ການຢ້ຽມຢາມຄັ້ງນີ້, ມີຄວາມໝາຍເປັນສັນຍາລັກອັນເລິກເຊິ່ງ, ເພາະນີ້ເປັນການເດີນທາງຢ້ຽມຢາມຕ່າງປະເທດຄັ້ງທໍາອິດ ຂອງສະຫາຍ ໂຕ ເລິມ ພາຍຫຼັງໄດ້ຮັບເລືອກຕັ້ງໃຫ້ດໍາລົງຕໍາແໜ່ງເລຂາທິການໃຫຍ່ອີກວາລະໜຶ່ງ ແລະ ລາວ ແມ່ນປະເທດທໍາອິດ ທີ່ຖືກເລືອກໃຫ້ເດີນທາງມາຢ້ຽມຢາມໃນລະດັບລັດຖະບານ. ຕາມປະເພນີທີ່ເປັນມູນເຊື້ອດ້ານການທູດຂອງບັນດາພັກກໍາອໍານາດ, ການເລືອກຈຸດໝາຍປາຍທາງທໍາອິດ ສະທ້ອນໃຫ້ເຫັນຢ່າງຊັດເຈນ ເຖິງລໍາດັບຄວາມສໍາຄັນທາງຍຸດທະສາດໃນການຕ່າງປະເທດ. ການທີ່ຫວຽດນາມ ເລີ່ມຕົ້ນວາລະການຕ່າງປະເທດໃໝ່ ດ້ວຍການຢ້ຽມຢາມ ສປປ ລາວ ແມ່ນເຫດການ ການເມືອງທີ່ເຂັ້ມແຂງ, ຢັ້ງຢືນໃຫ້ເຫັນວ່າ: ລາວ ສືບຕໍ່ເຖິງຈຸດພິເສດ ແລະ ມີຄວາມໝາຍທາງຍຸດທະສາດ ໃນຈິນຕະນາການ ການຕ່າງປະເທດຂອງຫວຽດນາມ.
ການຢ້ຽມຢາມຄັ້ງນີ້, ດໍາເນີນໄປໃນສະພາບການທີ່ສອງປະເທດ ລາວ ແລະ ຫວຽດນາມ ຫາກໍໄດ້ຈັດກອງປະຊຸມໃຫຍ່ຂອງພັກ ສໍາເລັດຜົນ ແລະ ກໍານົດບັນດາທິດທາງໃຫຍ່ ສໍາລັບການພັດທະນາປະເທດໃນໄລຍະໃໝ່. ນີ້ແມ່ນຈຸດເວລາທີ່ມີຄວາມໝາຍພິເສດ ເພື່ອໃຫ້ສອງພັກກໍາອໍານາດ ເພີ່ມທະວີການແລກປ່ຽນຍຸດທະສາດ, ແບ່ງປັນປະສົບການນໍາພາ, ບໍລິຫານການພັດທະນາ ແລະ ການກໍ່ສ້າງພັກ ໃນເງື່ອນໄຂໃໝ່, ພ້ອມທັງເປັນເອກະພາບບັນດາກໍານົດແນວທາງໄລຍະຍາວ ເພື່ອເຮັດໃຫ້ການພົວພັນສອງຝ່າຍ ມີຄວາມເລິກເຊິ່ງກວ່າເກົ່າ.
ໃນບັນດາການພົບປະປຶກສາຫາລື ແລະ ການພົວພັນຂັ້ນສູງທີ່ກໍາລັງດໍາເນີນຢູ່, ສອງຝ່າຍ ໄດ້ມສຸມໃສ່ປຶກສາຫາລືຢ່າງກວ້າງຂວາງ ແລະ ເລິກເຊິ່ງ ກ່ຽວກັບສະຖານະການໂລກ ແລະ ພາກພື້ນ, ພ້ອມທັງບັນດາບັນຫາຍຸດທະສາດການພົວພັນ ລາວ – ຫວຽດນາມ. ສອງຝ່າຍ ໄດ້ເນັ້ນໜັກຈຸດສໍາຄັນຂອງການສືບຕໍ່ຮັກສາຄວາມໄວ້ເນື້ອເຊື່ອໃຈທາງການເມືອງໃນລະດັບສູງສຸດ, ຖືນີ້ແມ່ນພື້ນຖານຫຼັກສໍາຄັນທີ່ສຸດ ເພື່ອຊຸກຍູ້ການຮ່ວມມືໃນທຸກຂົງເຂດ. ຄວາມເປັນຈິງສະແດງໃຫ້ເຫັນວ່າ: ລະດັບຄວາມໄວ້ເນື້ອເຊື່ອໃຈທາງການເມືອງ ລະຫວ່າງລາວ ແລະ ຫວຽດນາມ ແມ່ນຖືກຈັດຢູ່ໃນກຸ່ມທີ່ເລິກເຊິ່ງ ແລະ ໝັ້ນຄົງທີ່ສຸດໃນໂລກ, ສ້າງເງື່ອນໄຂອໍານວຍຄວາມສະດວກ ເພື່ອໃຫ້ສອງປະເທດ ຜັນຂະຫຍາຍບັນດາໂຄງການຮ່ວມມືໄລຍະຍາວ ແລະ ມີລັກສະນະຍຸດທະສາດ.
ເນື້ອໃນທີ່ພົ້ນເດັ່ນໃນການຢ້ຽມຢາມຄັ້ງນີ້ ແມ່ນສອງຝ່າຍ ໄດ້ເນັ້ນໜັກບົດບາດຂອງການຮ່ວມມືດ້ານເສດຖະກິດ, ການລົງທຶນ ແລະ ການຄ້າ ເປັນເສົາຄໍ້າທີ່ນັບມື້ສໍາຄັນຂອງການພົວພັນສອງຝ່າຍ. ປັດຈຸບັນ, ຫວຽດນາມ ແມ່ນໜຶ່ງໃນ 3 ນັກລົງທຶນຕ່າງປະເທດລາຍໃຫຍ່ທີ່ສຸດຢູ່ ສປປ ລາວ, ມີກວ່າ 240 ໂຄງການທີ່ຍັງມີຜົນບັງຄັບໃຊ້ ແລະ ມູນຄ່າທຶນຈົດທະບຽນລວມປະມານ 5,5 ຕື້ໂດລາ. ບັນດາໂຄງການຂອງວິສາຫະກິດຫວຽດນາມ ມຸ່ງເນັ້ນໃນບັນດາຂົງເຂດ: ພະລັງງານ, ແຮ່ທາດ, ກະສິກໍາ – ປ່າໄມ້, ໂທລະຄົມມະນາຄົມ, ການເງິນ – ການທະນາຄານ ແລະ ການບໍລິການ, ປະກອບສ່ວນສໍາຄັນເຂົ້າໃນການພັດທະນາເສດຖະກິດ – ສັງຄົມຂອງລາວ ໂດຍສະເພາະ ໃນບັນດາທ້ອງຖິ່ນເຂດຫ່າງໄກສອກຫຼີກ, ເຂດທຸກຍາກ. ມູນຄ່າການຄ້າສອງຝ່າຍ ໄດ້ຮັກສາຢູ່ໃນລະດັບປະມານ 1,6–1,7 ຕື້ໂດລາຕໍ່ປີ ແລະ ໄດ້ເພີ່ມຂຶ້ນຢ່າງແຮງໃນປີ 2025 ເມື່ອໂຕເລກນີ້ບັນລຸເກືອບ 3 ຕື້ໂດລາ. ນີ້ສ່ອງແສງໃຫ້ເຫັນການເຊື່ອມໂຍງທີ່ນັບມື້ໜັກແໜ້ນຂຶ້ນຢ່າງຕໍ່ເນື່ອງ ລະຫວ່າງ ສອງເສດຖະກິດ.
ຄຽງຄູ່ກັບການຮ່ວມມືດ້ານເສດຖະກິດ, ການຮ່ວມມືດ້ານການສຶກສາ – ຝຶກອົບຮົມ ແລະ ການພັດທະນາແຫຼ່ງຊັບພະຍາກອນມະນຸດ ສືບຕໍ່ໄດ້ຮັບການຢືນຢັນວ່າ: ເປັນໜຶ່ງໃນບັນດາເສົາຄໍ້າທີ່ຍືນຍົງທີ່ສຸດຂອງການພົວພັນ ລາວ – ຫວຽດນາມ. ປັດຈຸບັນ, ຫວຽດນາມ ແມ່ນປະເທດທີ່ຮັບນັກສຶກສາລາວໄປສຶກສາຮໍ່າຮຽນຫຼາຍທີ່ສຸດ, ມີນັກສຶກສາລາວປະມານ 14.000–16.000 ຄົນ ກໍາລັງສຶກສາຢູ່ໃນບັນດາມະຫາວິທະຍາໄລ, ສະຖາບັນ ແລະ ສູນຝຶກອົບຮົມຂອງຫວຽດນາມ. ບຸກຄະລາກອນການນໍາ, ຜູ້ບໍລິຫານ ແລະ ຜູ້ຊ່ຽວຊານຈໍານວນຫຼາຍຂອງລາວ ໄດ້ຈົບຈາກບັນດາສະຖານສຶກສາຂອງຫວຽດນາມ, ກາຍເປັນກໍາລັງແກ່ນສານໃນລະບົບການເມືອງ ແລະ ເສດຖະກິດ – ສັງຄົມຂອງລາວ. ສິ່ງນີ້ສະທ້ອນໃຫ້ເຫັນວິໄສທັດຍຸດທະສາດໄລຍະຍາວຂອງຫວຽດນາມ ໃນການລົງທຶນເຂົ້າໃສ່ຊັບພະຍາກອນມະນຸດຂອງລາວ, ພ້ອມທັງສະແດງໃຫ້ເຫັນຢ່າງເລິກເຊິ່ງດ້ານມະນຸດສະທໍາພິເສດ ຂອງການພົວພັນ ລະຫວ່າງ ສອງປະເທດ.
ການຢ້ຽມຢາມຂອງສະຫາຍ ເລຂາທິການໃຫຍ່ ພັກກອມມູນິດຫວຽດນາມ ແມ່ນມີຄວາມໝາຍສໍາຄັນໃນການເສີມສ້າງການປະສານງານ ລະຫວ່າງ ສອງປະເທດ ໃນບັນດາເວທີພາກພື້ນ ແລະ ສາກົນ ໂດຍສະເພາະໃນກອບຂອງອາຊຽນ ແລະ ບັນດາກົນໄກການຮ່ວມມືອະນຸພາກພື້ນ. ລາວ ແລະ ຫວຽດນາມ ລ້ວນແຕ່ໃຫ້ການສະໜັບສະໜູນເຊິ່ງກັນ ແລະ ກັນ ໃນບັນດາບັນຫາຍຸດທະສາດກ່ຽວກັບສັນຕິພາບ, ສະຖຽນລະພາບ ແລະ ການພັດທະນາຍືນຍົງຂອງພາກພື້ນ. ພ້ອມກັນນັ້ນ, ກໍປະສານສົມທົບຢ່າງໃກ້ຊິດ ເພື່ອປົກປ້ອງຜົນປະໂຫຍດອັນຊອບທໍາຂອງແຕ່ລະຝ່າຍ ໃນສະພາບການແຂ່ງຂັນຍຸດທະສາດ ລະຫວ່າງ ບັນດາປະເທດໃຫຍ່ ທີ່ມີທ່າອ່ຽງເພີ່ມຂຶ້ນຢ່າງຕໍ່ເນື່ອງ.
ການຢ້ຽມຢາມຄັ້ງນີ້ ບໍ່ພຽງແຕ່ມີຄວາມໝາຍດ້ານການເມືອງ – ການຕ່າງປະເທດເທົ່ານັ້ນ, ແຕ່ຍັງມີຄຸນຄ່າຄວາມຈິງໃຈອັນເລິກເຊິ່ງ. ການທີ່ຜູ້ນໍາສູງສຸດຂອງພັກກອມມູນິດຫວຽດນາມ ເລືອກລາວເປັນຈຸດໝາຍປາຍທາງທໍາອິດ ໃນວາລະໃໝ່ ໄດ້ຮັບຮູ້ເຖິງຄໍາຢືນຢັນຢ່າງຈິງໃຈ ກ່ຽວກັບການພົວພັນອ້າຍນ້ອງອັນສັດຊື່ບໍລິສຸດ ລະຫວ່າງ ສອງຊາດລາວ - ຫວຽດນາມ. ນີ້ແມ່ນນໍ້າໃຈທີ່ຫາຍາກໃນການພົວພັນສາກົນ. ໄດ້ຮັບການຝຶກຝົນຫຼໍ່ຫຼອມຈາກປະຫວັດສາດການຕໍ່ສູ້ປະຕິວັດຮ່ວມກັນ, ຜ່ານການທົດສອບທີ່ຍາກລໍາບາກ ແລະ ໄດ້ຮັບເສີມສ້າງ ໃນພາລະກິດການສ້າງສາ ແລະ ປົກປັກຮັກສາປະເທດຊາດໃນປັດຈຸບັນ.
ໃນການຢ້ຽມຢາມ, ສາມາດຢືນຢັນໄດ້ວ່າ: ນີ້ບໍ່ພຽງແຕ່ເປັນເຫດການທາງພິທີການເທົ່ານັ້ນ, ແຕ່ຫາກຍັງແມ່ນການຮ່ວມກັນຂອງວິໄສທັດຍຸດທະສາດ, ຜົນປະໂຫຍດການພັດທະນາໄລຍະຍາວ ແລະ ນໍ້າໃຈພິເສດ ລະຫວ່າງສອງປະຊາຊົນ. ການຢ້ຽມຢາມຂອງ ສະຫາຍ ໂຕເລິມ ໄດ້ສ້າງແຮງຈູງໃຈໃໝ່ໃຫ້ແກ່ການພົວພັນ ລາວ – ຫວຽດນາມ, ເຮັດໃຫ້ການພົວພັນຍຸດທະສາດພິເສດ ມີຄວາມເລິກເຊິ່ງຍິ່ງຂຶ້ນ, ພ້ອມທັງເປີດທັດສະນະການຮ່ວມມືກວ້າງຂວາງກວ່າ ໃນໄລຍະພັດທະນາໃໝ່ຂອງແຕ່ລະປະເທດ.
ຈາກນະຄອນຫຼວງວຽງຈັນ, ພວກເຮົາສາມາດຮັບຮູ້ໄດ້ຢ່າງຊັດເຈນວ່າ: ການຢ້ຽມຢາມນີ້ ບໍ່ພຽງແຕ່ສະທ້ອນເຖິງການສືບທອດມູນເຊື້ອມິດຕະພາບອັນຍິ່ງໃຫຍ່ ລະຫວ່າງ ສອງພັກ, ສອງລັດ ແລະ ປະຊາຊົນສອງປະເທດເທົ່ານັ້ນ, ແຕ່ຍັງສະແດງໃຫ້ເຫັນຄວາມຕັດສິນໃຈທາງການເມືອງອັນແຂງແກ່ນຂອງຜູ້ນໍາສອງປະເທດ ໃນການນໍາພາການພົວພັນ ລາວ – ຫວຽດນາມ ພັດທະນາຂຶ້ນສູ່ລະດັບສູງໃໝ່, ໃຫ້ສົມກັບຄວາມຍິ່ງໃຫຍ່ທາງປະຫວັດສາດ ແລະ ຄວາມຕ້ອງການຂອງຍຸກສະໄໝ.
ໂດຍ: ສີວັນ
ຄໍາເຫັນ