ສະຫາຍໂຕເລິມ ພົບປະໂອ້ລົມ ພະນັກງານຫຼັກແຫຼ່ງ, ຄູ-ອາຈານ ແລະ ນັກສຶກສາ ສມປຊ

ການຢ້ຽມຢາມຄັ້ງນີ້ ດຳເນີນໄປເນື່ອງໃນໂອກາດທີ່ ສະຫາຍ ໂຕ ເລີມ ເດີນທາງມາຢ້ຽມຢາມລັດຖະກິດ ຢູ່ ສປປ ລາວ ລະຫວ່າງວັນທີ 1-2 ທັນວາ 2025, ພິທີຕ້ອນຮັບທີ່ ສມປຊ ໄດ້ຈັດຂຶ້ນຢ່າງສົມກຽດ ໂດຍເປັນກຽດເຂົ້າຮ່ວມຂອງ ສະຫາຍ ທອງລຸນສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນປະຕິວັດລາວ, ປະທານປະເທດແຫ່ງ ສປປ ລາວ ພ້ອມດ້ວຍຄະນະ.ໃຫ້ກຽດຕ້ອນຮັບຂອງ ສະຫາຍ ພູວົງ ອຸ່ນຄຳແສນ ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າ ສມປຊ, ພ້ອມດ້ວຍຄະນະພັກ, ຄະນະນຳ, ພະນັກງານ, ຄູ-ອາຈານ ແລະ ນັກສຶກສາເຂົ້າຮ່ວມ ໃນພິທີດັ່ງກ່າວ, ສະຫາຍ ພູວົງ ອຸ່ນຄຳແສນ ໄດ້ລາຍງານໂດຍສັງເຂບ ກ່ຽວກັບປະຫວັດຄວາມເປັນມາ ແລະການເຕີບໃຫຍ່ຂະຫຍາຍຕົວຂອງ ສມປຊ ເຊິ່ງເປັນສັນຍາລັກທີ່ມີຊີວິດຊີວາຂອງການຮ່ວມມືລາວ-ຫວຽດນາມ. ສມປຊ ມີຕົ້ນກຳເນີດມາຈາກ“ໂຮງຮຽນສາມັກຄີ”ທີ່ໄດ້ຮັບການສ້າງຕັ້ງຂຶ້ນໃນປີ 1964 ຢູ່ດິນແດນຂອງ ສສ ຫວຽດນາມ.ຊື່ຂອງໂຮງຮຽນໄດ້ສ່ອງແສງໃຫ້ເຫັນເຖິງຄວາມສາມັກຄີອັນດູດດື່ມ ລະຫວ່າງສູນກາງພັກປະຊາຊົນລາວ ແລະ ພັກຄົນງານຫວຽດນາມ ໃນສະໄໝຕໍ່ສູ້ກູ້ຊາດ, ໂດຍມີຄະນະອຳນວຍການຮ່ວມ ລາວ-ຫວຽດນາມ (ທ່ານ ໂຮ່ສີເຕືອງ ແລະ ສະຫາຍ ສີສົມພອນລໍວັນໄຊ) ເຮັດໜ້າທີ່ຄົ້ນຄວ້າທິດສະດີມາກເລນິນແລະຖອດຖອນບົດຮຽນການປະຕິວັດເພື່ອຮັບໃຊ້ພາລະກິດປົດປ່ອຍຊາດ.

ເພື່ອຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່, ໃນເດືອນກຸມພາ 1995, ກົມການເມືອງສູນກາງພັກ ໄດ້ຕົກລົງໂຮມ “ໂຮງຮຽນຊັ້ນສູງພັກ-ລັດ” ແລະ “ໂຮງຮຽນການປົກຄອງ ແລະ ຄຸ້ມຄອງແຫ່ງຊາດ” ເຂົ້າກັນ, ກາຍມາເປັນສະຖາບັນການເມືອງ ແລະ ການປົກຄອງແຫ່ງຊາດໃນປັດຈຸບັນ.

ການລາຍງານແມ່ນການຍົກໃຫ້ເຫັນເຖິງໝາກຜົນແຫ່ງການຮ່ວມມື ລະຫວ່າງ ສມປຊ ແລະສະຖາບັນການເມືອງແຫ່ງຊາດໂຮ່ຈີມິນ.ການຮ່ວມມືນີ້ບໍ່ພຽງແຕ່ເປັນການແລກປ່ຽນທາງວິຊາການເທົ່ານັ້ນແຕ່

ຍັງເປັນການສ້າງຄວາມເປັນເອກະພາບທາງດ້ານທິດສະດີ ແລະ ອຸດົມການໃຫ້ແກ່ສອງພັກ.ຜົນງານອັນພົ້ນເດັ່ນທີ່ສຸດໃນປະຫວັດສາດການຮ່ວມມື ແມ່ນການສຳເລັດໂຄງການແປນິພົນເລືອກເຟັ້ນຂອງ ມາກ-ອັງແກນ, ເລນິນ, ໂຮ່ຈີມິນ ແລະ ນິພົນຄົບຊຸດ ໂຮ່ຈີມິນ ຈຳນວນ 15 ເຫຼັ້ມພ້ອມດ້ວຍວັດຈະນານຸກົມ ຫວຽດນາມ-ລາວ. ນີ້ຖືເປັນຄັ້ງທຳອິດໃນປະຫວັດສາດລາວທີ່ມີຄັງສາງທິດສະດີພື້ນຖານຂອງລັດທິມາກ-ເລນິນ ທີ່ເປັນພາສາລາວຢ່າງສົມບູນເພື່ອຮັບໃຊ້ການຄົ້ນຄວ້າ, ການຮຽນ-ການສອນ ແລະການກຳນົດແນວທາງນະໂຍບາຍຂອງພັກ-ລັດ.

ນອກຈາກນີ້, ພັກ-ລັດ ແລະ ປະຊາຊົນຫວຽດນາມ ຍັງໄດ້ໃຫ້ການຊ່ວຍເຫຼືອຢ່າງມະຫາສານໃນການກໍ່ສ້າງພື້ນຖານໂຄງລ່າງ.ພິເສດແມ່ນໂຄງການກໍ່ສ້າງສະຖາບັນການ

ເມືອງ ແລະ ການປົກຄອງແຫ່ງຊາດ ປະຈຳພາກໃຕ້ (ແຂວງຈຳປາສັກ)ເຊິ່ງເປັນໂຄງການຂະໜາດໃຫຍ່ ເພື່ອຂໍ່ານັບຮັບຕ້ອນ ວັນສະຖາປະນາ ສປປ ລາວ ຄົບຮອບ 50 ປີ ແລະ ວັນເກີດ ປະທານ ໄກສອນ ພົມວິຫານ ຄົບຮອບ 105 ປີ.

ໃນວາລະການພົບປະໂອ້ລົມ, ສະຫາຍ ໂຕ ເລິມ ໄດ້ໂອ້ລົມ ນະໂຍບາຍກ່ຽວກັບການພົວພັນຮ່ວມມື ຫວຽດນາມ – ລາວ; ແນວທາງນະໂຍບາຍ ຂອງ ສສ ຫວຽດນາມໃນໄລຍະໃໝ່ ຕໍ່ກັບພະນັກງານ, ຄູ-ອາຈານ ແລະ ນັກສຶກສາວ່າ: “ເພື່ອເປັນການສືບທອດມິດຕະພາບອັນຍິ່ງໃຫຍ່, ເພີ່ມພູນຄູນສ້າງສາຍພົວພັນ, ຄວາມສາມັກຄີພິເສດ, ປັບປຸງການຮ່ວມມືຮອບດ້ານ ແລະຍູ້ແຮງການເປັນຮ່ວມມືຍຸດທະສາດລາວ-ຫວຽດນາມ ໃນໄລຍະໃໝ່, ຂ້າພະເຈົ້າຄິດວ່າພວກເຮົາຕ້ອງຢຶດໝັ້ນບາງພື້ນຖານແນວຄິດດັ່ງນີ້:

1. ຢຶດໝັ້ນເປົ້າໝາຍເອກະລາດແຫ່ງຊາດກັບສັງຄົມນິຍົມ.ສອງພັກລ້ວນແລ້ວແຕ່ເລືອກເອົາເສັ້ນທາງເອກະລາດ

ແຫ່ງຊາດ ຕິດພັນກັບສັງຄົມນິຍົມ, ສ້າງລັດແຫ່ງກົດໝາຍສັງຄົມນິຍົມ ຂອງປະຊາຊົນ, ໂດຍປະຊາຊົນ, ເພື່ອປະຊາຊົນ.ພັດທະນາພື້ນຖານເສດຖະກິດຕະຫຼາດຕາມທິດສັງຄົມນິຍົມ.ໃນສະພາບການໂລກມີຫຼາຍທ່າອ່ຽງ, ຮູບແບບ, ທິດສະດີທີ່ແຕກຕ່າງກັນ, ຫວຽດນາມ ແລະລາວ ຍິ່ງຕ້ອງໄດ້ແລກປ່ຽນ, ແບ່ງປັນ, ເພີ່ມເຕີມ, ສ້າງຄວາມກະຈ່າງແຈ້ງຍິ່ງຂຶ້ນຕໍ່ເສັ້ນທາງທີ່ພວກເຮົາໄດ້ເລືອກເອົາບົນພື້ນຖານຕົວຈິງອັນມີຊີວິດຊີວາຂອງແຕ່ລະປະເທດ.ຮ່ວມກັນແລກປ່ຽນບັນດາຜົນສຳເລັດ, ບັນດາບົດຮຽນໃນການນຳໃຊ້, ໝູນໃຊ້ຢ່າງມີປະສິດທິຜົນ, ປະດິດສ້າງທິດສະດີ ເຂົ້າໃນພຶດຕິກຳຕົວຈິງ.

2. ພ້ອມກັນສ້າງເສັ້ນຊາຍແດນແຫ່ງສັນຕິພາບ, ມິດຕະພາບ ແລະຮ່ວມມືພັດທະນາໄປພ້ອມກັນ. ເສັ້ນຊາຍແດນລາວ-ຫວຽດນາມ ໄດ້ກຳນົດ ແລະປັກຫຼັກໝາຍສຳເລັດແລ້ວ, ແຕ່ວ່າຊາຍແດນທາງທັງສອງປະເທດຕ້ອງກາຍເປັນຂົວຕໍ່ແຫ່ງມິດຕະພາບ, ເປັນຂົວຕໍ່ລະຫວ່າງປະຊາຊົນທັງສອງປະເທດ, ເປັນຂົວຕໍ່ລະຫວ່າງແລວທາງເສດຖະກິດ, ຂົວຕໍ່ລະຫວ່າງພື້ນທີ່ພັດທະນາສີຂຽວ, ຍືນຍົງ, ກົມກຽວກັບທຳມະຊາດ.ເປົ້າໝາຍຂອງການສ້າງເສັ້ນຊາຍແດນເປັນຊາຍແດນແຫ່ງສັນຕິພາບ, ມິດຕະພາບ ແລະການຮ່ວມມື ເພື່ອພັດທະນາໄປພ້ອມກັນນັ້ນເປັນທັງຄວາມເລັ່ງທວງດ້ານວຽກງານການເມືອງປ້ອງກັນຊາດ-ປ້ອງກັນຄວາມສະຫງົບ, ທັງເປັນໂອກາດການພັດທະນາເສດຖະກິດ, ວັດທະນະທຳ-ສັງຄົມຂອງສອງປະເທດ ແລະ ໃນນີ້ຄວາມສາມັກຄີພິເສດແມ່ນໂລ້ກຳບັງທີ່ນິ້ມນວນ ແລະ ເຂັ້ມແຂງທີ່ສຸດ.ເມື່ອມີຄວາມເຊື່ອໝັ້ນຍຸດທະສາດທີ່ແໜ້ນແຟ້ນແລ້ວ, ທຸກກົນອຸບາຍແບ່ງແຍກ, ສັກສົນ, ຊ່ວຍໃຊ້ ລ້ວນແຕ່ຖືກປະລາໄຊ.ເມື່ອປະຊາຊົນສອງພາກຊາຍແດນເປັນດັ່ງສະຫາຍອ້າຍນ້ອງ, ເພື່ອນມິດ, ຄູ່ຮ່ວມມືທີ່ເຊື່ອໝັ້ນແລ້ວ, ຊາຍແດນກໍ່ຈະກາຍເປັນສາຍຮັດແຫ່ງການຮ່ວມມືພັດທະນາ, ເປັນສາຍເຊືອກຮັດແໜ້ນຄວາມສາມັກຄີ.

3. ເພີ່ມເຕີມ, ສະໜັບສະໜູນກັນດ້ານແຫຼ່ງກຳລັງແຮງ, ຊັບພະຍາກອນ, ພື້ນທີ່ພັດທະນາ. ດ້ວຍວິໄສທັດຍຸດທະສາດ, ພວກເຮົາເຫັນວ່າລາວມີທ່າແຮງທີ່ຕັ້ງເປັນສູນກາງເທິງແຜ່ນດິນໃນ, ມີທ່າແຮງບົ່ມຊ້ອນດ້ານຊັບພະຍາກອນທຳມະຊາດຫຼາຍ,ມີພື້ນທີ່ພັດທະນາສີຂຽວ.ຫວຽດນາມມີທ່າແຮງຊາຍຝັ່ງທະເລທີ່ຍາວ, ເປັນປະຕູອອກສູ່ທະເລຂອງອະນຸພາກພື້ນແມ່ນ້ຳຂອງທີ່ກວ້າງໃຫຍ່, ມີກຳລັງແຮງງານອຸດົມສົມບູນ, ເສດຖະກິດຫຼາກຫຼາຍ, ເຊື່ອມໂຍງຢ່າງເລິກເຊິ່ງກັບພາກພື້ນ ແລະ ສາກົນ.ຖ້າຫາກພັດທະນາສະເພາະແຕ່ລະປະເທດ,ພວກເຮົາຈະຈຳກັດຮັດແຄບພື້ນທີ່ການພັດທະນາຂອງຕົນເອງ. ແຕ່ຖ້າເພີ່ມເຕີມໃຫ້ແກ່ກັນແລະ ເຊື່ອມສານທາງດ້ານແຫຼ່ງກຳລັງແຮງແລ້ວ, ທ່າໄດ້ປ່ຽບຮ່ວມກັນຫຼາຍໆຢ່າງຈະເກີດຂຶ້ນ, ສ້າງຜົນປະໂຫຍດສູງສຸດຕໍ່ແຫຼ່ງກຳລັງແຮງ ເພື່ອພັດທະນາຢ່າງວ່ອງໄວ, ຍືນຍົງ.ການຂົນສົ່ງສິນຄ້າ, ນັກທ່ອງທ່ຽວຈາກລາວ ສາມາດອອກສູ່ທະເລໄດ້ວ່ອງໄວຂຶ້ນຜ່ານທ່າເຮືອ, ທາງທະເລດ້ານຊາຍແດນຕາເວັນອອກຂອງຫວຽດນາມ. ແຫຼ່ງໄຟຟ້າ, ພະລັງງານທົດແທນຂອງລາວ ສາມາດເຊື່ອມໂຍງກັບເຄືອຂ່າຍໄຟຟ້າໃນພາກພື້ນຜ່ານຫວຽດນາມ.

ຂ້າພະເຈົ້າຂໍແຈ້ງໃຫ້ບັນດາສະຫາຍໄດ້ຊາບວ່າ ໃນໄລຍະປີ 2021-2025 ຫວຽດນາມໄດ້ຊ່ວຍເຫຼືອລາວປະຕິບັດໄດ້ 25 ໂຄງການ, ມູນຄ່າການຊ່ວຍເຫຼືອປະມານ 4 ພັນຕື້ດົ່ງ, ປະກອບມີ 6 ໂຄງການດ້ານການສຶກສາກໍ່ສ້າງ, 3 ໂຄງການໃນຂົງເຂດສາທາລະນະສຸກ, 4 ໂຄງການໃນຂົງເຂດວິທະຍາສາດ ແລະ ເຕັກໂນໂລຊີ, 6 ໂຄງການໃນຂົງເຂດອື່ນໆ. ຫວຽດນາມມີການລົງທຶນຢູ່ລາວ 276 ໂຄງການ, ໂດຍມີມູນຄ່າການຈົດທະບຽນຫຼາຍກວ່າ 6 ຕື້ໂດລາສະຫະລັດ.”
ພິທີຢ້ຽມຢາມແລະ ພົບປະໂອ້ລົມ ຂອງ ສະຫາຍ ໂຕເລິມ ຢູ່ ສມປຊໄດ້ສິ້ນສຸດລົງດ້ວຍບັນຍາກາດແຫ່ງໄມຕີຈິດມິດຕະພາບ.ການຢ້ຽມຢາມຄັ້ງນີ້ບໍ່ພຽງແຕ່ເປັນກຽດແກ່ສະຖາ

ບັນເທົ່ານັ້ນ, ແຕ່ຍັງເປັນ “ແຮງບັນດານໃຈ”ອັນຍິ່ງໃຫຍ່ໃຫ້ແກ່ພະນັກງານ, ຄູ-ອາຈານ ແລະ ນັກສຶກສາໃນການສືບຕໍ່ພາລະກິດສ້າງຄົນ, ສ້າງແນວຄິດໃຫ້ພັດທະນາຢ່າງຢຸດຢັ້ງ.

ຂ່າວ/ພາບ ຕາອັອດ ແສນທະວີສຸກ