ສະຫຼຸບເຄິ່ງໂຄງການເກັບກູ້ລະເບີດບໍ່ທັນແຕກທີ່ຕົກຄ້າງຢູ່ເມືອງບົວລະພາ

ກອງປະຊຸມສະຫຼຸບເຄິ່ງໂຄງການເກັບກູ້ລະເບີດບໍ່ທັນແຕກທີ່ຕົກຄ້າງຢູ່ເມືອງບົວລະພາ ແຂວງຄໍາມ່ວນ ໄດ້ຈັດຂຶ້ນໃນວັນທີ 15 ພະຈິກຜ່ານມາທີ່ຣີສອດສາຍພູຫຼວງ (ຈຸດສຸມຫຼັງຄັງ) ເມືອງບົວລະພາ ໂດຍການເປັນປະທານຂອງທ່ານ ສີໄຄ ຄຳສະຫວັດ ຫົວໜ້າພະແນກການຕ່າງປະເທດແຂວງ, ມີທ່ານ ສີວອນ ວັນວິໄລ ຫົວໜ້າອົງການເກັບກູ້ລະເບີດ (ແມັກ) ແຂວງ, ມີຕາງໜ້າອົງການຈັດຕັ້ງສາກົນ, ຄະນະກໍາມະການຄຸ້ມຄອງໂຄງການຂັ້ນແຂວງ-ຂັ້ນເມືອງແລະບ້ານເປົ້າໝາຍໂຄງການເຂົ້າຮ່ວມ.
    ທ່ານສີວອນວັນວິໄລ ກ່າວວ່າ: ໂຄງການເກັບກູ້ລະເບີດບໍ່ທັນແຕກເພື່ອການດຳລົງຊີວິດທີ່ປອດໄພ ຂອງຊຸມຊົນບ້ານວັງຄົນ ເມືອງບົວລະພາ ຊຶ່ງໄດ້ຮັບທຶນສະໜັບສະໜູນຈາກກະຊວງການຕ່າງປະເທດແລະການພັດທະນາແຫ່ງສະຫະຣາຊາອານາຈັກອັງກິດດ້ວຍງົບປະມານຈຳນວນ235.269ໂດລາແລະ ໂຄງການເກັບກູ້ລະເບີດເພື່ອປົກປ້ອງຊີວິດໃຫ້ແກ່ປະຊາຊົນຢູ່ເມືອງບົວລະພາ ໄດ້ຮັບທຶນສະໜັບສະໜູນຈາກທ່ານ ໄມເຄີ້ນ ອໍາເບີ (Michael Ambler)ຈາກສະຫະລັດອາເມຣິກາງົບປະມານ 112.269 ໂດລາໄດ້ເລີ່ມຈັດຕັ້ງປະຕິບັດມາ ແຕ່ເດືອນເມສາ2023 ຫາ ເດືອນມີນາ 2024 ຊຶ່ງໂຄງການເກັບກູ້ລະເບີດບໍ່ທັນແຕກເພື່ອການດຳລົງຊີວິດທີ່ປອດ
ໄພຂອງຊຸມຊົນບ້ານວັງຄົນ ເລີ່ມຈັດຕັ້ງປະຕິບັດແຕ່ເດືອນເມສາຫາເດືອນກັນຍາ 2023 ສາມາດຈັດຕັ້ງປະຕິບັດກວດກູ້ລະເບີດອອກຈາກພື້ນທີ່ຕົວຈິງໄດ້ 135.008 ຕາແມັດ ແລະ ໄດ້ທຳລາຍລະເບີດບໍ່ທັນແຕກ (ບົມບີ) ໄດ້ 53 ໜ່ວຍ ແລະ ທຳລາຍລະເບີດເຄື່ອນທີ່ຢູ່ໃນ 8 ບ້ານເປົ້າໝາຍຄື: ບ້ານແສນພັນ, ຂະຍຸ, ສະອາງ, ຜານົບ, ວັງຄົນ, ຫຼັງຄັງ ເມືອງບົວລະພາ ແລະ ບ້ານສ້າງປຸ່ງບອນ, ບ້ານຫາງການເມືອງຍົມມະລາດ ສາມາດທຳລາຍລະ
ເບີດບໍ່ທັນແຕກໄດ້ທັງໝົດ 84 ໜ່ວຍ, ໃນນັ້ນປະເພດບົມບີ 67 ໜ່ວຍ ແລະ ລະເບີດຊະນິດອື່ນໆ 17 ໜ່ວຍ.    ສຳລັບໂຄງການເກັບກູ້ລະເບີດເພື່ອປົກປ້ອງຊີວິດໃຫ້ແກ່ປະຊາຊົນຢູ່ເມືອງບົວລະພາ(ຈາກເປົ້າໝາຍທັງໝົດ 4 ບ້ານມີບ້ານຫຼັງຄັງ, ສະອາງ, ຫຍ້າຫວາຍ ແລະ ບ້ານນາຕັ້ງໃຈ)ໃນໄລຍະເຄິ່ງໂຄງການ ສາມາດດຳເນີນການກວດກູ້ໄດ້ 2 ບ້ານຄື: ບ້ານສະອາງ ແລະ ບ້ານຫຍ້າຫວາຍໃນເນື້ອທີ່ດິນທີ່ກວດກູ້ 88.631 ຕາແມັດ, ພົບເຫັນ ແລະ ທຳລາຍລະເບີດໄດ້ 45 ໜ່ວຍ (ບົມບີ່ 29 ໜ່ວຍ ແລະ ລະເບີດຊະນິດອື່ນໆ 16 ໜ່ວຍ) ສ່ວນອີກ 2 ບ້ານທີ່ເຫຼືອແມ່ນຈະໄດ້ຈັດຕັ້ງປະຕິບັດໃນໄລຍະຕໍ່ໄປ.ຈາກນັ້ນບັນດາຜູ້ແທນກອງປະຊຸມໄດ້ພ້ອມ
ກັນປະກອບຄໍາຄິດຄໍາເຫັນຕໍ່ບົດສະຫຼຸບແລະທິດທາງແຜນການໃນຕໍ່ໜ້າ, ເພື່ອສ້າງຄວາມເປັນເອກະພາບໃນການຮັບຮອງແລະຈັດຕັ້ງປະຕິບັດທັງເປັນບ່ອນອີງໃນການປັບປຸງວຽກງານດັ່ງກ່າວໃຫ້ດີຂຶ້ນເທື່ອລະກ້າວ.
ຂ່າວ-ພາບ: ກອງຄຳ