສືບຕໍ່ຊຸກຍູ້, ສົ່ງເສີມການຫັນເປັນທັນສະໄໝໃນການບໍລິຫານລັດ, ການພັດທະນາເສດຖະກິດ ແລະ ການຄຸ້ມຄອງສັງຄົມ ແບບດິຈີຕອນ ດ້ວຍການຂະຫຍາຍເຄື່ອຂ່າຍເຊື່ອມໂຍງຖານຂໍ້ມູນບັນດາອົງການຈັດຕັ້ງລັດ, ພາກ ທຸລະກິດ, ເອກະຊົນ ແລະ ປະຊາຊົນ ດ້ວຍເອເລັກໂຕຣນິກທີ່ທັນສະໄໝ ໃຫ້ເຊື່ອມໂຍງເຂົ້າຫາກັນໄດ້ຢ່າງສະດວກ, ວ່ອງໄວ ແລະປອດໄພ.
ກອງປະຊຸມເຫັນດີໂດຍພື້ນຖານຕໍ່ການສະເໜີປັບປຸງດັດສະນີເງິນເດືອນ, ເງິນນະໂຍບາຍ ແລະ ເງິນ ອຸດໜູນ ພະນັກງານ-ລັດຖະກອນ, ທະຫານ, ຕຳຫຼວດ, ຄູ ແລະ ພະນັກງານບຳນານ ທີ່ຈະເລີ່ມຈັດຕັ້ງປະຕິບັດໃນເດືອນ 1 ປີ 2026 ເປັນຕົ້ນໄປ ແຕ່ລາຍລະອຽດສະເໜີໃຫ້ລັດຖະບານ ສືບຕໍ່ຄົ້ນຄວ້າ ແລະ ກໍານົດນະໂຍບາຍທີ່ຊັດເຈນ ແລະ ຮັດກຸມ.
ສືບຕໍ່ນໍາເອົາຄໍາຄິດເຫັນຂອງສະມາຊິກສະພາແຫ່ງຊາດ ໄປຄົ້ນຄວ້າປັບປຸງການສ້າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X (2026-2030)ໃຫ້ມີເນື້ອໃນຄົບຖ້ວນ, ສົມບູນ ສອດຄ່ອງກັບສະພາບຄວາມເປັນຈິງ ເພື່ອກະກຽມສະເໜີຮັບຮອງໃນກອງປະຊຸມຄັ້ງປະຖົມມະລຶກຂອງສະພາແຫ່ງຊາດຊຸດທີ X.
ອີງຕາມວາລະກອງປະຊຸມ, ໃນວັນທີ 21ພະຈິກ 2025 ທີ່ຈະມາເຖິງ ຜູ້ແທນກອງປະຊຸມຈະໄດ້ລົງຄະແນນຮັບຮອງ ມະຕິກອງປະຊຸມສະພາແຫ່ງຊາດວ່າດ້ວຍການຮັບຮອງເອົາບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ, ແຜນເງິນຕາ 5 ປີ ຄັ້ງທີ IX (2021-2025) ແລະ ແຜນການປະຈໍາປີ 2025, ສະຫຼຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2024, ການດັດແກ້ງົບປະມານແຫ່ງລັດ ປະຈໍາປີ 2025 ແລະ ແຜນພັດທະນາເສດຖະກິດ-ສັງຄົມແຫ່ງຊາດ ປະຈໍາປີ 2026.
(ຂ່າວ-ພາບ: ບຸນຕອມ)
ຄໍາເຫັນ