ໂດຍໄດ້ຮັບກຽດເຂົ້າຮ່ວມຂອງສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ ເລຂາທິການສູນກາງພັກ ຫົວໜ້າຈັດຕັ້ງສູນກາງພັກ, ມີທ່ານ ບຸນໂຈມ ອຸບົນປະເສີດ ກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ, ພ້ອມດ້ວຍຄະນະນໍາຂອງແຂວງເຂົ້າຮ່ວມ.
ໂອກາດນີ້, ສະຫາຍ ບຸນໂຈມ ອຸບົນປະເສີດ ໄດ້ລາຍງານໂດຍສັງເຂບກ່ຽວກັບສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມປະຈໍາປີ 2024 ແລະ ໜ້າວຽກອັນໃໝ່ທີ່ພົ້ນເດັ່ນເປັນຕົ້ນ: ການເຕີບໂຕຂອງເສດຖະກິດລວມຍອດຜະລິດຕະພັນພາຍໃນ ຂະຫຍາຍຕົວຢູ່ໃນລະດັບ7.9%, ລື່ນແຜນການ 0.05%, ສະເລ່ຍລາຍຮັບຕໍ່ຫົວຄົນ 32 ລ້ານກວ່າກີບ. ສ່ວນໜ້າວຽກສໍາຄັນທີ່ການນໍາແຂວງໄດ້ມີການຄາດຄະເນລ່ວງໜ້າແມ່ນການສ້າງບຸກຄະລາກອນຄູ. ຄະນະນໍາຂອງແຂວງສະຫວັນນະເຂດ ສຸມໃສ່ແກ້ໄຂບັນຫາການຄາດແຄນຄູ, ສິ່ງທີ່ພົ້ນເດັ່ນໃນສົກຮຽນໃໝ່ແຂວງສະຫວັນນະເຂດໄດ້ເປີດຂະບວນການລົງເປີດການຮຽນ-ການສອນທົ່ວແຂວງໃນ 6 ເມືອງ ຈໍານວນ 47 ແຫ່ງ ແລະ ການນໍາເມືອງລົງຮ່ວມເປີດໄດ້ 40 ແຫ່ງ.
ຄຽງຄູ່ກັນນີ້, ໄດ້ລະດົມທຶນຊື້ອຸປະກອນການຮຽນ ແລະ ລະດົມນັກຮຽນຈົບ ມ7 ມາຮຽນສາຍຄູພາຍໃນແຂວງໄດ້ 226 ຄົນໂດຍໄດ້ເພີ່ມອັດຕາເບ້ຍລ້ຽງທີ່ລັດຖະບານໃຫ້ 2 ແສນກີບ/ຄົນ/ເດືອນ, ທາງແຂວງຊຸກຍູ້ຕື່ມ 7 ແສນກີບ/ຄົນລວມໄດ້ 9 ແສນກີບ/ຄົນ/ເດືອນ, ພິເສດໄດ້ແກ້ໄຂບັນຫານັກຮຽນຢູ່ເຂດບ້ານຈຽງຕູບເປັນຈຸດສຸມທຸກຍາກຂອງປະເທດເປີດຫ້ອງຮຽນຊັ້ນ ມ2 ໂດຍນໍາໃຊ້ງົບປະມານຂອງແຂວງຈ້າງຄູສອນ 4 ຄົນ ສອນນັກຮຽນຈໍານວນ 24 ຄົນ. ສ່ວນການດໍາເນີນກອງປະຊຸມໃຫຍ່ອົງຄະນະພັກເມືອງແມ່ນສໍາເລັດ 2 ເມືອງຄື: ເມືອງວິລະບູລີ ແລະ ເມືອງໄຊບູລີ.
ໃນໂອກາດດັ່ງກ່າວ, ຕາງໜ້າຄະນະຈັດຕັ້ງສູນກາງພັກໄດ້ຜ່ານນິຕິກໍາຂອງຂັ້ນເທິງປະກອບມີ:ຄໍາສັ່ງຂອງຄະນະເລຂາທິການສູນກາງພັກ ສະບັບເລກທີ 350/ຄລສພ, ລົງວັນທີ 2 ມັງກອນ 2025 ວ່າດ້ວຍຍົກຍ້າຍພະນັກງານໄປຮັບໜ້າທີ່ໃໝ່, ຊຶ່ງໄດ້ອອກຄໍາສັ່ງຍົກຍ້າຍສະຫາຍ ໂພໄຊ ໄຂຄໍາພິທູນກໍາມະການປະຈໍາພັກກະຊວງການຕ່າງປະເທດໄປຮັບໜ້າທີ່ໃໝ່ຢູ່ແຂວງສະຫວັນນະເຂດ; ຜ່ານຄໍາສັ່ງຂອງທ່ານນາຍົກລັດຖະມົນຕີສະບັບເລກທີ 01/ນຍ, ລົງວັນທີ 2 ມັງກອນ 2025 ວ່າດ້ວຍການຍົກຍ້າຍໜ້າທີ່ໃໝ່ໂດຍອອກຄໍາສັ່ງຍົກຍ້າຍທ່ານ ໂພໄຊ ໄຂຄໍາພິທູນ ຮອງລັດຖະມົນຕີກະຊວງການຕ່າງປະເທດ ໄປຮັບໜ້າທີ່ໃໝ່ຢູ່ແຂວງສະຫວັນນະເຂດ; ພ້ອມນີ້ໄດ້ປະກາດເປັນກໍາມະການຄະນະບໍລິຫານງານພັກ, ທັງເປັນກໍາມະການປະຈໍາພັກແຂວງສະຫວັນນະເຂດ ຕາມມະຕິຕົກລົງຂອງຄະນະເລຂາທິການສູນກາງພັກ ສະບັບເລກທີ 351/ຄລສພ, ລົງວັນທີ 2 ມັງກອນ 2025, ພ້ອມນີ້ກໍໄດ້ຜ່ານຂໍ້ຕົກລົງຂອງທ່ານເຈົ້າແຂວງສະຫວັນນະເຂດ ສະບັບເລກທີ 92/ຈຂ, ລົງວັນທີ 17 ມັງກອນ 2025 ວ່າດ້ວຍການແຕ່ງຕັ້ງພະນັກງານ, ເຈົ້າແຂວງສະຫວັນນະເຂດຕົກລົງແຕ່ງຕັ້ງທ່ານ ໂພໄຊ ໄຂຄໍາພິທູນ ເປັນຮອງເຈົ້າແຂວງສະຫວັນນະເຂດ.
ໃນພິທີຄັ້ງນີ້, ຍັງໄດ້ຮັບຟັງການໂອ້ລົມ ແລະ ໃຫ້ທິດຊີ້ນຳຈາກສະຫາຍ ນາງ ສີໃສ ລືເດດມູນສອນ ຊຶ່ງທ່ານໄດ້ໃຫ້ທິດຊີ້ນຳທີ່ມີຄຸນຄ່າທີ່ສຸດໃຫ້ແກ່ຄະນະພັກ-ຄະນະນຳຂອງແຂວງໂດຍສະເພາະ ທ່ານໄດ້ໃຫ້ບົດຮຽນຫຼາຍດ້ານທີ່ເປັນປະສົບການຕົວຈິງໃນການນຳພາ-ຊີ້ນຳໃນຂົງເຂດຕ່າງໆໃນລະດັບຂັ້ນແຂວງ ແລະ ຂັ້ນສູນກາງ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ