 |
ສະຫາຍ ບຸນເລື່ອມ ມະນີວົງ ໄດ້ກ່າວສະແດງຄວາມຕ້ອນຮັບ ແລະ ຕີລາຄາສູງຕໍ່ຂີດໝາຍສໍາຄັນການຮ່ວມມືລາວ-ຫວຽດນາມ ກໍຄືຄະນະໂຄສະນາຫວຽດນາມ ແລະ ຄະນະໂຄສະນາແຂວງຫຼວງພະບາງໃນໄລຍະຜ່ານມາ. ພ້ອມລາຍງານສະພາບລວມຂອງແຂວງ ແລະ ຜົນສໍາເລັດໃນການເຄື່ອນໄຫວວຽກງານຂອງແຂວງ ກໍຄືຄະນະໂຄສະນາແຂວງໃຫ້ຄະນະຜູ້ແທນຮັບຊາບ. ແຂວງຫຼວງພະບາງເປັນເມືອງມໍລະດົກໂລກ ໂດຍສະເພາະໄດ້ກໍານົດຫຼາຍທ່າແຮງເສດຖະກິດໃນການພັດທະນາແຂວງ. ໃນປີ 2024 ມີນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວແຂວງປະມານ 3ລ້ານກວ່າເທື່ອຄົນ, ມາຮອດເດືອນພະຈິກ ປີ 2025 ມີ 2 ລ້ານກວ່າເທື່ອຄົນ. ໃນໄລຍະຜ່ານນີ້ໄດ້ມີການປັບປຸງກົງຈັກເອົາວຽກງານຖະແຫຼ່ງຂ່າວມາຂຶ້ນກັນຄະນະໂຄສະນາແຂວງ. ພ້ອມນັ້ນ, ຍັງສຸມໃສ່ຜັນຂະຫຍາຍການຈັດຕັ້ງປະຕິບັດວຽກງານຕ່າງໆ ກໍຄືການພົວວພັນຮ່ວມມືກັບ ສສ ຫວຽດນາມໃນວຽກງານຕ່າງໆໃຫ້ນັບມື້ຂະຫຍາຍຕົວຂຶ້ນເລື້ອຍໆ. ສະຫາຍບຸນເລື່ອມ ມະນີວົງຍັງສະເໜີໃຫ້ຄະນະໂຄສະນາຫວຽດນາມ ສືບຕໍ່ໃຫ້ການຊ່ວຍເຫຼືອໃນການພັດທະນາວຽກງານໂຄສະນາທ້ອງຖິ່ນໃຫ້ນັບມື້ມີປະສິດທິພາບ ແລະ ປະສິດທິຜົນຂຶ້ນຢ່າງບໍ່ຢຸດຢັ້ງ.
 |
ສະຫາຍ ຈ້ຽວ ຕ່າຍ ວິງ ໄດ້ສະແດງຄວາມຂອບໃຈຕໍ່ ເລຂາຄະນະບໍລິຫານງານພັກແຂວງທີ່ໃຫ້ກຽດຕ້ອນຮັບຢ່າງອົບອຸ່ນພ້ອມລາຍງານຈຸດປະສົງໃນການມາຢ້ຽມຢາມໃນຄັ້ງນີ້ ແລະ ເຫັນດີຕໍ່ຄໍາສະເໜີໃນການສືບຕໍ່ຊ່ວຍເຫຼືອພັດທະນາວຽກງານໂຄສະນາຂອງແຂວງກໍຄືທ້ອງຖິ່ນໃນຕໍ່ໜ້າ.
ສະຫາຍບຸນເລື່ອມ ມະນີວົງ ຍັງສະແດງຄວາມຂອບໃຈ ແລະ ເປັນເອກະພາບສູງຕໍ່ຄໍາເຫັນຂອງສະຫາຍ ຈ້ຽວ ຕ່າຍ ວິງ ຊຶ່ງເປັນປະໂຫຍດສູງສຸດ ຕໍ່ຄວາມສາມັກຄີພິເສດການພົວພັນຮ່ວມມືລະຫວ່າງສອງພັກ,ສອງລັດ, ປະຊາຊົນສອງຊາດລາວ-ຫວຽດນາມ ກໍຄືສອງຄະນະໂຄສະນາແຂວງຫຼວງພະບາງ ແລະ ຄະນະໂຄສະນາຫວຽດນາມ ແລະ ອວຍພອນໃຫ້ສະຫາຍ ຈ້ຽວ ຕ່າຍ ວິງ ພ້ອມຄະນະເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ກໍຄືແຂວງຫຼວງພະບາງຈົ່ງປະສົບຜົນສໍາເລັດຕາມຈຸດປະສົງຄາດໝາຍ. ຫຼັງຈາກນັ້ນ, ຄະນະຜູ້ແທນຍັງໄດ້ເຂົ້າພົບປະຢ້ຽມຢາມກົງສູນໃຫຍ່ຫວຽດນາມ ປະຈໍາແຂວງຫຼວງພະບາງ.
(ຂ່າວ-ພາບ: ວັນເພັງ)
ຄໍາເຫັນ