ປິດກອງປະຊຸມສາມັນຄົບຄະນະກຳມະການ ສນຊ ຄັ້ງທີ 5 ສະໄໝທີ XI

ທ່ານ ສິນລະວົງ ຄຸດໄພທູນ ກ່າວປິດກອງປະຊຸມວ່າ: ຕົ້ນປີ 2026 ນີ້ເປັນໄລຍະທີ່ສຳຄັນ, ເປັນປີທີ່ຈະກ້າວເຂົ້າສູ່ການກະກຽມກອງປະຊຸມໃຫຍ່ ຄັ້ງທີ XII ຂອງພັກ ແລະ ກອງປະຊຸມທົ່ວປະເທດ ຄັ້ງທີ XII ຂອງແນວລາວສ້າງຊາດ ແລະ ທົ່ວປະເທດມີຫຼາຍວຽກງານໃຫຍ່, ເພື່ອເຮັດສໍາເລັດໜ້າທີ່ ທີ່ກອງປະຊຸມກຳນົດໄວ້ ຈະຕ້ອງກໍາແໜ້ນ ແລະ ເອົາໃຈໃສ່ແຜນວຽກທີ່ເຄັ່ງຮ້ອນດັ່ງນີ້: ໜຶ່ງ. ພວກເຮົາຈະພ້ອມກັນຄົ້ນຄວ້າເຊື່ອມຊຶມມະຕິຕ່າງໆ ຂອງສູນກາງພັກ ເປັນຕົ້ນ ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ XI ແລະ XII ທີ່ຈະມາເຖິງ ໃນສະໄໝທີ XI ແລະ ສະເໜີໃຫ້ກຳມະການ ສນຊ ທຸກທ່ານ, ການຈັດຕັ້ງທຸກຂັ້ນນຳໄປຈັດຕັ້ງປະຕິບັດຕາມພາລະບົດບາດ, ໜ້າທີ່ຂອງຕົນໃຫ້ບັນລຸຜົນເປັນຢ່າງດີ; ສອງ. ພ້ອມກັນນໍາເອົາມະຕິກອງປະຊຸມຄັ້ງນີ້ ແລະ ມະຕິອື່ນໆຂອງ ສນຊ ນໍາໄປປະຕິບັດໃຫ້ເກີດດອກອອກຜົນ, ຫັນເປັນແຜນວຽກ ແຜນງານຂອງຄະນະກໍາມະການ ສນຊ ແຕ່ລະຂັ້ນ, ພິເສດໃຫ້ພ້ອມກັນກະກຽມກອງປະຊຸຸມໃຫຍ່ຄັ້ງທີ XII; ສາມ. ສືບຕໍ່ປັບປຸງແບບແຜນວິທີເຮັດວຽກຂອງຄະນະກໍາມະການ ສນຊ ທຸກຂັ້ນ, ກຳມະການ ສນຊ ທຸກທ່ານ ຕ້ອງເປັນເຈົ້າການ 4 ເສີມສ້າງ (ເສີມສ້າງຄຸນງາມຄວາມດີ, ເສີມສ້າງຄວາມສາມັກຄີ, ເສີມສ້າງຄຸນວຸດທິ ແລະ ເສີມສ້າງຄຸນນະທໍາ) ບົນຈິດໃຈເອົາໃຈໃສ່ປະຕິບັດຂໍ້ແຂ່ງຂັນຮັກຊາດ ແລະ ພັດ ທະນາ ເປັນຕົ້ນ 9 ຂໍ້ແຂ່ງຂັນຂອງອົງການແນວລາວສ້າງຊາດ ເລກທີ 388/ຄປຈ ອອກແຮງປຸກລະດົມຂົນຂວາຍປະຊາຊົນ, ພະຍາຍາມລົງຫາປະຊາຊົນ, ເອົາໃຈໃສ່ປະຊາຊົນ ແລະ ນໍາເອົາຜົນປະໂຫຍດມາໃຫ້ປະຊາຊົນບ່ອນຕົນເອງຢູ່; ສີ່. ເພີ່ມທະວີຄວາມຮັບຜິດຊອບ ແລະ ຄວາມເປັນແບບຢ່າງຂອງກໍາມະການແນວລາວສ້າງຊາດທຸກຂັ້ນ ທຸກທ່ານໃຫ້ສູງກວ່າເວລາໃດໝົດ, ເພື່ອເຮັດແນວໃດໃນພື້ນທີ່ຕົນຮັບຜິດຊອບຕ້ອງເສີມສ້າງຄວາມສາມັກຄີປອງດອງ, ຄວາມເປັນປຶກແຜ່ນໃນໝູ່ປະຊາຊົນ, ເສີມສ້າງຄຸນງາມຄວາມດີໃຫ້ປະກົດເດັ່ນ, ເສີມສ້າງຄຸນວຸດທິ ເຮັດໃຫ້ເກີດມີຫົວຄິດປະດິດສ້າງ ລວມທັງພຶດຕິກໍາ ແລະ ການບູລະນະ ນະໂຍບາຍໃນຂົງເຂດແນວໂຮມໃຫ້ຈະແຈ້ງ ເຮັດໃຫ້ກົມກອງທ້ອງຖິ່ນຂອງຕົນມີໃບໜ້າໃໝ່ ຈົ່ງພ້ອມກັນເສີມສ້າງໃຫ້ໄດ້ຄຸນນະທໍາ, ອະລິຍະທໍາໃນການເຄື່ອນໄຫວຂອງທຸກສາສະໜາໃຫ້ສາສະນິກະຊົນ ໃຫ້ປະຊາຊົນມີສັດທາຍິ່ງໆຂຶ້ນ. ໃນວັນດຽວກັນ, ໄດ້ມີພິທີມອບໃບຍ້ອງຍໍໃຫ້ບຸກຄົນ ແລະ ການຈັດຕັ້ງທີ່ສະໜັບສະໜູນວຽກງານ ສນຊ ຕື່ມອີກ.