 |
ໃນພິທີ, ທັງສອງຝ່າຍໄດ້ຮ່ວມກັນສະແດງຄວາມຊົມເຊີຍຕໍ່ຜົນສຳເລັດອັນຍິ່ງໃຫຍ່ຂອງກອງປະຊຸມໃຫຍ່ຄະນະຜູ້ແທນທົ່ວປະເທດ ຄັ້ງທີ XII ຂອງພັກປະຊາຊົນ ປະຕິວັດລາວ ແລະ ກອງປະຊຸມໃຫຍ່ຄະນະຜູ້ແທນທົ່ວປະເທດ ຄັ້ງທີ XIV ຂອງພັກກອມມູນິດຫວຽດນາມ. ພ້ອມນັ້ນ ສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ແຂວງອັດຕະປື ແລະ ແຂວງກວາງຫງາຍ ທີ່ນັບມື້ນັບກ້າວເຂົ້າສູ່ລວງເລິກ ແລະ ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ.
ສະຫາຍ ບຸນເຖິງ ດວງສະ ຫວັນ ໄດ້ຕາງໜ້າໃຫ້ຄະນະນຳ ແລະ ປະຊາຊົນຊາວແຂວງອັດຕະປື ໄດ້ກ່າວຄຳອວຍພອນໄຊອັນປະເສີດ ເນື່ອງໃນໂອກາດປີໃໝ່ປະຈຳຊາດຫວຽດນາມ ປີ 2026ນີ້, ຂໍສົ່ງພອນໄຊອັນປະເສີດ ມາຍັງສະຫາຍ ໂຮ່ ວັນ ນຽນ ພ້ອມດ້ວຍຄະນະນຳທຸກຂັ້ນ, ຕະຫຼອດຮອດພະນັກງານ-ລັດຖະກອນ, ກຳລັງ ປກຊ-ປກສ ແລະ ປະຊາຊົນຊາວແຂວງກວາງຫງາຍ ທຸກຖ້ວນໜ້າ ຈົ່ງມີສຸຂະພາບແຂງແຮງ, ມີຄວາມຜາສຸກທັງກາຍ ແລະ ໃຈ, ປະສົບຜົນສຳເລັດໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XIV ຂອງພັກກອມມູນິດຫວຽດນາມ, ອວຍພອນໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງຊາດ ລາວ-ຫວຽດນາມ ເວົ້າລວມ, ເວົ້າສະເພາະ ລະຫວ່າງ ແຂວງອັດຕະປື ແລະ ແຂວງກວາງຫງາຍ ຈົ່ງໝັ້ນຄົງຕະຫຼອດໄປ.
ໂອກາດນີ້, ແຂວງອັດຕະປື ຍັງໄດ້ມອບເຄື່ອງຊ່ວຍເຫຼືອ ໃຫ້ແກ່ປະຊາຊົນແຂວງກວາງຫງາຍ ທີ່ໄດ້ຮັບຜົນກະທົບໄພພິບັດທາງທໍາມະຊາດ ຈາກເຫດການລົມພະຍຸພັດ ໃນລະຫວ່າງເດືອນຕຸລາ ຫາ ເດືອນພະຈິກ ປີ 2025 ທີ່ຜ່ານມາ, ຊຶ່ງປະກອບມີ ເຂົ້າສານ ຈຳນວນ 1 ໂຕນ ແລະ ເງິນສົດ 150 ລ້ານກີບ.
(ຂ່າວ-ພາບ: ຫັດສະດີ)
ຄໍາເຫັນ