 |
ການຈັດກອງປະຊຸມໃນຄັ້ງນີ້, ກໍເພື່ອປຶກສາຫາລື ກັບພາກສ່ວນຮ່ວມພັດທະນາ ໃນຂະແໜງການຍ່ອຍຊົນລະປະທານ ຄັ້ງທີ 1 ປະຈໍາປີ 2025 ແນໃສ່ພັດທະນາ ແລະ ຄຸ້ມຄອງລະບົບຊົນລະປະທານ ທີ່ເປັນສ່ວນໜຶ່ງຂອງກົນໄກການປະສານງານ ແລະ ການສະໜັບສະໜູນດ້ານຍຸດທະສາດ ຕໍ່ກັບໜ່ວຍງານທີ່ເຮັດວຽກກ່ຽວກັບຂະແໜງກະສິກຳ ແລະ ການພັດທະນາຊົນນະບົດ ຊຶ່ງກອງປະຊຸມໄດ້ສຸມການປຶກສາຫາລື ໂດຍເນັ້ນກ່ຽວກັບໂອກາດ ແລະ ທ່າແຮງໃນການໝູນໃຊ້ລະບົບຂໍ້ມູນຂ່າວສານທາງດ້ານພູມສາດ (Geographical Information Systems ຫຼື GIS) ເພື່ອເພີ່ມທະວີໃນການຄຸ້ມຄອງ ແລະ ການພັດທະນາລະບົບຊົນລະປະທານ.
 |
ທ່ານ ຄໍາພະຈັນ ໄດ້ໃຫ້ຮູ້ວ່າ: “ມີຄວາມຈຳເປັນໃນການສືບຕໍ່ພັດທະນາ ແລະ ປັບປຸງການຄຸ້ມຄອງລະບົບຊົນລະປະທານ ເພື່ອສະໜອງ ແລະ ນໍາໃຊ້ນໍ້າຊົນລະປະທານ ໃຫ້ມີປະສິດທິພາບ, ພ້ອມທັງການຂະຫຍາຍເນື້ອທີ່ຊົນລະປະທານ. ເຖິງແມ່ນວ່າໄດ້ມີການປັບປຸງຊົນລະປະທານແລ້ວກໍຕາມ, ແຕ່ຄວາມຄືບໜ້າໃນການຂະຫຍາຍເນື້ອທີ່ຊົນລະປະທານ ແລະ ການເຂົ້າເຖິງຂໍ້ມູນທີ່ກ່ຽວຂ້ອງ ແມ່ນຍັງເປັນບັນຫາ. ການນຳໃຊ້ເຕັກໂນໂລຊີ GIS ໃນການພັດທະນາ ແລະ ການຄຸ້ມຄອງຊົນລະປະທານ ໂດຍສະເພາະ ການຄຸ້ມຄອງຖານຂໍ້ມູນແມ່ນມີຄວາມສຳຄັນ ແລະ ຈຳເປັນ”.
ອີງຕາມບົດລາຍງານຂອງກົມຊົນລະປະທານໃຫ້ຮູ້ວ່າ: ໃນປີ 2024, ເນື້ອທີ່ຊົນລະປະທານມີທັງໝົດ 500,221 ເຮັກຕາ ຊຶ່ງໃນນັ້ນລວມມີ ເນື້ອທີ່ຊົນລະປະທານໃນລະດູຝົນ 313,753 ເຮັກຕາ ແລະ ລະດູແລ້ງ 182,468 ເຮັກຕາ ຊຶ່ງໂດຍລວມແມ່ນບັນລຸໄດ້ເກີນແຜນທີ່ໄດ້ວາງໄວ້ຈົນຮອດປີ 2025 ໃນເນື້ອທີ່ 495,000 ເຮັກຕາ.
ທ່ານ ນາງ ແຊນນີ ແຄັມເບລ ໄດ້ຮູ້ວ່າ: “ກອງປະຊຸມປຶກສາຫາລືຄັ້ງນີ້ ແມ່ນເວທີຮວບຮວມຂໍ້ມູນອັນສຳຄັນ ຈາກບັນດາຜູ້ເຮັດວຽກຕົວຈິງ, ຜູ້ສ້າງນະໂຍບາຍ ແລະ ຄູ່ຮ່ວມພັດທະນາ ກ່ຽວກັບການນໍາເຕັກໂນໂລຊີ GIS ຂັ້ນສູງມາໃຊ້ ແລະ ໃຊ້ຢ່າງມີປະສິດທິຜົນ ເພື່ອປັບປຸງການພັດທະນາ ແລະ ການຄຸ້ມຄອງຊົນລະປະທານ. ໃນຂະນະທີ່ພວກເຮົາພວມເຮັດວຽກຮ່ວມກັນ ເພື່ອປັບປຸງການຄຸ້ມຄອງນໍ້າ, ຊຸກຍູ້ການຜະລິດກະສິກໍາ ແລະ ເພີ່ມທະວີຄວາມທົນທານຕໍ່ສະພາບດິນຟ້າອາກາດ, GIS ຈະເປັນເຄື່ອງມືອັນສຳຄັນ ໃຫ້ພວກເຮົາໃນການວາງແຜນ, ການຄຸ້ມຄອງ, ການຕິດຕາມ ແລະ ບໍາລຸງຮັກສາລະບົບຊົນລະປະທານໄດ້ດີຂຶ້ນ”.
ການໝູນໃຊ້ GIS ໄດ້ໃຫ້ໂອກາດສະເພາະເພື່ອເສີມສ້າງຄວາມເຂັ້ມແຂງ ໃຫ້ກັບຂະແໜງຊົນລະປະທານ, ເພີ່ມທະວີຄວາມເຂັ້ມແຂງໃຫ້ຜູ້ຕັດສິນໃຈດ້ວຍຂໍ້ມູນ, ເພີ່ມປະສິດທິພາບການດໍາເນີນງານ ແລະ ການບໍາລຸງຮັກສາ, ພ້ອມທັງເປັນການປັບປຸງຄຸນນະພາບຊີວິດການເປັນຢູ່ຂອງຊາວກະສິກອນ.
(ຂ່າວ-ພາບ: ສຸກສະຫວັນ)
ຄໍາເຫັນ