 |
ໃນວັນທີ 27 ກໍລະກົດຜ່ານມານີ້ ທີ່ໂຮງແຮມຄຣາວພລາຊາ ນະຄອນຫຼວງວຽງຈັນ, ໂດຍມີການນໍາຂັ້ນສູງຈາກບັນດາກະຊວງອ້ອມຂ້າງ, ຜູ້ຕາງໜ້າຈາກຂະແໜງການຂອງລັດ, ບັນດາທ່ານເອກອັກຄະລັດຖະທູດ ປະຈໍາ ສປປ ລາວ, ຜູ້ຕາງໜ້າອົງການເຄືອຂ່າຍ ສປຊ, ອົງການຈັດຕັ້ງສາກົນ ແລະ ອົງການຈັດຕັ້ງທາງສັງຄົມເຂົ້າຮ່ວມ. ພິທີສະເຫຼີມສະຫຼອງດັ່ງກ່າວຈັດຂຶ້ນເພື່ອຫວນຄືນການຮ່ວມມືອັນຍາວນານລະຫວ່າງລັດຖະບານແຫ່ງ ສປປ ລາວ ແລະ ອົງການ UNFPA ຕະຫຼອດໄລຍະ 5 ທົດສະວັດແຫ່ງການເປັນຄູ່ຮ່ວມມື ແລະ ສົ່ງເສີມການພັດທະນາໃນຂົງເຂດດ້ານສຸຂະພາບທາງເພດ, ສຸຂະພາບຈະເລີນພັນ, ສຸຂະພາບແມ່ ແລະ ເດັກ, ການເສີມສ້າງຄວາມເຂັ້ມແຂງໃຫ້ໄວໜຸ່ມ, ຄວາມສະເໝີພາບຍິງ-ຊາຍ ແລະ ການພັດທະນາລະບົບຂໍ້ມູນດ້ານປະຊາກອນ ແລະ ການພັດທະນາແບບຍືນຍົງແຫ່ງຊາດ.
 |
ໃນໂອກາດດັ່ງກ່າວ, ທ່ານ ທອງສະຫວັນ ພົມວິຫານ ໄດ້ຍົກໃຫ້ເຫັນຜົນສໍາເລັດອັນພົ້ນເດັ່ນໃນໄລຍະຜ່ານມາໂດຍສະເພາະຜົນສຳເລັດດ້ານວຽກງານປະຊາກອນ, ສົ່ງເສີມການສຶກສາ ແລະ ປັບປຸງດ້ານສາທາລະນະສຸກ ຊຶ່ງລ້ວນແຕ່ເປັນການປະກອບສ່ວນຈັດຕັ້ງປະຕິບັດຕາມແຜນບຸລິມະສິດແຫ່ງຊາດເພື່ອການພັດທະນາ ຄູ່ຂະໜານກັບການຈັດຕັ້ງປະຕິບັດຕາມແຜນປະຕິບັດງານຂອງກອງປະຊຸມສາກົນວ່າດ້ວຍປະຊາກອນ ແລະ ການພັດທະນາ (ICPD) ແລະ ເປົ້າໝາຍການພັດທະນາທີ່ຍືນຍົງ (SDGs) ໃນ ສປປ ລາວ.
 |
ພ້ອມດຽວກັນນີ້, ທ່ານຮອງນາຍົກລັດຖະມົນຕີ ຍັງໄດ້ໃຫ້ຄຳໝາຍໝັ້ນໃນການບັນລຸຄາດ ໝາຍຮ່ວມກັນ ໂດຍສະເພາະສູ້ຊົນໃຫ້ສາມາດບັນລຸໄດ້ອັດຕາການເສຍຊີວິດຂອງແມ່ຫຼຸດລົງຕໍ່າກວ່າ 70 ກໍລະນີຕໍ່ການເກີດເດັກມີຊີວິດ 100,000 ຄົນພາຍໃນປີ 2030. ຄຽງຄູ່ກັນນີ້, ໃນໄລຍະທີ່ ສປປ ລາວ ພວມກ້າວເຂົ້າສູ່ບັ້ນສຳຄັນຂອງການຫັນປ່ຽນດ້ານປະຊາກອນ ຈຶ່ງຮຽກຮ້ອງໃຫ້ເອົາໃຈໃສ່ການພັດທະນາດ້ານການສຶກສາ, ສາທາລະນະສຸກ, ການພັດທະນາສີມືແຮງງານ ເພື່ອໂອກາດໃນການຈ້າງງານທີ່ມີຄຸນນະພາບ ແລະ ການເສີມສ້າງທັກສະໃຫ້ແກ່ໄວໜຸ່ມ ພ້ອມທັງໝູນໃຊ້ທ່າແຮງທາງດ້ານປະຊາກອນໃນການກ້າວໄປສູ່ເປົ້າໝາຍການພັດທະນາ ແລະ ການຫຼຸດພົ້ນອອກຈາກສະຖານະພາບປະເທດດ້ອຍພັດທະນາໃນປີ 2026.
 |
ພ້ອມດຽວກັນນັ້ນ, ທ່ານ ບັກໂຮເດຍ ເບີຄະນ໋ອຟ (Mr. Bakhodir Burkhanov) ຜູ້ປະສານງານອົງການ ສປຊ ປະຈໍາ ສປປ ລາວ ໄດ້ມີຄໍາເຫັນໂດຍເນັ້ນຢໍ້າເຖິງຄວາມສໍາຄັນຂອງການພັດທະນາທີ່ຖືເອົາປະຊາຊົນເປັນໃຈກາງ ຊຶ່ງອົງການ UNFPA ໄດ້ປະກອບສ່ວນຊ່ວຍເຫຼືອ ສປປ ລາວ ເປັນຕົ້ນ ການປັບປຸງນະໂຍບາຍ ແລະ ກົນໄກການປະສານງານ, ການເຊື່ອມສານການປ່ຽນແປງທາງດ້ານປະຊາກອນກໍຄືການຮວບຮວມຂໍ້ມູນສໍາມະໂນຄົວ ແລະ ທີ່ຢູ່ອາໄສແບບດີຈີຕອນເຕັມຮູບແບບ ຊຶ່ງເປັນຂໍ້ມູນສໍາຄັນໃນການກໍານົດນະໂຍບາຍ, ການຈັດສັນຊັບພະຍາກອນ ແລະ ແຜນພັດທະນາເສດຖະກິດ - ສັງຄົມແຫ່ງຊາດຄັ້ງທີ 10 ເພື່ອຮັບປະກັນວ່າທຸກຄົນສາມາດກ້າວໄປພ້ອມກັນ.
ນອກຈາກນີ້, ທ່ານ Dr. Bakhtiyor Kadyrov ຜູ້ຕາງໜ້າອົງການ UNFPA ປະຈໍາ ສປປ ລາວ ຍັງໄດ້ມີຄໍາເຫັນຕໍ່ພິທີສະເຫຼີມສະຫຼອງວັນສໍາຄັນນີ້ວ່າບໍ່ແມ່ນພຽງແຕ່ການຫວນຄືນຜົນສໍາເລັດໃນອະດີດເທົ່ານັ້ນ, ແຕ່ຍັງແມ່ນການກຳນົດເປົ້າໝາຍຮ່ວມກັນເພື່ອສຸມໃສ່ແຜນງານທີ່ຍັງບໍ່ທັນບັນລຸໄດ້ ເເລະ ສືບຕໍ່ຮັດແໜ້ນສາຍພົວພັນ ແລະ ທັງເປັນຄູ່ຮ່ວມງານເພື່ອອະນາຄົດ ຢ່າງຮອບດ້ານ ແລະ ຍືນຍົງໃນຊຸມປີຕໍ່ໄປ.
(ຂ່າວ: ແສງຈັນ)
ຄໍາເຫັນ