 |
ເຂົ້າຮ່ວມໃນງານອັນມີຄວາມໝາຍສຳຄັນຄັ້ງນີ້, ຝ່າຍລາວ ນໍາໂດຍ ທ່ານ ອາລຸນໄຊ ສູນນະລາດ ກຳມະການສູນກາງພັກປະຊາຊົນ ປະຕິວັດລາວ ເລຂາພັກແຂວງ ປະທານສະພາປະຊາຊົນແຂວງຈຳປາສັກ, ທ່ານ ບຸນຫຼາຍ ບຸດທິ ກຳມະການສູນກາງພັກປະຊາຊົນ ປະຕິວັດລາວ ເລຂາພັກແຂວງ ປະທານສະພາປະຊາຊົນແຂວງ ເຊກອງ, ທ່ານ ນາງ ມີນາພອນ ໄຊສົມພູ ຮອງເລຂາພັກແຂວງ ອັດຕະປື ແລະ ທ່ານ ນາງ ບຸນທະວີ ດວງລາສີ ຮອງເລຂາພັກແຂວງສາລະວັນ, ທ່ານ ຊ່າວ ເວດຊັນ ຕາງໜ້າສະຖານກົງສູນຣາຊະອານາຈັກກຳປູເຈຍ ປະຈໍານະຄອນປາກເຊ, ທ່ານ ນາງ ຟານ ທິ ທັນ ເຫື້ອງ ຮອງຫົວໜ້າພະແນກວັດທະນະທຳ, ກິລາ ແລະ ທ່ອງທ່ຽວແຂວງແຂັງຮວ່າ; ຄະນະສະມາຄົມຊາວຫວຽດນາມ, ສະມາຄົມວິສາຫະກິດຫວຽດນາມ 4 ແຂວງພາກໃຕ້ລາວ, ພະນັກງານສະຖານກົງສູນຫວຽດນາມ ປະຈໍານະຄອນປາກເຊ, ບັນດາອົງການຈັດຕັ້ງ, ພະແນກການຕ່າງໆ, ພ້ອມດ້ວຍບັນດາແຂກຖືກເຊີນທັງພາກລັດ ແລະ ເອກະຊົນເຂົ້າຮ່ວມ.
 |
ໃນພິທີອັນສະຫງ່າລາສີນີ້, ທ່ານ ນາງ ຕ້າ ເຟືອງ ຢຸ໋ງ ກົງສູນໃຫຍ່ ສສ ຫວຽດນາມ ໄດ້ຂຶ້ນກ່າວປາໄສ ໂດຍໄດ້ຍົກໃຫ້ເຫັນ ພາຍຫຼັງ 81 ປີ ນັບຕັ້ງແຕ່ການສ້າງຕັ້ງປະເທດຊາດ, 51 ປີ ທ້ອນໂຮມປະເທດຊາດເປັນເອກະພາບແລະ 40 ປີ ການປະຕິບັດນະໂຍບາຍປ່ຽນແປງໃໝ່, ຫວຽດນາມ ໄດ້ຜ່ານຜ່າຄວາມຫຍຸ້ງຍາກ ແລະ ສິ່ງທ້າທາຍຫຼາຍຢ່າງ, ບັນລຸຜົນສຳເລັດອັນຍິ່ງໃຫຍ່ ແລະ ມີຄວາມໝາຍທາງປະຫວັດສາດ. ພາຍໃຕ້ການນຳພາຂອງພັກກອມມູນິດຫວຽດນາມ, ຫວຽດນາມ ເຊື່ອມໂຍງເຂົ້າກັບເສດຖະກິດ ແລະ ການເມືອງສາກົນ ຢ່າງເລິກເຊິ່ງ, ປະກອບສ່ວນຢ່າງຕັ້ງໜ້າ ແລະ ຫ້າວຫັນເຂົ້າໃນການແກ້ໄຂບັນຫາພາກພື້ນ ແລະ ສາກົນ. ພ້ອມທັງມີບົດບາດສຳຄັນເພີ່ມຂຶ້ນໃນພາກພື້ນ ແລະ ທົ່ວໂລກ ໂດຍສະເພາະ ປີ 2026 ແມ່ນມີຄວາມສໍາຄັນທີ່ສຸດສໍາລັບຫວຽດນາມ, ພັກກອມມູນິດຫວຽດນາມ ຈັດຕັ້ງກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIV ສໍາເລັດ. ຮູບແບບການປົກຄອງທ້ອງຖິ່ນສອງຂັ້ນ ກຳລັງໄດ້ຮັບການຈັດຕັ້ງປະຕິບັດ ແລະ ດຳເນີນການຢ່າງມີປະສິດທິຜົນ, ຊີວິດທາງດ້ານວັດຖຸ ແລະ ຈິດໃຈຂອງປະຊາຊົນ ສືບຕໍ່ປັບປຸງດີຂຶ້ນ.
 |
ໂດຍເນັ້ນໜັກເຖິງການສະໜັບສະໜູນ ແລະ ການຊ່ວຍເຫຼືອ ອັນລ້ຳຄ່າຈາກເພື່ອນມິດສາກົນ ໂດຍສະເພາະແມ່ນການຊ່ວຍເຫຼືອອັນໃຫຍ່ຫຼວງຂອງພັກ, ລັດ ແລະ ປະຊາຊົນລາວອ້າຍນ້ອງ ທີ່ມອບໃຫ້ ພັກ, ລັດ ແລະ ປະຊາຊົນຫວຽດນາມ ໃນຂະບວນການຕໍ່ສູ້ປົດປ່ອຍຊາດ, ການທ້ອນໂຮມປະເທດຊາດເປັນເອກະພາບ, ພ້ອມທັງໃນພາລະກິດສ້າງສາ ແລະ ປົກປັກຮັກສາປະເທດຊາດ, ກົງສູນໃຫຍ່ຢືນຢັນວ່າ: ພັກ, ລັດ ແລະ ປະຊາຊົນຫວຽດນາມຍາມໃດກໍໃຫ້ຄວາມສຳຄັນສູງສຸດ ຕໍ່ສາຍພົວພັນພິເສດ ຕໍ່ພັກ, ລັດ ແລະ ປະຊາຊົນລາວອ້າຍນ້ອງ ແລະ ຈະເຮັດສຸດຄວາມສາມາດເພື່ອຮັກສາ, ເສີມສ້າງ ແລະ ພັດທະນາສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດ ລະຫວ່າງ ຫວຽດນາມ - ລາວ, ລາວ - ຫວຽດນາມ. ສະຖານກົງສູນໃຫຍ່ ຈະສືບຕໍ່ປະສານງານຢ່າງໃກ້ຊິດກັບຄະນະພັກ ແລະ ການປົກຄອງຂອງ 4 ແຂວງພາກໃຕ້ລາວ ກັບບັນດາອົງການ ແລະ ທ້ອງຖິ່ນຂອງຫວຽດນາມ ເພື່ອປະກອບສ່ວນເຂົ້າໃນການເພີ່ມທະວີ, ເສີມສ້າງ ແລະ ເຮັດໃຫ້ສາຍພົວພັນລະຫວ່າງ 4 ແຂວງພາກໃຕ້ລາວ ແລະ ບັນດາແຂວງ ແລະ ນະຄອນຂອງຫວຽດນາມ ເຂົ້າສູ່ລວງເລິກ, ແທດຈິງ ແລະ ມີປະສິດທິຜົນ.
ໃນໂອກາດນີ້, ສະຫາຍ ອາລຸນໄຊ ສູນນະລາດ ໄດ້ກ່າວອວຍພອນ ພັກ, ລັດ ແລະ ປະຊາຊົນຫວຽດນາມ ເນື່ອງໃນວັນສຳຄັນຂອງຊາດ ພ້ອມທັງຊົມເຊີຍ ແລະ ຕີລາຄາສູງ ຕໍ່ຜົນງານອັນໂດດເດັ່ນຮອບດ້ານ ຂອງຫວຽດນາມ ຕະຫຼອດໄລຍະ 81 ປີຜ່ານມາ, ໃນການສ້າງສາພັດທະນາປະເທດຊາດ, 40 ປີ ແຫ່ງການປະຕິຮູບຮອບດ້ານນັບຕັ້ງແຕ່ ປີ 1986. ໂດຍເນັ້ນໜັກເຖິງສາຍພົວພັນພິເສດ ແລະ ຫາຍາກ ລະຫວ່າງ ສອງປະເທດ ຊຶ່ງສ້າງຂຶ້ນໂດຍປະທານ ໂຮ່ຈິມິນ ຜູ້ນໍາທີ່ຍິ່ງໃຫຍ່, ປະທານ ໄກສອນ ພົມວິຫານ ແລະ ປະທານ ສຸພານຸວົງ ທີ່ແສນເຄົາລົບຮັກ, ໄດ້ຮັບການບຳລຸງສ້າງ ຈາກຜູ້ນຳຮຸ່ນຕໍ່ໆໄປ ແລະ ປະຊາຊົນ ທັງສອງປະເທດ. ຜ່ານຜ່າຄວາມຫຍຸ້ງຍາກ, ສິ່ງທ້າທາຍຫຼາຍຢ່າງ ແລະ ເປັນຊັບສິນອັນລ້ຳຄ່າຂອງປະຊາຊົນທັງສອງປະເທດ ໃນພາລະກິດການສ້າງສາ ແລະ ພັດທະນາ ປະເທດຊາດ, ສະຫາຍເລຂາພັກແຂວງຈຳປາສັກ ໄດ້ສະແດງຄວາມປິຕິຍິນດີທີ່ໄດ້ເຫັນລະບົບການເມືອງທີ່ໝັ້ນຄົງ ຂອງຫວຽດນາມ, ເຂັ້ມແຂງ, ອັດຕາການເຕີບໂຕເສດຖະກິດທີ່ສູງຢ່າງຕໍ່ເນື່ອງ; ບົດບາດ ແລະ ຖານະເພີ່ມຂຶ້ນ ໃນເວທີສາກົນ ແລະ ພາກພື້ນ ໂດຍສະເພາະ ຫວຽດນາມ ກຳລັງມີການປ່ຽນແປງຢ່າງວ່ອງໄວ ໃນຮູບແບບການພັດທະນາ ໂດຍອີງໃສ່ວິທະຍາສາດ ແລະ ເຕັກໂນໂລຊີ, ນະວັດຕະກໍາ, ການຫັນປ່ຽນດີຈີຕອນ ແລະ ການພັດທະນາສີຂຽວ.
ຜົນສຳເລັດເຫຼົ່ານີ້, ຢືນຢັນເຖິງການນຳພາທີ່ມີຄວາມສະຫຼາດຫຼັກແຫຼມ, ຖືກຕ້ອງ ແລະ ສ້າງສັນຂອງພັກກອມມູນິດຫວຽດນາມ ຊຶ່ງເປັນຫຼັກຖານສະແດງເຖິງຄວາມພະຍາຍາມ ຢ່າງຕໍ່ເນື່ອງຂອງພັກ, ລັດ ແລະ ປະຊາຊົນຫວຽດນາມ ເພື່ອບັນລຸເປົ້າໝາຍ “ປະຊາຊົນຮັ່ງມີ, ປະເທດຊາດເຂັ້ມແຂງ ແລະ ສັງຄົມມີປະຊາທິປະໄຕ, ຍຸຕິທຳແລະ ອາລິຍະທຳ.
ສະຫາຍ ອາລຸນໄຊ ສູນນະລາດ ຍັງສະແດງຄວາມຮູ້ບຸນຄຸນອັນເລິກເຊິ່ງ ຕໍ່ພັກ, ລັດ, ການປົກຄອງ ແລະ ປະຊາຊົນຫວຽດນາມ ທີ່ຍາມໃດກໍໃຫ້ການຊ່ວຍເຫຼືອ, ສະໜັບສະໜູນປະເທດ ແລະ ປະຊາຊົນລາວ ເວົ້າລວມ, ເວົ້າສະເພາະ ບັນດາແຂວງພາກກາງ ແລະ ພາກໃຕ້ຫວຽດນາມ ຕະຫຼອດໄລຍະຜ່ານມາ; ສະແດງຄວາມຂອບໃຈສະຖານກົງສູນຫວຽດນາມ ປະຈໍານະຄອນປາກເຊ ຍາມໃດກໍໃຫ້ຄວາມຮ່ວມມື, ຊ່ວຍເຫຼືອ ແລະ ເປັນຂົວເຊື່ອມຕໍ່ຢ່າງໃກ້ຊິດ ລະຫວ່າງ 4 ແຂວງພາກໃຕ້ລາວ ກັບບັນດາແຂວງ, ນະຄອນຫວຽດນາມ.
ໃນງານສະເຫຼີມສະຫຼອງວັນຊາດ ສສ ຫວຽດນາມ ຄົບຮອບ 81 ປີ ໂດຍສະຖານກົງສູນໃຫຍ່ຫວຽດນາມ ປະຈຳນະຄອນປາກເຊ ໄດ້ຈັດຂຶ້ນໃນບັນຍາກາດທີ່ອົບອຸ່ນ ແລະ ເຕັມໄປດ້ວຍມິດຕະພາບ ແລະ ຄວາມສາມັກຄີ. ງານດັ່ງກ່າວ ລວມມີກິດຈະກຳເຜີຍແຜ່ໂຄສະນາປະຫວັດສາດ ແລະ ວັດທະນະທຳຫວຽດນາມ, ວາງສະແດງຮູບພາບທີ່ສະແດງໃຫ້ເຫັນຈຸດທ່ອງທ່ຽວ ແລະ ຜົນສຳເລັດ ຂອງບັນດາທ້ອງຖິ່ນຫວຽດນາມ ທີ່ມີສາຍພົວພັນກັບ 4 ແຂວງພາກໃຕ້ລາວ ແລະ ບາງທ້ອງຖິ່ນຂອງພາກເໜືອ; ມີບູດແນະນຳປະເທດ, ປະຊາຊົນ, ວັດທະນະທຳ ແລະ ສິນຄ້າ OCOP ຂອງຫວຽດນາມ. ພິເສດ, ເນື່ອງໃນໂອກາດສະເຫຼີມສະຫຼອງວັນສ້າງຕັ້ງສາຍພົວພັນຮ່ວມມືລະຫວ່າງ ແຂວງແຂັງຮວ່າ ແລະ ແຂວງຈຳປາສັກ ຄົບຮອບ 20 ປີ, ແຂວງແຂັງຮວ່າ ໄດ້ສົ່ງຄະນະຜູ້ແທນຈາກພະແນກວັດທະນະທຳ, ກິລາ ແລະ ທ່ອງທ່ຽວແຂັງຮວ່າ ແລະ ໂຮງລະຄອນສິລະປະພື້ນເມືອງແຂວງແຂັງຮວ່າ ເພື່ອສະແດງລາຍການ ວັດທະນະທຳພິເສດ ທີ່ມີບົດເພງສັນລະເສີນຄວາມຮັກ ຕໍ່ບ້ານເກີດເມືອງນອນ ແລະ ສາຍພົວພັນພິເສດ ລະຫວ່າງ ຫວຽດນາມ - ລາວ.
ຄໍາເຫັນ