ທ່ານ ລີແຈມຽງ ກ່າວໃນລະຫວ່າງການພົບປະກັບ ທ່ານ ພຣາໂບໂວ ວ່າ: ອິນໂດເນເຊຍເປັນພັນທະມິດທີ່ໜ້າເຊື່ອຖືສະເໝີມາ, ໂດຍສະເພາະໃນຖານະເປັນຜູ້ສະໜອງຊັບພະຍາກອນພະລັງງານທີ່ສຳຄັນ ເຊັ່ນ: ອາຍແກ໊ສທຳມະຊາດແຫຼວ (LNG) ແລະ ຖ່ານຫີນ ຊຶ່ງຊ່ວຍສ້າງຄວາມໝັ້ນໃຈໃຫ້ແກ່ ສ ເກົາຫຼີ ທ່າມກາງຄວາມບໍ່ແນ່ນອນຂອງສະຖານະການໂລກ.
ທັງນີ້, ເພື່ອເສີມສ້າງສາຍພົວພັນໃຫ້ແໜ້ນແຟ້ນຍິ່ງຂຶ້ນ ທັງສອງປະເທດໄດ້ລົງນາມໃນບົດບັນທຶກຄວາມເຂົ້າໃຈ (MOU) ທັງໝົດ 16 ສະບັບ ຊຶ່ງກວມເອົາຫຼາຍດ້ານທີ່ສໍາຄັນ, ລວມທັງແຮ່ທາດທີ່ສຳຄັນ, ເຕັກໂນໂລຊີ ແລະ ພະລັງງານສະອາດ, ລວມທັງການຮ່ວມມືດ້ານເສດຖະກິດເຊັ່ນ: ຂໍ້ຕົກລົງລະຫວ່າງທະນາຄານສົ່ງອອກ-ນຳເຂົ້າຂອງ ສ ເກົາຫຼີ (Eximbank) ກັບ ກອງທຶນຄວາມຮັ່ງມີແຫ່ງຊາດອິນໂດເນເຊຍ (Danantara).
ຂ່າວລະບຸວ່າ: ຫຼັງຈາກພິທີຕ້ອນຮັບຢ່າງເປັນທາງການທີ່ທຳນຽບປະທານາທິບໍດີ, ຜູ້ນຳທັງສອງໄດ້ເຂົ້າຮ່ວມກອງປະຊຸມສຸດຍອດ ແລະ ໄດ້ເປັນສັກຂີພິຍານໃນພິທີລົງນາມໃນບົດບັນທຶກຄວາມເຂົ້າໃຈ (MOU) ຈຳນວນ 16 ສະບັບ.
ໃນໂອກາດນີ້, ທ່ານ ລີແຈມຽງ ຍັງໄດ້ມອບ Grand Order of Mugunghwa ໃຫ້ແກ່ທ່ານ ພຣາໂບໂວ ຊຶ່ງເປັນເຄື່ອງຣາດຊະຍົດສູງສຸດໃນ ສ ເກົາຫຼີ, ເພື່ອເປັນກຽດໃນຖານະຜູ້ທີ່ມີບົດບາດສຳຄັນໃນການສົ່ງເສີມມິດຕະພາບລະຫວ່າງສອງປະເທດ. ພ້ອມທັງມອບຊຸດອຸປະກອນຍິງທະນູພື້ນເມືອງ ແລະ ປຶ້ມກ່ຽວກັບສິລະປະການຕໍ່ສູ້ໃນຍຸກໂຊຊອນ ເປັນຂອງຂວັນພິເສດໃຫ້ຜູ້ນຳອິນໂດເນເຊຍ.
ຄໍາເຫັນ