ໃນລະຫວ່າງການພົບປະ, ຜູ້ນຳທັງສອງຍັງໄດ້ເປັນສັກຂີພິຍານໃນການລົງນາມບົດບັນທຶກຄວາມເຂົ້າໃຈ (MOU) ຈຳນວນ 10 ສະບັບ ຊຶ່ງກວມເອົານະໂຍບາຍການຄ້າ ແລະ ອຸດສາຫະກຳ, ແຮ່ທາດ, ເສດຖະກິດດີຈີຕອນ ແລະ ປັນຍາປະດິດ (AI), ກະສິກຳ, ສາທາລະນະສຸກ ແລະ ເຕັກໂນໂລຊີຊີວະພາບ, ການແລກປ່ຽນລະຫວ່າງວິສາຫະກິດຂະໜາດນ້ອຍ ແລະ ຂະໜາດກາງ (SMEs), ລວມທັງການປະຕິບັດງານຮ່ວມກັນຂອງຕຳຫຼວດໃນການຕ້ານອາຊະຍາກຳທາງໄຊເບີ, ການຄ້າຂາຍຢາເສບຕິດ ແລະ ໄພຂົ່ມຂູ່ຂ້າມຊາດອື່ນໆ.
ທ່ານ ລີ ແຈມຽງ ກ່າວວ່າ: ທັງສອງຝ່າຍໄດ້ຕົກລົງເຫັນດີກ່ຽວກັບແຜນປະຕິບັດງານໄລຍະ 4 ປີ ເພື່ອກຳນົດວິທີການທີ່ເປັນຮູບປະທຳໃນການຂະຫຍາຍການຮ່ວມມືສອງຝ່າຍໃນຂົງເຂດຕ່າງໆ ຕັ້ງແຕ່ແຮ່ທາດຍຸດທະສາດ ແລະ ອຸດສາຫະກຳປ້ອງກັນປະເທດ ແລະ ອາວະກາດ ຈົນເຖິງຄວາມໝັ້ນຄົງດ້ານອາຫານ. ໂດຍບຣາຊິນຖືເປັນປະເທດຄູ່ຄ້າທີ່ໃຫຍ່ທີ່ສຸດຂອງ ສ ເກົາຫຼີ ໃນອາເມຣິກາໃຕ້, ການຮ່ວມມືດ້ານເສດຖະກິດຈຶ່ງເປັນວາລະສຳຄັນໃນປຶກສາຫາລືຄັ້ງນີ້.
ທ່ານ ລູອິສ ອິນາຊີໂອ ລູລາ ດາ ຊິວວາ ລະບຸວ່າ: ບຣາຊິນມີແຫຼ່ງແຮ່ທາດທີ່ຫາຍາກ ແລະ ຊັບພະຍາກອນນິກເກີນທີ່ອຸດົມສົມບູນ, ໂດຍ ລັດຖະບານຫວັງວ່າຈະສາມາດດຶງດູດການລົງທຶນຈາກບໍລິສັດ ສ ເກົາຫຼີ ໄດ້.
ການຢ້ຽມຢາມຢ່າງເປັນທາງການຄັ້ງທຳອິດໃນຮອບ 21 ປີຂອງທ່ານປະທານາທິບໍດີບຣາຊິນ ສະທ້ອນໃຫ້ເຫັນເຖິງສາຍພົວພັນທີ່ດີລະຫວ່າງຜູ້ນຳທັງສອງ ຊຶ່ງເຄີຍພົບກັນຄັ້ງທຳອິດທີ່ກອງປະຊຸມສຸດຍອດ G7 ໃນການາດາເມື່ອປີກາຍນີ້ ແລະ ພົບກັນອີກຄັ້ງທີ່ G20 ໃນອາຟຣິກາໃຕ້.
ຄໍາເຫັນ