ກອງປະຊຸມຄັ້ງນີ້ໄດ້ດໍາເນີນເປັນເວລາ 1 ວັນເຕັມເພື່ອທົບທວນ ແລະ ສະຫຼຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ແລະ ກຽມພ້ອມເຂົ້າສູ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X ເພື່ອປຶກສາຫາລືໃນການຫຼຸດພົ້ນອອກຈາກສະຖານະພາບປະເທດດ້ອຍພັດທະນາໃນປີ 2026. ໃນກອງປະຊຸມບັນດາຜູ້ແທນທີ່ເຂົ້າຮ່ວມຫຼາຍກວ່າ 500 ທ່ານທັງພາຍໃນ ແລະ ສາກົນ ໄດ້ສືບຕໍ່ປຶກສາຫາລືການຈັດຕັ້ງປະຕິບັດວຽກງານທີ່ສຳຄັນຈຳນວນໜຶ່ງ ແລະ ຢັ້ງຢືນຄືນຄຳໝາຍໝັ້ນໃນການສືບຕໍ່ສະໜັບສະໜູນໃນການຈັດຕັ້ງປະຕິບັດວຽກງານການພັດທະນາຂອງສປປລາວເປັນຕົ້ນ ບັນດາປະເທດເພື່ອນມິດ, ຄູ່ຮ່ວມພັດທະນາ ແລະ ພາກສ່ວນກ່ຽວຂ້ອງຕ່າງໆ ໄດ້ຢືນຢັນຄືນໃໝ່ເຖິງຄຳໝັ້ນສັນຍາໃນການສະໜັບສະໜູນຢ່າງເຕັມສ່ວນເພື່ອຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ XIV ແລະ ເປົ້າໝາຍການພັດທະນາແບບຍືນຍົງ (SDGs); ສືບຕໍ່ແກ້ໄຂ ແລະ ຟື້ນຟູເສດຖະກິດທີ່ເປັນຜົນພວງຈາກການແຜ່ລະບາດຂອງພະຍາດໂຄວິດ-19 ແລະ ຄວາມຫຍຸ້ງຍາກທາງດ້ານເສດຖະກິດ-ການເງິນໃນໄລຍະຜ່ານມາເພື່ອກ້າວໄປສູ່ການສ້າງເສດຖະກິດເອກະລາດເປັນເຈົ້າຕົນເອງ ໂດຍສຸມໃສ່ການສ້າງຄວາມອາດສາມາດການຜະລິດ ແລະ ບໍລິການພາຍໃນ, ເພີ່ມທະວີທ່າແຮງບົ່ມຊ້ອນຂອງວິສາຫະກິດພາຍໃນປະເທດ ແລະ ສາມາດເຊື່ອມໂຍງເຂົ້າສູ່ຕ່ອງໂສ້ມູນຄ່າການຜະລິດຂອງສາກົນ ແລະ ພາກພື້ນ; ສືບຕໍ່ຮັກສາສະຖຽນລະພາບດ້ານເສດຖະກິດມະຫາພາກໂດຍສະເພາະຄຸ້ມຄອງອັດຕາເງິນເຟີ້, ອັດຕາແລກປ່ຽນ, ລາຄາສິນຄ້າ, ປັບປຸງລະບົບການເກັບລາຍຮັບງົບປະມານໃຫ້ມີຄວາມທັນສະໄໝ, ໂປ່ງໃສ ແລະ ເຂັ້ມແຂງ; ສືບຕໍ່ສຸມໃສ່ປັບປຸງໂຄງລ່າງພື້ນຖານໂດຍສະ ເພາະບັນດາເສັ້ນທາງຄົມມະນາຄົມຕາມແລວທາງເສດຖະກິດຕ່າງໆ, ທາງຫຼວງແຫ່ງຊາດ ແລະ ທາງຫຼວງທ້ອງຖິ່ນ; ສືບຕໍ່ສຸມໃສ່ພັດທະນາຊັບພະຍາກອນມະນຸດເປັນຕົ້ນ ປັບປຸງຄຸນນະພາບການສຶກສາໃຫ້ດີຂຶ້ນກວ່າເກົ່າແນໃສ່ສ້າງຊັບພະຍາກອນມະນຸດທີ່ເຂັ້ມແຂງປະກອບສ່ວນເຂົ້າສູ່ການຜະລິດ ແລະ ບໍລິການພາຍໃນ ໂດຍສະເພາະປັບປຸງລະບົບການສຶກສາສາຍສາມັນສຶກສາ, ຄົ້ນຄວ້າເພີ່ມນະໂຍບາຍອາຫານທ່ຽງໃຫ້ນັກຮຽນ, ເບ້ຍລ້ຽງໃຫ້ນັກຮຽນ-ນັກສຶກສາ; ປັບປຸງລະບົບສາທາລະນະສຸກໂດຍຮັບປະກັນການສະໜອງເຄື່ອງມື ແລະ ການບໍລິການສາທາລະນະສຸກທີ່ມີຄຸນນະພາບ; ສືບຕໍ່ການກະກຽມຄວາມພ້ອມໃນການຫຼຸດພົ້ນອອກຈາກສະຖານະພາບປະເທດດ້ອຍພັດທະນາຂອງສປປລາວເປັນຕົ້ນການສ້າງຄວາມເຂັ້ມແຂງດ້ວຍຕົນເອງ ເຮັດໃຫ້ການພັດທະນາມີຄຸນນະພາບ ແລະ ຍືນຍົງ, ສົ່ງເສີມບົດບາດການມີສ່ວນຮ່ວມຂອງພາກເອກະຊົນຕໍ່ກັບວຽກງານການພັດທະນາ, ເພີ່ມທະວີປະສິດທິຜົນຂອງການຮ່ວມມືເພື່ອການພັດທະນາ. ພ້ອມທັງ, ສືບຕໍ່ປະຕິບັດບັນດາເປົ້າໝາຍການພັດທະນາແບບຍືນຍົງ (SDGs) ເພື່ອຮັບປະກັນການເຕີບໂຕສີຂຽວ ໂດຍເນັ້ນໃສ່ການພັດທະນາເສດຖະກິດໄປຄຽງຄູ່ກັບການປົກປັກຮັກສາສິ່ງແວດລ້ອມ; ຜົນສໍາເລັດຂອງກອງປະຊຸມໂຕະມົນລະດັບສູງຄັ້ງທີ XIV ປີ 2025 ໃນຄັ້ງນີ້, ກະຊວງການເງິນໃນນາມຜູ້ປະຈໍາການຄະນະຊີ້ນຳລະດັບຊາດເພື່ອຂະບວນການໂຕະມົນ ຈະປະສານສົມທົບກັບພາກສ່ວນກ່ຽວ ຂ້ອງສັງລວມ ແລະ ລາຍງານຕໍ່ລັດຖະບານສປປ ລາວເພື່ອມີທິດຊີ້ນໍາ ແລະ ເປັນບ່ອນອີງໃຫ້ທຸກພາກສ່ວນຈັດຕັ້ງປະຕິບັດຕາມພາລະບົດບາດ ແລະ ສິດໜ້າທີ່ຂອງຕົນ. ຮຽກຮ້ອງໃຫ້ບັນດາກະຊວງ, ອົງການກ່ຽວຂ້ອງຢູ່ສູນກາງ ແລະ ອົງການປົກຄອງທ້ອງຖິ່ນ, ບັນດາຄູ່ຮ່ວມພັດທະນາ, ພາກເອກະຊົນ ແລະ ອົງການຈັດຕັ້ງທາງສັງຄົມສືບຕໍ່ຍົກສູງຄວາມຮັບຜິດຊອບ, ຄວາມເປັນເຈົ້າການທັງເພີ່ມທະວີການປະສານງານສົມທົບເຊິ່ງກັນ ແລະ ກັນຢ່າງກົມກຽວເພື່ອຜັນຂະຫຍາຍຜົນກອງປະຊຸມໂຕະມົນລະດັບສູງຄັ້ງທີ XIV ປີ 2025 ເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ X ໃຫ້ສຳເລັດຜົນຕາມຄາດໝາຍທີ່ວາງໄວ້.
ຕາງໜ້າໃຫ້ລັດຖະບານຂໍສະແດງຄວາມຂອບໃຈມາຍັງບັນດາປະເທດເພື່ອນມິດ, ຄູ່ຮ່ວມພັດທະນາ, ອົງການຈັດຕັ້ງສາກົນ, ອົງການຈັດຕັ້ງທາງສັງຄົມ ແລະ ພາກເອກະຊົນທີ່ໃຫ້ການສະໜັບສະໜູນທາງດ້ານງົບປະ ມານ ແລະ ເຕັກນິກວິຊາການເພື່ອປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງສປປລາວ. ພິເສດ: ຂໍຂອບໃຈລັດຖະບານນິວຊີແລນ ແລະ ອົງການສະຫະປະຊາຊາດທີ່ໄດ້ໃຫ້ການສະໜັບສະໜູນ ເຮັດໃຫ້ກອງປະຊຸມຄັ້ງນີ້ດຳເນີນໄປດ້ວຍຜົນສຳເລັດຢ່າງຈົບງາມ. ຂ່າວ: ພູວັນ, ພາບ: ກະຊວງການເງິນ
ຄໍາເຫັນ