 |
ສະຫາຍ ສຸກຄຳເພັດ ເຮືອງບຸດສີ ຮອງປະທານຄະນະກວດກາສູນກາງພັກ ໄດ້ແຈ້ງຜົນຂອງກອງປະຊຸມວ່າ: ກອງປະຊຸມໄດ້ປ່ອນບັດຄັດເລືອກເອົາ ຄະນະບໍລິຫານງານພັກແຂວງ ຈຳນວນ 35 ສະຫາຍ, ເລື່ອກເອົາຄະນະປະຈຳພັກ ຈຳນວນ 11 ສະຫາຍ, ກອງປະຊຸມໄດ້ເປັນເອກະພາບກັນ ເລືອກເອົາ ສະຫາຍ ສອນທະນູ ທຳມະວົງ ເປັນເລຂາຄະນະບໍລິຫານງານພັກແຂວງ, ເລືອກເອົາ ສະຫາຍ ຄຳແຫວນ ປັນຍານຸວົງ ແລະ ສະຫາຍ ເລື່ອນວິໄລ ຈັນທະລາພັນ ເປັນຮອງເລຂາຄະນະບໍລິຫານງານພັກແຂວງ ແລະ ເລືອກເອົາ ສະຫາຍ ພັນໂທ ສົມສົດ ແສງອາພອນ ເປັນປະທານກວດກາ, ເລືອກເອົາ ສະຫາຍ ສະຫາຍ ຄຳຕັນ ສີສົມຈິດ, ສະຫາຍ ສົມພຽນ ສອນພາ, ສະຫາຍ ຄຳໃສ ຄຳພູບານ ແລະ ສະຫາຍ ທະນູວັນ ວົງມະນີ ເປັນຮອງປະທານກວດກາ.
ກອງປະຊຸມຍັງໄດ້ປ່ອນບັດຄັດເລືອກເອົາຜູ້ແທນສົມບູນ ຈຳນວນ 24 ສະຫາຍ ແລະ ສຳຮອງ 4 ສະຫາຍ ໄປຮ່ວມກອງປະຊຸມໃຫຍ່ຄັ້ງທີ XII ຂອງພັກ.
ໃນໂອກາດດັ່ງກ່າວ, ສະຫາຍ ນາງ ສີໃສ ລືເດດມູນສອນ ໄດ້ໂອ້ລົມ ເພື່ອເປັນເຂັ້ມທິດເຍືອງທາງ ຕໍ່ຄະນະພັກຊຸດໃໝ່ ແລະ ສະມາຊິກພັກທົ່ວແຂວງວ່າ: ກ່ອນອື່ນ ສະຫາຍໄດ້ຕີລາຄາສູງຕໍ່ໝາກຜົນແຫ່ງການນໍາພາ-ຊີ້ນໍາ ຂອງບັນດາສະຫາຍຄະນະພັກ, ອົງການປົກຄອງແຕ່ລະຂັ້ນ ແລະ ປະຊາຊົນບັນດາເຜົ່າໃນທົ່ວແຂວງ ທີ່ໄດ້ສຸມໃສ່ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VII ຂອງຕົນ ແລະ ໄດ້ມີຜົນສໍາເລັດຫຼາຍດ້ານຢ່າງສະຫງ່າງາມ; ອັນພົ້ນເດັ່ນແມ່ນສາມາດເຮັດໃຫ້ທົ່ວແຂວງມີສະຖຽນລະພາບ, ມີຄວາມສະຫງົບຢ່າງໜັກແໜ້ນ, ເສດຖະກິດມີການຂະຫຍາຍຕົວ 5.1%, ລວມຍອດຜະລິດຕະພັນພາຍໃນ (GDP) ບັນລຸ 15,249 ຕື້ກີບ, ສະເລ່ຍຕໍ່ຫົວຄົນ 1,923 ໂດລາ; ໂຄງປະກອບເສດຖະກິດຕາມຂະ ແໜງ ກະສິກໍາ-ປ່າໄມ້ ຂະຫຍາຍຕົວ 5.2% ກວມ 35%, ອຸດສາຫະກໍາ ຂະຫຍາຍຕົວ 2.4% ກວມ 44% ແລະ ການບໍລິການຂະຫຍາຍຕົວ 9.9% ກວມ 21% ຂອງ GDP; ການລົງທຶນບັນລຸເຖິງ 10,899 ຕື້ກີບ ເທົ່າກັບ 145% ຂອງ GDP. ຜົນງານ ແລະ ໄຊຊະນະອັນໃຫຍ່ຫຼວງທີ່ອົງຄະນະພັກແຂວງຍາດມາໄດ້ໃນ 5 ປີຜ່ານມາ ແມ່ນຍ້ອນຄວາມຮັບຜິດຊອບຢ່າງຈິງຈັງຂອງຄະນະພັກ, ສະມາຊິກພັກ, ພະນັກງານ-ລັດຖະກອນ, ກຳລັງປະກອບອາວຸດ ແລະ ປະຊາຊົນບັນດາເຜົ່າ ທີ່ໄດ້ທຸ່ມເທເຫື່ອແຮງສະຕິປັນຍາປະກອບສ່ວນຈັດຕັ້ງປະຕິບັດດ້ວຍຄວາມເປັນເຈົ້າການຢ່າງຕັ້ງໜ້າ ແລະ ສະຫາຍຍັງໄດ້ໃຫ້ທິດຊີ້ນໍາ ເນັ້ນຕື່ມບາງດ້ານດັ່ງນີ້: ໃຫ້ບັນດາສະຫາຍຈົ່ງພ້ອມກັນນຳເອົາເນື້ອໃນຈິດຜົນສໍາເລັດກອງປະຊຸມໃຫຍ່ຂອງພວກສະຫາຍໃນຄັ້ງນີ້ໄປຜັນຂະຫາຍໃຫ້ໄວ, ເຮັດໃຫ້ພະນັກງານ, ສະມາຊິກພັກ, ກໍາລັງປະກອບອາວຸດ, ປະຊາຊົນບັນດາເຜົ່າ ແລະ ຜູ້ປະກອບການຕ່າງໆ ໄດ້ຮັບຮູ້ ເຂົ້າໃຈ ປະກອບສ່ວນເຮັດໃຫ້ແຂວງມີສະຖຽນລະພາບທາງດ້ານການເມືອງ, ສັງຄົມມີຄວາມເປັນລະບຽບຮຽບຮ້ອຍ, ປະຊາຊົນມີຄວາມສາມັກຄີເປັນປຶກແຜ່ນ. ສ້າງໃຫ້ໄດ້ໂຄງປະກອບເສດຖະກິດໄປຕາມນະໂຍບາຍເສດຖະກິດເອກະ ລາດເປັນເຈົ້າຕົນເອງ ໂດຍນໍາໃຊ້ທິດຫັນເປັນອຸດສາຫະກຳ ແລະ ທັນສະໄໝເປັນພື້ນຖານ ໃຫ້ມັນສົມຄູ່ກັບທ່າແຮງຂອງແຂວງ-ເມືອງ ເປັນຕົ້ນແມ່ນບັນດາເປົ້າໝາຍ ແລະ ຈຸດສຸມຂອງການພັດທະນາທີ່ພວກສະຫາຍວາງໄວ້ໃນແຜນພັດທະນາ 5 ປີ ຄັ້ງທີ VI ແລະ ຍຸດທະສາດການບໍລິການທາງຜ່ານ ຕາມສະພາບຈຸດພິເສດທາງດ້ານທີ່ຕັ້ງທີ່ໄດ້ປຽບຂອງແຂວງ, ບັນດາສະຫາຍຕ້ອງໄດ້ຕິດແທດເອົາໃຈໃສ່ຊີ້ນຳ-ຊຸກຍູ້ໃຫ້ແຂງແຮງແທ້ໆ. ການສົ່ງເສີມການຜະລິດເປັນສິນຄ້າ, ການລ້ຽງສັດໃຫຍ່, ການປູກໄມ້ອຸດສາຫະກຳ, ປູກພືດອຸດສາຫະກໍາ ແຕ່ລະດ້ານຕ້ອງສ້າງໃຫ້ເປັນລະບົບ ຍືນຍົງຮັບປະກັນທາງດ້ານປະລິມານ, ຄຸນນະພາບ, ລາຄາ ແລະ ຕະຫຼາດ. ບັນດາໂຄງການພັດທະນາໂຄງລ່າງຕ່າງໆທີ່ກໍານົດໃນແຜນພັດທະນາເສດຖະກິດ-ສັງຄົມ ຕ້ອງຮັບປະກັນທາງດ້ານທຶນຮອນ, ຜົນກະທົບທາງດ້ານສິ່ງແວດລ້ອມ, ຫຼີກເວັ້ນບັນຫານັກທຸລະກິດພາຍໃນກາຍເປັນນາຍໜ້າຂອງນັກລົງທຶນຕ່າງປະເທດ ແລະ ການລົງທຶນເພື່ອຈຸດປະສົງອື່ນທີ່ບໍ່ດີ, ເອົາໃຈໃສ່ແທ້ໆຕໍ່ຄຸນນະພາບຂອງການພັດທະນາ, ການຮົ່ວໄຫຼຂອງລາຍຮັບ, ຕະຫຼອດຮອດໂຄງການນອກແຜນເພື່ອເອົາຊັບສິນຂອງຊາດມາຊໍາລະສະສາງ, ສືບຕໍ່ດໍາເນີນວຽກງານກໍ່ສ້າງຮາກຖານການເມືອງ ແລະ ພັດທະນາຊົນນະບົດຮອບດ້ານຕາມລັດຖະທໍາມະນູນ ສະບັບປັບປຸງ ໂດຍສະເພາະການຫັນເອົາທຶນຮອນ ແລະ ພະນັກງານວິຊາການ ລົງໃສ່ການພັດທະນາຕາແສງ ໃຫ້ມີຄວາມເຂັ້ມແຂງ ຮູ້ເຄື່ອນໄຫວປະຕິບັດໜ້າທີ່ຕາມພາລະບົດບາດ, ສິດ-ໜ້າທີ່ຢ່າງເຕັມສ່ວນ ກາຍເປັນຫົວໜ່ວຍການຈັດຕັ້ງປະຕິບັດໃນແຕ່ລະວຽກງານ ສຸມໃສ່ແກ້ໄຂຄອບຄົວທີ່ບໍ່ທັນພົ້ນທຸກໃຫ້ໄດ້ 850 ຄອບຄົວ ແລະ ລຶບລ້າງບ້ານທີ່ຍັງທຸກຍາກໃຫ້ໄດ້ 8 ບ້ານ.
ດ້ານວັດທະນະທໍາ-ສັງຄົມ ຕ້ອງເອົາໃຈໃສ່ພັດທະນາຊັບພະຍາກອນມະນຸດ ແລະ ການຄຸ້ມຄອງສັງຄົມ ໂດຍສຸມໃສ່ສ້າງໃຫ້ຄົນມີແນວຄິດຮັກຊາດ, ຮັກລະບອບໃໝ່, ມີຄຸນສົມບັດ-ສິນທຳປະຕິວັດ, ມີລະດັບຄວາມຮູ້-ຄວາມສາມາດ, ສຸຂະພາບແຂງແຮງ, ເສີມຂະຫຍາຍ ແລະ ປົກປັກຮັກສາວັດທະນະທຳອັນດີງາມຂອງຊາດ-ຂອງເຜົ່າ. ສູ້ຊົນປະຕິບັດໃຫ້ບັນລຸເປົ້າໝາຍການພັດທະນາແບບຍືນຍົງ ໃຫ້ໄດ້ຢ່າງຂາດຕົວ, ປັບປຸງລະບົບການເມືອງໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ, ຍົກສູງສະຕິເປັນເຈົ້າຕົນເອງຕໍ່ໜ້າທີ່ການເມືອງຂອງພັກໃນແຕ່ລະໄລຍະ, ຄະນະພັກແຕ່ລະຂັ້ນ, ສະມາຊິກພັກແຕ່ລະສະຫາຍ,ຕ້ອງຍົກສູງບົດບາດການນຳພາ ຄວາມເປັນແບບຢ່າງນຳໜ້າ, ສະມາຊິກພັກທີ່ຮັບຜິດຊອບຢູ່ແຕ່ລະຂົງເຂດວຽກງານ-ທ້ອງຖິ່ນ ແລະ ໃຫ້ຖືເອົາວຽກງານສຶກສາອົບຮົມການເມືອງ - ແນວຄິດເປັນກົກ. ສ້າງທັດສະນະທາງດ້ານການເມືອງ ແລະ ອຸດົມການປະຕິວັດ ໃນຖັນແຖວພະນັກງານ, ສະມາຊິກພັກ, ປະຊາຊົນບັນດາເຜົ່າ ໃຫ້ມີຄວາມໜັກແໜ້ນ, ສ້າງພະນັກງານຫຼັກແຫຼ່ງ, ພະນັກງານສືບທອດໜຸ່ມແໜ້ນ ໃຫ້ໄດ້ຫຼາຍຂຶ້ນບັນຈຸສັບຊ້ອນເຂົ້າໃນລະບົບການຈັດຕັ້ງ, ເຮັດໃຫ້ການຈັດຕັ້ງທຸກຂັ້ນມີຄວາມໜັກແໜ້ນເຂັ້ມແຂງ.
 |
ໃນໂອກາດນີ້, ສະຫາຍ ສອນທະນູ ທຳມະວົງ ໄດ້ກ່າວສະຫຼຸບວ່າ: ກອງປະຊຸມໃຫຍ່ ຄັ້ງທີ VIII ອົງຄະນະພັກແຂວງ ໄດ້ສຳເລັດລົງດ້ວຍໝາກຜົນອັນຈົບງາມ, ແຕ່ພວກເຮົາ ຍັງມີໜ້າທີ່ສຳຄັນ ແລະ ໜັກໜ່ວງໃນຕໍ່ໜ້າ ນັ້ນແມ່ນຄວາມຮັບຜິດຊອບ ໃນການຫັນເອົາມະຕິກອງປະຊຸມໃຫຍ່ຄັ້ງນີ້ ໄປຈັດຕັ້ງປະຕິບັດຢູ່ແຕ່ລະຂົງເຂດວຽກງານ, ເພື່ອນຳພາປະຊາຊົນບັນດາເຜົ່າຈັດຕັ້ງປະຕິບັດໃຫ້ເກີດໝາກເກີດຜົນຕົວຈິງ, ບັນດາສະຫາຍຄະນະບໍລິຫານງານພັກແຂວງຊຸດໃໝ່ ທີ່ໄດ້ຮັບຄວາມໄວ້ວາງໃຈ ເລືອກຕັ້ງຈາກກອງປະຊຸມ ຈົ່ງໄດ້ເຊີດຊູຄວາມຮັບຜິດຊອບໜ້າທີ່ການເມືອງຂອງຕົນ ເປັນແບບຢ່າງນຳໜ້າໃນທຸກດ້ານ, ບຸກບືນກ້າວຂຶ້ນ ດ້ວຍການເສີມຂະຫຍາຍກຳລັງແຮງ, ສະຕິປັນຍາ, ມີຫົວຄິດປະດິດສ້າງ ພ້ອມກັບປະຊາຊົນບັນດາເຜົ່າ ສຸມໃສ່ພັດທະນາແຂວງບໍລິຄຳໄຊພວກເຮົາໃຫ້ກ້າວຂຶ້ນ ແລະ ຂະຫຍາຍຕົວຢ່າງບໍ່ຢຸດຢັ້ງ. ຜົນສຳເລັດຂອງກອງປະຊຸມໃຫຍ່ຄັ້ງນີ້ ເປັນການຢັ້ງຢືນອີກຄັ້ງໜຶ່ງເຖິງຄວາມສາມັກຄີເປັນເອກະພາບ, ນ້ຳໃຈຮັບຜິດຊອບສູງຂອງບັນດາສະຫາຍຜູ້ແທນ, ທັງເປັນຂີດໝາຍທີ່ສຳຄັນໃນຂະບວນການເຕີບໃຫຍ່ຂະຫຍາຍຕົວທີ່ໜັກແໜ້ນ, ເຂັ້ມແຂງ ຂອງອົງຄະນະພັກແຂວງພວກເຮົາ ແລະ ປະກາດປິດກອງປະຊຸມໃຫຍ່ ຄັ້ງທີ VIII ອົງຄະນະພັກແຂວງບໍລິຄຳໄຊ ຢ່າງເປັນທາງການ ແຕ່ເວລານີ້ເປັນຕົ້ນໄປ.
ຂ່າວ-ພາບ: ບຸນຕອມ.
ຄໍາເຫັນ