 |
ກອງປະຊຸມຄັ້ງນີ້, ໄດ້ຮັບຟັງການຈັດຕັ້ງຜັນຂະຫຍາຍມະຕິກອງປະຊຸມຄົບຄະນະບໍລິຫານງານສູນກາງພັກຄັ້ງທີ 10 ສະໄໝທີ XI, ສະຫຼຸບຕີລາຄາຄືນການເຄື່ອນໄຫວຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງເຊກອງ, ແຜນພັດທະນເສດຖະກິດ-ສັງຄົມ 6 ເດືອນຕົ້ນປີ 2025 ເຫັນໄດ້ວ່າ: ແຂວງເຊກອງ ສືບຕໍ່ຮັກສາໄດ້ສະຖຽນລະພາບທາງດ້ານການເມືອງຢ່າງໜັກແໜ້ນ, ປະຊາຊົນມີຄວາມສາມັກຄີປອງດອງ, ສັງຄົມມີຄວາມສະຫງົບໂດຍພື້ນຖານ, ແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ ໄດ້ຮັບການຈັດຕັ້ງປະຕິບັດຢ່າງຕັ້ງໜ້າ, ຫຼາຍຂະແໜງການມີຜົນສຳເລັດ, ບັນລຸໄດ້ຕາມຄາດໝາຍແຜນການທີ່ວາງໄວ້ ສາມາດເຮັດໃຫ້ເສດຖະກິດມີການຂະຫຍາຍຕົວ, ດ້ານພື້ນຖານໂຄງລ່າງ, ວັດຖຸເຕັກນິກ, ວັດທະນະທໍາ-ສັງຄົມໄດ້ຮັບການພັດທະນາຢ່າງຕໍ່ເນື່ອງ, ການແກ້ໄຂຄວາມທຸກຍາກຂອງປະຊາຊົນດີຂຶ້ນ, ການປະຕິບັດມາດຕະການຕ້ານ-ປ້ອງກັນ ແລະ ແກ້ໄຂການປະກົດການຫຍໍ້ທໍ້ທາງສັງຄົມ ກໍມີຜົນສໍາເລັດເປັນຢ່າງດີ.
ໂອກາດນີ້, ສະຫາຍ ບຸນຫຼາຍ ບຸດທິ ໄດ້ຮຽກຮ້ອງມາຍັງຄະນະພັກ, ຄະນະນຳຂອງແຂວງ ໂດຍສະເພາະຄະນະບໍລິຫານງານພັກແຂວງ ຈົ່ງສືບຕໍ່ຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງເຊກອງ ແລະ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນທ້າຍປີ 2025 ໃຫ້ມີຜົນສໍາເລັດ; ສືບຕໍ່ເສີມຂະຫຍາຍມູນເຊື້ອຄວາມສາມັກຄີພາຍໃນພັກ ແລະ ປະຊາຊົນບັນດາເຜົ່າ, ນໍາເອົາເນື້ອໃນຈິດໃຈກອງປະຊຸມຄັ້ງນີ້ ໄປເຜີຍແຜ່ເຊື່ອມຊຶມຢູ່ໃນຂົງເຂດວຽກງານຂອງຕົນ ແລະ ຈັດຕັ້ງປະຕິບັດໃຫ້ປະກົດຜົນເປັນຈິງ.
(ຂ່າວ-ພາບ: ອັດສະວິນ)
ຄໍາເຫັນ