 |
ທ່ານ ຂັນໄຊ ຣັດຖະເຮົ້າ ໄດ້ຍົກໃຫ້ເຫັນເຖິງຄວາມໝາຍຄວາມສໍາຄັນ ແລະ ປະຫວັດສາດການຕໍ່ສູ້ອັນພິລະອາດຫານຂອງສອງຊາດ ລາວ-ຫວຽດນາມ ເຊິ່ງໄດ້ກໍາເນີດ ແລະ ຫຼໍ່ຫຼອມມາຈາກການນໍາພາຂອງພັກກອມມູນິດອິນດູຈີນ ໂດຍແມ່ນປະ ທານ ໂຮ່ຈິມິນ ເປັນຜູ້ກໍ່ຕັ້ງຂຶ້ນໃນປີ 1930, ສອງປະເທດມີຊາຍແດນຕິດຈອດກັນ, ໄດ້ຮ່ວມຊາຕາກໍາປະຫວັດສາດຄຽງບ່າຄຽງໄຫຼ່ກັນຕໍ່ສູ້ຕ້ານສັດຕູໂຕດຽວກັນ ທັງພວກລ່າເມືອງຂຶ້ນແບບເກົ່າ ແລະ ແບບໃໝ່; ດ້ວຍຄໍາເວົ້າທີ່ວ່າ “ການຊ່ວຍເຫຼືອເພື່ອນປຽບເໝືອນການຊ່ວຍເຫຼືອຕົນເອງ”, ກອງທັບ ແລະ ປະຊາຊົນສອງຊາດໄດ້ຮ່ວມສຸກຮ່ວມທຸກ, ແບ່ງປັນເຂົ້າເມັດຫັກ-ຜັກເສັ້ນດຽວ, ຕ້ານສົງຄາມຮຸກຮານໃນຫຼາຍບັ້ນຮົບທີ່ເປັນປະຫວັດສາດ ເຊັ່ນ: ບັ້ນຮົບທ່າແຂກ, ບັ້ນຮົບປົດປ່ອຍຊໍາເໜືອ, ບັ້ນຮົບດຽນບຽນຝູ ແລະ ບັ້ນຮົບລາມເຊີນ 719 (ທາງເລກ 9) ແຂວງສະຫວັນນະເຂດ. ການຮ່ວມພົນສູ້ຮົບອັນສັດຊື່ບໍລິສຸດນີ້ ໄດ້ກາຍເປັນປັດໄຈຕັດສິນໄຊຊະນະ, ນໍາໄປສູ່ການປົດປ່ອຍປະເທດຊາດຢ່າງສົມບູນ ແລະ ສະຖາປະນາ ສປປ ລາວ ໃນປີ 1975.
ມາໃນໄລຍະປົກປັກຮັກສາ ແລະ ສ້າງສາພັດທະນາປະເທດຊາດ, ໂດຍສະເພາະພາຍຫຼັງການເຊັນສົນທິສັນຍາມິດຕະພາບ ແລະ ການຮ່ວມມື ໃນປີ 1977, ສາຍພົວພັນຂອງສອງຊາດໄດ້ເຂົ້າສູ່ສັກກະຫຼາດໃໝ່, ດ້ານການເມືອງ-ການຕ່າງປະເທດ ໄດ້ຮັບການຮັດແໜ້ນຢ່າງແຂງແຮງ ແລະ ໄວ້ເນື້ອເຊື່ອໃຈກັນໃນລະດັບສູງ. ດ້ານເສດຖະກິດ ຫວຽດນາມ ໄດ້ກາຍເປັນຜູ້ລົງທຶນອັນດັບຕົ້ນໆຂອງການລົງທຶນຕ່າງປະເທດຢູ່ ລາວ, ໃນຂະນະທີ່ມູນຄ່າການຄ້າສອງຝ່າຍເພີ່ມຂຶ້ນທຸກປີ.
 |
ນອກຈາກນີ້, ທັງສອງຝ່າຍຍັງໄດ້ຊຸກຍູ້ໂຄງ ການຄົມມະນາຄົມຍຸດທະສາດ ເຊັ່ນ: ເສັ້ນທາງດ່ວນເຊື່ອມຕໍ່ວຽງຈັນ-ຮ່າໂນ້ຍ, ເສັ້ນທາງລົດໄຟ ວຽງຈັນ-ທ່າແຂກ-ເຕິນເອີບ-ຫວຸ້ງອ່າງ ແລະ ບັນດາເສັ້ນທາງເຊື່ອມຕໍ່ສຳຄັນອື່ນໆ; ພ້ອມທັງຂະຫຍາຍການຮ່ວມມືດ້ານວັດທະນະທໍາ-ສັງຄົມ, ການສຶກສາ ແລະ ການພັດທະນາຊັບພະຍາກອນມະນຸດຢ່າງມີປະສິດທິຜົນ.
ຜົນງານດັ່ງກ່າວພວກເຮົາຕ້ອງຮ່ວມກັນໃນການສືບຕໍ່ເສີມຂະຫຍາຍສາຍພົວພັນຮ່ວມມື ລາວ-ຫວຽດນາມ ໃຫ້ໝັ້ນຄົງຂະນົງແກ່ນຕະຫຼອດໄປ, ໂດຍສະເພາະແມ່ນຄົນຮຸ່ນໜຸ່ມ ໃຫ້ມີຄວາມຮັບຮູ້, ເຂົ້າໃຈເລິກເຊິ່ງກ່ຽວກັບມູນເຊື້ອຄວາມສາມັກ ຄີພິເສດ ລາວ-ຫວຽດນາມ; ຜັນຂະຫຍາຍຂໍ້ຕົກລົງໃຫ້ເກີດຜົນເປັນຈິງ.
ການປະຖະກະຖາໃນຄັ້ງນີ້ ເປັນການຢືນຢັນເຖິງເຈດຈໍານົງອັນເດັດດ່ຽວຂອງທົ່ວແຂວງສາລະວັນ ໃນການປົກປັກຮັກສາ ແລະ ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ໃຫ້ສະຫວ່າງສະໄຫວ ແລະ ຍືນຍົງ ຕະຫຼອດໄປ.
ພາບ-ຂ່າວ: ສ.ພະຈັນ
ຄໍາເຫັນ