ກອງປະຊຸມຄັ້ງນີ້, ໄດ້ສະຫຼຸບການຈັດຕັ້ງປະຕິບັດໂຄງການເຊື່ອມສານວຽກງານຮັກສາສຸຂະພາບ, ໂພສະນາການ, ນ້ຳສະອາດ ແລະ ສຸຂານາໄມໄລຍະ IV, ໂຄງການສົ່ງເສີມສຸຂະພາບ ແລະ ໂພຊະນາການທີ່ໄດ້ເລີ່ມຈັດຕັ້ງປະຕິບັດມາແຕ່ປີ 2014 ຈົນເຖິງເດືອນ ມິຖຸນາ 2025 ຕະຫຼອດໄລຍະ 10 ກວ່າປີ. ໃນນັ້ນ, ມີ 2 ແຂວງຄື: ແຂວງອຸດົມໄຊ ແລະ ແຂວງສາລະວັນ. ສໍາລັບແຂວງສາລະວັນ ມີເມືອງສາລະວັນ ແລະ ເມືອງຕະໂອ້ຍ, ໂຄງການໄດ້ຮ່ວມກັນລະຫວ່າງອົງການແພລນສາກົນປະຈຳ ສປປ ລາວ ແລະ ກະຊວງສາທາລະນະສຸກ, ສໍາເລັດການກໍ່ສ້າງ ແລະ ຕິດຕັ້ງອຸປະກອນ-ເຄື່ອງມືການແພດໃນສຸກສາລາ ແລະ ອາຄານແມ່ ແລະ ເດັກຈຳນວນ 40 ແຫ່ງສໍາເລັດການກໍ່ສ້າງລະບົບນ້ຳສະອາດ ເພື່ອປັບປຸງການໃຊ້ນ້ຳຂອງຊຸມຊົນຈຳນວນ 50 ແຫ່ງ, ສຳເລັດການລືບລ້າງການຖ່າຍຊະຊາຍ ແລະ ປະກາດເປັນບ້ານປອດຖ່າຍຊະຊາຍໄດ້ຈຳນວນ 272 ບ້ານ, ສຳເລັດການກໍຕັ້ງ ແລະ ຝຶກອົບຮົມຄະນະກຳມະການຊຸມຊົນເປັນເຈົ້າການດ້ານສຸຂານາໄມ ແລະ ຄຸ້ມຄອງນ້ຳສະອາດ ເພື່ອຮັບປະກັນຄວາມຍືນຍົງ. ໂຄງການນີ້, ມີບົດບາດສຳຄັນໃນການປະກາດເປັນແຂວງຢຸດຕິການຖ່າຍຊະຊາຍ ປະກອບສ່ວນເຂົ້າໃນການສົ່ງເສີມຄວາມຄືບໜ້າຂອງຊາດ ເພື່ອບັນລຸເປົ້າໝາຍການພັດທະນາແບບຍືນຍົງ (SDG2 ແລະ SDG6), ການຈັດຕັ້ງປະຕິບັດໂຄງການແມ່ນສອດຄ່ອງກັບແຜນຍຸດທະສາດດ້ານໂພຊະນາການແຫ່ງຊາດ 2016-2020 ເປັນພື້ນຖານໃນການປັບປຸງດ້ານໂພຊະນາການ ແລະ ສາທາລະນະສຸກແບບຍືນຍົງ ປະກອບສ່ວນເຂົ້າໃນການຫຼຸດຜ່ອນການຂາດສານອາຫານ ປະເພດລວງສູງບໍ່ໄດ້ມາດຕະຖານໃນເດັກອ່ອນ ແລະ ເດັກນ້ອຍ ໂດຍເນັ້ນໃສ່ 1,000 ວັນທໍາອິດ ຂອງການມີຊີວິດ ແລະ ປັບປຸງໂພຊະນາການໃນກຸ່ມແມ່ຍິງຢູ່ໃນ 52 ບ້ານ ປະກອບສ່ວນເຂົ້າໃນເປົ້າໝາຍຍຸດທະສາດແຫ່ງຊາດດ້ານໂພຊະນາການ ແລະ ເປົ້າໝາຍການພັດທະນາແບບຍືນຍົງ, ຫຼັງຄາເຮືອນປະຕິບັດດ້ານການຮັກສາສຸຂານາໄມຕາມເງື່ອນໄຂນໍ້າສະອາດ, ສຸຂາພິບານ ແລະ ອະນາໄມດີຂຶ້ນໃນຈໍານວນ 52 ບ້ານ ເທົ່າກັບ 100%, ແມ່ຍິງ ແລະ ເດັກຍິງສາມາດປັບປຸງສະພາບໂພຊະນາການ, ສຸຂະພາບ ແລະ ປະຕິບັດດ້ານສຸຂານາໄມໄດ້ດີຂຶ້ນ ໂດຍໄດ້ຮັບການເບິ່ງແຍງ ແລະ ລ້ຽງດູຈາກຄອບຄົວ, ແມ່ຍິງຖືພາຢ່າງໜ້ອຍຈໍານວນ 1,000 ຄົນ ໄດ້ຮັບຂໍ້ມູນກ່ຽວກັບໂພຊະນາການ ແລະ ການລ້ຽງເດັກໃນ 1,000 ວັນ, ຝາກທ້ອງຢູ່ສະຖານທີ່ບໍລິການສາທາລະນະສຸກເປົ້າໝາຍຂອງໂຄງການແມ່ນມີຜົນສຳເລັດເປັນກ້າວໆ.. ຈາກນັ້ນ, ຜູ້ເຂົ້າຮ່ວມໄດ້ຮັບຟັງຜົນການປະເມີນໄລຍະທ້າຍໂຄງການທຽບໃສ່ຂໍ້ມູນໃນໄລຍະຕົ້ນໂຄງການຢູ່ເມືອງສາລະວັນ ແຂວງສາລະວັນ ແລະ ປະກອບຄຳຄິດຄຳເຫັນໃສ່ບົດສະຫຼຸບເພື່ອໃຫ້ມີເນື້ອໃນຄົບຖ້ວນສົມບູນ.
(ຂ່າວ-ພາບ: ບຸນອູ້ມ)
ຄໍາເຫັນ