ຊັບພະຍາກອນທໍາມະຊາດ ບໍ່ພຽງແຕ່ແມ່ນພື້ນຖານຂອງການດໍາລົງຊີວິດປະຈໍາວັນຂອງມະນຸດ ແຕ່ຍັງເປັນວັດຖຸດິບຂອງຂະບວນການຜະລິດ, ເປັນແຫຼ່ງພະລັງງານ, ຢາປິ່ນປົວພະຍາດ, ບ່ອນພັກພາອາໄສ,ບ່ອນທໍາການຜະລິດກະສິກໍາ ແລະ ປົກປັກຮັກສາສິ່ງແວດລ້ອມ, ແມ່ນຊັບສົມບັດທີ່ມີຄຸນຄ່າຂອງຊາດ,ແມ່ນທ່າແຮງອັນໃຫຍ່ຫຼວງຂອງການກໍ່ສ້າງ ແລະ ພັດທະນາເສດຖະກິດ-ສັງຄົມ, ປ້ອງກັນຊາດ-ປ້ອງກັນຄວາມສະຫງົບ, ພົວພັນເຖິງລະບົບນິເວດ ແລະ ສິ່ງແວດລ້ອມຂອງປະເທດ.
ການປົກປັກຮັກສາ ແລະ ການຄຸ້ມຄອງ ຊັບພະຍາກອນທໍາມະຊາດໃຫ້ຍືນຍົງ ແມ່ນການຈັດສັນຊັບພະຍາກອນ ເພື່ອພັດທະນາເສດຖະກິດ-ສັງຄົມໃຫ້ມີການຂະຫຍາຍຕົວດ້ວຍຈັງຫວະທີ່ໝັ້ນທ່ຽງ, ທັງຮັບປະກັນຊີວີວິດການເປັນຢູ່ຂອງປະຊາຊົນໃຫ້ດີຂຶ້ນ; ພ້ອມກັນນັ້ນ, ຍັງເປັນການເຄື່ອນໄຫວຄຸ້ມຄອງ, ປົກປັກຮັກສາ ແລະ ນໍາໃຊ້ຊັບພະຍາກອນທໍາມະຊາດໃຫ້ຖືກຕ້ອງຕາມຫຼັກວິຊາການ, ເຕັກນິກວິທະຍາສາດ.
ຈຸດປະສົງຕົ້ນຕໍ ຂອງການຂຸດຄົ້ນນໍາໃຊ້ຊັບພະຍາກອນທໍາມະຊາດເພື່ອພັດທະນາແບບຍືນຍົງ ແມ່ນແນໃສ່ປົກປັກຮັກສາຊັບພະຍາກອນທໍາມະຊາດ, ຊີວະນາໆພັນ ແລະ ສິ່ງແວດລ້ອມທາງທໍາມະຊາດ ໃຫ້ຍືນຍົງຄົງຕົວຢ່າງຍາວນານ, ປົກປັກຮັກສາຟື້ນຟູ, ບູລະນະຊັບພະຍາກອນທີ່ມີຢູ່ແລ້ວນັ້ນໃຫ້ຂະຫຍາຍຕົວທາງດ້ານປະລິມານ ແລະ ຄຸນນະພາບ ໂດຍບໍ່ໃຫ້ບົກແຫ້ງຈັກເທື່ອ. ຍ້ອນວ່າ, ຊັບພະຍາກອນທໍາມະຊາດ ມີຫຼາຍຊະນິດແຕກຕ່າງກັນ. ສະນັ້ນ, ການຄຸ້ມຄອງກໍມີເນື້ອໃນ ແລະ ວິທີການແຕກຕ່າງກັນ ໂດຍອີງຕາມຈຸດພິເສດຂອງຊັບພະຍາກອນແຕ່ລະຊະນິດເຊັ່ນ: ການຄຸ້ມຄອງຊັບພະຍາກອນປ່າໄມ້ ແມ່ນການສໍາຫຼວດ,ການວາງແຜນຈັດສັນປ່າ, ການປູກປ່າ, ການຄຸ້ມຄອງຂຸດຄົ້ນປ່າໄມ້, ການຕິດຕາມ, ການກວດກາການປົກປ້ອງ ແລະ ຟື້ນຟູປ່າ, ການປົກປັກຮັກສາລະບົບນິເວດ ແລະ ສິ່ງແວດລ້ອມປ່າໄມ້ ຕາມລະບຽບການ ແລະ ກົດໝາຍທີ່ລັດວາງອອກ.
ການຄຸ້ມຄອງນໍ້າ ແລະ ແຫຼ່ງຊັບພະຍາກອນນໍ້າ: ແມ່ນການຄຸ້ມຄອງ, ກວດກາ, ພັດທະນາແຫຼ່ງນໍ້າ ແລະ ສັດນໍ້າແບບຍືນຍົງ: ແມ່ນການປົກປັກຮັກສາຊີວະນາໆພັນ ແລະ ຄວາມສົມດຸນຂອງລະບົບນິເວດວິທະຍາສາດ; ແມ່ນການປົກປັກຮັກສາເຂດອະນຸລັກພັນສັດ, ຖິ່ນອາໄສ, ແຫຼ່ງອາຫານຂອງສັດນໍ້າ,ແຫຼງນໍ້າ, ສັດນໍ້າຢ່າງມີປະສິດທິຜົນ. ບໍ່ສົ່ງຜົນກະທົບຕໍ່ສິ່ງແວດລ້ອມທາງທໍາມະຊາດ ແລະ ສັງຄົມ; ຮັບປະກັນຜົນປະໂຫຍດຂອງລັດດລວມໝູ່, ຄອບຄົວ, ບຸກຄົນ ໃນສະເພາະໜ້າຍາວນານ ຕາມກົດໝາຍທີ່ວາງອອກ.
ການຄຸ້ມຄອງຊັບພະຍາກອນທີ່ດິນ: ແມ່ນການຂຶ້ນບັນຊີ, ສໍາມະໂນຄົວທີ່ດິນເພື່ອປົກປັກຮັກສາ ແລະ ຊົມໃຊ້ຊັບພະຍາກອນທີ່ດິນຢ່າງສົມເຫດສົມຜົນ, ມີປະສິດທິຜົນສູງສຸດ ເພື່ອສ້າງສາພັດທະນາປະເທດຊາດໃຫ້ມີການຂະຫຍາຍຕົວຢ່າງຕໍ່ເນື່ອງ; ການຄຸ້ມຄອງທີ່ດິນ ແມ່ນລວມເອົາທັງໝົດກິດຈະການ ຫຼື ໜ້າວຽກທີ່ພົວພັນເຖິງການປົກປັກຮັກສາ ແລະ ນໍາໃຊ້ທີ່ດິນໃຫ້ຢູ່ໃນສະພາບດີ. ບໍ່ໃຫ້ມີການເຊາະເຈື່ອນຍຸບລົງ,ເຊື່ອມໂຊມ, ຮັກສາຄຸນນະພາບໃຫ້ເໝາະສົມກັບແຕ່ລະຊະນິິດຂອງທີ່ດິນ, ບໍ່ໃຫ້ເນື້ອທີ່ດິນແຕ່ລະຊະນິດຫຼຸດລົງ, ບໍ່ໃຫ້ມີຜົນກະທົບອັນບໍ່ດີ ຕໍ່ສິ່ງແວດລ້ອມທໍາມະຊາດ ແລະ ສັງຄົມ.
ການຄຸ້ມຄອງຊັບພະຍາກອນແຮ່ທາດ: ແມ່ນການຄຸ້ມຄອງບັນດາກິດຈະກໍາການເຄື່ອນໄຫວຂອງວຽກງານດັ່ງກ່າວເຊັ່ນ: ການສໍາຫຼວດດການຂຸດຄົ້ນ, ການໃຫ້ເຊົ່າ ແລະ ສໍາປະທານ, ການພັດທະນາ, ການປະຕິບັດສັນຍາ ແລະ ອື່ນໆໃຫ້ເຂົ້າສູ່ລະບຽບກົດໝາຍຢ່າງເຂັ້ມງວດ.
ລວມຄວາມແລ້ວ ການປົກປັກຮັກສາ, ຄຸ້ມຄອງຊັບພະຍາກອນທໍາມະຊາດຢູ່ປະເທດເຮົາໃຫ້ຍືນຍົງ ແມ່ນການນໍາເອົາປັດໄຈຕ່າງໆຂອງທໍາມະຊາດ ມາເຂົ້າສູ່ຂະບວນການຜະລິດຕ່າງໆ ເພື່ອເປັນຜະລິດຕະພັນອອກຮັບໃຊ້ຄວາມຕ້ອງການທີ່ບໍ່ມີວັນສິ້ນສຸດຂອງຄົນ ໂດຍບໍ່ໃຫ້ມີຜົນກະທົບເຖິງຄວາມຕ້ອງການນໍາໃຊ້ໃນອະນາຄົດ. ເພາະສະນັ້ນ, ຈຶ່ງຮຽກຮ້ອງມາຍັງທຸກພາກສ່ວນໃນສັງຄົມ, ບຸກຄົນ, ນິຕິບຸກຄົງ ຈົ່ງຮ່ວມກັນປົກປັກຮັກສາ, ຄຸ້ມຄອງຊັບພະຍາກອນທໍາມະຊາດຢູ່ປະເທດເຮົາໃຫ້ຍືນຍົງ ດ້ວຍການເຄົາລົບກົດ ໝາຍ, ນິຕິກໍາທີ່ກ່ຽວຂ້ອງ, ນໍາໃຊ້ໃຫ້ຖືກເປົ້າໝາຍ, ຢ່າຈູດ, ຢ່າທໍາລາຍ ແລະ ເຮັດສິ່ງທີ່ເປັນຜົນກະທົບຕ່າງໆນາໆໃຫ້ກັບຊັບພະຍາກອນທໍາມະຊາດ ສິ່ງແວດລ້ອມ. ເພື່ອຄໍ້າປະກັນເສດຖະກິດ-ສັງຄົມຢູ່ປະເທດເຮົາໃຫ້ຂະຫຍາຍຕົວຢ່າງຕໍ່ເນື່ອງ.
ຄໍາເຫັນ