ໃນທ່າມກາງບັນຍາກາດທີ່ເຕັມໄປດ້ວຍຄວາມເບີກບານມ່ວນຊື່ນ ທີ່ປະຊາຊົນຫວຽດນາມອ້າຍນ້ອງ ພວມຫ້າງຫາກະກຽມສະເຫຼີມສະຫຼອງບຸນປີໃໝ່ປະເພນີ (ເຕັດ) ປີມະເມຍ 2026, ຕາງໜ້າ ພັກ, ລັດ, ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສົ່ງຄໍາອວຍພອນໄຊອັນປະເສີດ, ຄວາມຢ້ຽມຢາມຖາມຂ່າວອັນອົບອຸ່ນ ແລະ ໄມຕີຈິດມິດຕະພາບ, ຄວາມສາມັກຄີຮັກແພງອັນດູດດື່ມ ມາຍັງ ສະຫາຍ ແລະ ຜ່ານສະຫາຍ ໄປຍັງບັນດາສະຫາຍການນໍາ ພັກ, ລັດ ແລະ ປະຊາຊົນຫວຽດນາມ ອ້າຍນ້ອງທຸກຖ້ວນໜ້າ.
ພັກ, ລັດ ແລະ ປະຊາຊົນລາວ ມີຄວາມຍິນດີ ແລະ ພາກພູມໃຈ ຕໍ່ບັນດາຜົນສໍາເລັດອັນໃຫຍ່ຫຼວງ, ຮອບດ້ານ ແລະ ມີຄວາມໝາຍປະຫວັດສາດທີ່ ພັກ, ລັດ ແລະ ປະຊາຊົນຫວຽດນາມ ອ້າຍນ້ອງ ຍາດມາໄດ້ຕະຫຼອດໄລຍະຜ່ານມາ, ພິເສດແມ່ນ ຜົນສໍາເລັດອັນສະຫງ່າງາມຂອງ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIV ຂອງ ພັກກອມມູນິດຫວຽດນາມ ທີ່ເປັນຂີດໝາຍເປີດສູ່ສັງກາດໃໝ່ແຫ່ງການພັດທະນາຢ່າງແຂງແຮງຂອງຫວຽດນາມ. ສິ່ງດັ່ງກ່າວ ເປັນບົດຮຽນອັນລໍ້າຄ່າ ແລະ ເປັນການປຸກລະດົມກໍາລັງໃຈອັນໃຫຍ່ຫຼວງໃຫ້ແກ່ ພັກ, ລັດ ແລະ ປະຊາຊົນລາວ ພວກຂ້າພະເຈົ້າ ໃນການພັດທະນາປະເທດຊາດຂອງຕົນ ກ້າວຂຶ້ນຢ່າງແຂງແຮງ.
ຂ້າພະເຈົ້າ ເຊື່ອໝັ້ັ້ນວ່າ ພາຍໃຕ້ການນຳພາອັນສະຫຼາດສ່ອງໃສຂອງ ພັກກອມມູນິດຫວຽດນາມ ໂດຍມີ ສະຫາຍເລຂາທິການໃຫຍ່ ໂຕ ເລິມ ເປັນຜູ້ນໍາໜ້ານັ້ນ, ປະຊາຊົນຫວຽດນາມ ອ້າຍນ້ອງ ຈະສາມາດບັນລຸບັນດາເປົ້າໝາຍທີ່ ກອງປະຊຸມໃຫຍ່ ຄັ້ງທີ XIV ຂອງພັກ ວາງອອກຢ່າງມີໄຊ ເພື່ອສ້າງປະເທດຫວຽດນາມ ສັນຕິພາບ, ເອກະລາດ, ປະຊາທິປະໄຕ, ຮັ່ງມີ, ວັດທະນາຖາວອນ, ສີວິໄລ, ຜາສຸກ ແລະ ກ້າວຂຶ້ນສູ່ສັງຄົມນິຍົມ ຢ່າງໜັກແໜ້ນ.
ຂ້າພະເຈົ້າ ຍັງມີຄວາມຊົງຈໍາອັນດີ ແລະ ຕີລາຄາສູງ ຜົນການພົບປະສອງຝ່າຍຂອງພວກເຮົາ ໃນໂອກາດຢ້ຽມຢາມລັດຖະກິດເຊິ່ງກັນ ແລະ ກັນ, ລວມທັງຜົນການພົບປະຜູ້ນໍາສູງສຸດ 3 ພັກ ລາວ-ຫວຽດນາມ-ກໍາປູເຈຍ ໃນຕົ້ນເດືອນກຸມພາ ຜ່ານມາ ແລະ ຍິນດີສືບຕໍ່ຮ່ວມກັບ ສະຫາຍ ກໍຄື ການນໍາຂັ້ນສູງ ພັກ, ລັດ ຫວຽດນາມ ຊີ້ນໍາການຜັນຂະຫຍາຍຜົນການພົບປະດັ່ງກ່າວ ໃຫ້ມີຜົນສໍາເລັດເປັນຮູບປະທໍາ ເຮັດໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ການເປັນຫຸ້ນສ່ວນຍຸດທະສາດ ລາວ-ຫວຽດນາມ, ຫວຽດ ນາມ-ລາວ ໃຫ້ນັບມື້ນັບກ້າວເຂົ້າສູ່ລວງເລິກ ເພື່ອນໍາເອົາຜົນປະໂຫຍດຕົວຈິງ ມາສູ່ປະຊາຊົນສອງຊາດພວກເຮົາ ນັບມື້ນັບຫຼາຍຂຶ້ນ.
ໃນໂອກາດປີໃໝ່ ອັນເປັນສິລິມຸງຄຸນນີ້, ຂ້າພະເຈົ້າ ຂໍອວຍພອນໄຊມາຍັງ ສະຫາຍ ພ້ອມດ້ວຍຄອບຄົວ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ປະສົບຜົນສໍາເລັດໃນພາລະກິດອັນມີກຽດສູງສົ່ງຂອງ ສະຫາຍ. ຂໍໃຫ້ປີໃໝ່ 2026 ນີ້ ເປັນປີແຫ່ງການເລີ່ມຕົ້ນສັງກາດໃໝ່ ທີ່ນໍາເອົາຄວາມສົມບູນພູນສຸກ ແລະ ໄຊຊະນະອັນຍິ່ງໃຫຍ່ມາສູ່ປະຊາຊົນຫວຽດນາມ.
ໃນໂອກາດດຽວກັນນີ້, ສະຫາຍ ບຸນເຫຼືອ ພັນດານຸວົງ, ກໍາມະການສູນກາງພັກ, ເລຂາຄະນະພັກ, ຫົວໜ້າຄະນະພົວພັນຕ່າງປະເທດສູນກາງພັກປະຊາຊົນປະຕິວັດລາວ ກໍໄດ້ສົ່ງສານອວຍພອນເຖິງ ສະຫາຍ ເລ ຮວາຍ ຈູງ, ກໍາມະການກົມການເມືອງສູນກາງພັກ, ເລຂາຄະນະພັກ, ລັດຖະມົນຕີກະຊວງການຕ່າງປະເທດຫວຽດນາມ ເຊັ່ນດຽວກັນ.
ຄໍາເຫັນ