ສຳເລັດການອົບຮົມ ສໍາລັບພະນັກງານການນໍາໜຸ່ມ ບັນດາແຂວງທີ່ມີຊາຍແດນຕິດຈອດ ລາວ-ຫວຽດນາມ-ກໍາປູເຈຍ

ສະຫາຍ ດາວສະຫວັນ ເຄືອມີໄຊ ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ໄດ້ຂຶ້ນລາຍງານ ກ່ຽວກັບຜົນສຳເລັດການຝຶກອົບຮົມຄັ້ງນີ້ ຊຶ່ງໃນໄລຍະເວລາຂອງການຝຶກອົບຮົມ 9 ວັນ, ນັກສໍາມະນາກອນ ນອກຈາກໄດ້ແລກປ່ຽນບົດຮຽນໃນການພັດທະນາເສດຖະກິດ-ສັງຄົມ ຂອງແຕ່ລະພັກ, ແຕ່ລະປະເທດແລ້ວ, ຍັງໄດ້ໄປຢ້ຽມຢາມສະຖານທີ່ປະຫວັດສາດ ແລະ ພື້ນຖານການຜະລິດຈຳນວນໜຶ່ງ ເປັນຕົ້ນແມ່ນ: ຫໍພິພິທະພັນ ປະທານ ໄກສອນ ພົມວິຫານ, ຫໍພິພິທະພັນສິລະປະລາວ, ພະທາດຫຼວງ, ປະຕູໄຊ, ຫໍພິພິຕະພັນກອງທັບປະຊາຊົນລາວ, ບໍລິສັດສະຕາໂທລະຄົມ ເພື່ອໃຫ້ນັກສຳມະນາກອນກຳໄດ້ທິດສະດີ ແລະ ປະສົມປະສານພຶດຕິກຳຕົວຈິງ, ພ້ອມນັ້ນຊຸດຝຶກອົບຮົມດັ່ງກ່າວ ຍັງໄດ້ຢ້ຽມຢາມພື້ນຖານການຜະລິດ ແລະ ແຫຼ່ງວັດທະນະທຳ ທຳມະຊາດຈຳນວນໜຶ່ງຢູ່ເມືອງວັງວຽງ ແຂວງວຽງຈັນ.

ສະຫາຍນາງ ສີໃສ ລືເດດມູນສອນ ໄດ້ຕີລາຄາສູງຕໍ່ຜົນສຳເລັດຊຸດຝຶກອົບຮົມຄັ້ງນີ້ ແລະ ສະແດງຄວາມຊົມເຊີຍນັກສຳມະນາກອນ ທີ່ໄດ້ເອົາໃຈໃສ່ຕິດຕາມ, ຄົ້ນຄວ້າ ແລະ ແລກປ່ຽນບົດຮຽນຊຶ່ງກັນ ແລະ ກັນ ຢ່າງກົງໄປກົງມາ ແລະ ມີເນື້ອໃນອຸດົມສົມບູນ, ພ້ອມດຽວກັນນັ້ນ ກໍໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນຳແກ່ຜູ້ເຂົ້າຮ່ວມຝຶກອົບຮົມ, ໂດຍໄດ້ເນັ້ນໃນການສືບຕໍ່ເພີ່ມພູນຄູນສ້າງ ແລະ ເສີມຂະຫຍາຍການພົວພັນຮ່ວມມືຂອງ 3 ພັກ, 3 ຊາດ ລາວ-ຫວຽດນາມ-ກຳປູເຈຍ ໃຫ້ນັບມື້ໄດ້ຮັບການພັດທະນາ ແລະ ແຕກດອກອອກຜົນຍິ່ງໆຂຶ້ນ ເພື່ອນຳເອົາຜົນປະໂຫຍດຕົວຈິງມາສູ່ ພັກ, ລັດ ແລະ ປະຊາຊົນ 3 ປະເທດ ກໍຄື ເພື່ອພາລະກິດແຫ່ງການເສີມສ້າງສັນຕິພາບ, ມິດຕະພາບ ແລະ ການຮ່ວມມືເພື່ອການພັດທະນາໃນພາກພື້ນ ແລະ ໃນໂລກ.

ໃນຕອນທ້າຍ, ສະຫາຍ ຫົວໜ້າຄະນະຈັດຕັ້ງສູນກາງພັກ ໄດ້ໃຫ້ກຽດມອບໃບຢັ້ງຢືນໃຫ້ແກ່ນັກສຳມະນາກອນ ທັງ 3 ພັກ ແລະ ອວຍພອນໃຫ້ນັກສຳມະນາກອນທັງໝົດຈົ່ງມີສຸຂະພາບແຂງແຮງ, ສືບຕໍ່ປະຕິບັດໜ້າທີ່ອັນມີກຽດ ທີ່ ພັກ, ລັດ ມອບໝາຍໃຫ້ ແລະ ເດີນທາງກັບຄືນປະເທດດ້ວຍຄວາມສະຫວັດດີພາບທຸກປະການ.

(ຂ່າວ: ຄຕພ, ພາບ: ແສງຈັນ)