ໃນພິທີ, ທ່ານ ພອນຄໍາ ແກ້ວວິໄລ ຮອງຫົວໜ້າຫ້ອງການໂຄສະນາແຫຼ່ງທຶນ ແລະ ຊ່ວຍເຫຼືອບັນເທົາທຸກ, ອົງການກາແດງແຫ່ງຊາດ ໄດ້ກ່າວວ່າ: ການຈັດກິດຈະກຳນີ້ ເພື່ອລະນຶກເຖິງຄຸນງາມຄວາມດີຂອງທ່ານ ອັງຣີດຸຍນັງ ເກີດວັນທີ 8/5/1828 ນັກທຸລະກິດ ສັນຊາດສະວິດ ຜູ້ສ້າງຕັ້ງອົງການກາແດງສາກົນ; ພ້ອມນີ້, ກໍໄດ້ຫວນຄືນປະຫວັດຄວາມເປັນມາຂອງການສ້າງຕັ້ງອົງການກາແດງສາກົນໃນວັນທີ 8/5/1863 ແລະ ໄດ້ຖືເອົາວັນທີ 8 ພຶດສະພາ ຂອງທຸກໆປີ ເປັນວັນກາແດງສາກົນ.
ສໍາລັບປີນີ້, ການເຫຼີມສະຫຼອງວັນກາແດງສາກົນ ແລະ ຊີກວົງເດືອນສາກົນ ຄົບຮອບ 162 ປີ ໄດ້ຈັດຂຶ້ນພາຍໃຕ້ຄໍາຂັວນ “ພວກເຮົາຈະຢືນຢູ່ຄຽງຂ້າງມະນຸດສະທໍາ”, ເລືອດແມ່ນສິ່ງສໍາຄັນ ບໍ່ມີໂຮງງານໃດຈະສາມາດຜະລິດ ເພື່ອທົດແທນເລືອດຂອງຄົນ, ມີແຕ່ເລືອດຂອງຄົນ ໃສ່ຄົນໄດ້; ການບໍລິຈາກເລືອດ ແມ່ນໜ້າທີ່ຂອງໝົດທຸກຄົນ. ປັດຈຸບັນ ເລືອດບໍ່ພຽງພໍກັບຄວາມຕ້ອງການຂອງສັງຄົມ ຊຶ່ງມາຈາກຫຼາຍປັດໄຈ; ສະນັ້ນ, ຈຶ່ງຮຽກຮ້ອງທຸກໆທ່ານໃນສັງຄົມຈົ່ງປະກອບສ່ວນບໍລິຈາກເລືອດ ບໍ່ວ່າ ຈະແມ່ນວັນນີ້ ກໍຄືໃນອະນາຄົດ, ການທີ່ໄດ້ບໍລິຈາກເລືອດປຽບເໝືອນ ກັບທີ່ບັນດາທ່ານໄດ້ເຮັດກອງບຸນທີ່ໃຫຍ່ຫຼວງ, ແມ່ນການໃຫ້ແບບບໍ່ຫວັງຜົນຕອບແທນ ເພື່ອຊ່ວຍກອບກູ້ຊີວິດຄົນໃຫ້ກັບຄືນມາມີຊີວິດໃນສັງຄົມ.
ຂະບວນການກາແດງ ແລະ ຊີກວົງເດືອນແດງສາກົນ ປະກອບດ້ວຍ: ຄະນະກໍາມະການກາແດງສາກົນ, ສະຫະພັນກາແດງ ແລະ ຊີກວົງເດືອນແດງສາກົນ, ອົງການກາແດງ ແລະ ຊີກວົງເດືອນແດງ ປະເທດຕ່າງໆ. ຄະນະກໍາມະການກາແດງສາກົນ, ສະຫະພັນກາແດງ ແລະ ຊີກວົງເດືອນແດງສາກົນ, ອົງການກາແດງ ແລະ ຊີກວົງເດືອນແດງ ປະເທດຕ່າງໆ ແມ່ນປະຕິບັດໜ້າທີ່ຂອງຕົນ ໂດຍອີງໃສ່ 7 ຫຼັກການພື້ນຖານ ຂອງຂະບວນການກາແດງສາກົນ ຄື: ມະນຸດສະທໍາ, ທ່ຽງທໍາ, ເປັນກາງ, ເປັນເອກະລາດ, ສະໜັກໃຈ, ເປັນເອກະພາບ ແລະ ມີນໍ້າໃຈສາກົນ.
ກິດຈະກຳການບໍລິຈາກເລືອດໃນຄັ້ງນີ້, ມີບັນດານັກຮຽນມັດທະຍົມ, ທະຫານ, ຕໍາຫຼວດ, ລັດວິສາຫະກິດ, ບໍລິສັດຫ້າງຮ້ານ, ປະຊາຊົນຊັ້ນຄົນຕ່າງໆ, ການບໍລິຈາກຄັ້ງນີ້ໄດ້ເລືອດ 283 ຖົງ.
(ຂ່າວ-ພາບ: ແສງຈັນ)
ຄໍາເຫັນ