 |
ກອງປະຊຸມຄັ້ງນີ້, ໄດ້ເນັ້ນບົດບາດຂອງ MICE ເປັນແຮງຂັບເຄື່ອນໃໝ່ຂອງການທ່ອງທ່ຽວ ໂດຍມຸ່ງໄປສູ່ຄຸນນະພາບ, ນະວັດຕະກຳ, ດີຈີຕອນ, ສີຂຽວ ແລະ ຄວາມຍືນຍົງ ພ້ອມທັງຊຸກຍູ້ການເຊື່ອມໂຍງລະຫວ່າງພາກລັດ, ທ້ອງຖິ່ນ, ທຸລະກິດ ແລະ ອົງການສາກົນ. ບັນດາຜູ້ແທນທີ່ເຂົ້າຮ່ວມໄດ້ແລກປ່ຽນວິໄສທັດ ແລະ ແນວທາງພັດທະນາ MICE ໃຫ້ສາມາດແຂ່ງຂັນໃນລະດັບສາກົນ ໂດຍເນັ້ນການຂະຫຍາຍຕະຫຼາດ, ຍົກສູງຄຸນນະພາບ, ນຳໃຊ້ເຕັກໂນໂລຊີ ແລະ ສ້າງຄຸນຄ່າໃໝ່.
 |
ສຳລັບຫວຽດນາມ, MICE ຖືກວາງໃຫ້ເປັນຜະລິດຖະພັນຍຸດທະສາດ ເພື່ອດຶງດູດນັກທ່ອງທ່ຽວຄຸນນະພາບສູງ, ສ້າງລາຍໄດ້, ກະຕຸ້ນການຄ້າ-ການລົງທຶນ ແລະ ເສີມສ້າງພາບພົດຂອງປະເທດ. ເວທີຄັ້ງນີ້ຍັງເນັ້ນການປ່ຽນຈາກ “ການຈັດງານ” ໄປສູ່ “ການສ້າງລະບົບນິເວດ MICE” ທີ່ມີຄວາມເປັນມືອາຊີບ, ສ້າງສັນ, ສີຂຽວ ແລະ ເຊື່ອມໂຍງສາກົນ ໂດຍມຸ່ງປ່ຽນຂໍ້ຄິດ ແລະ ຂໍ້ສະເໜີຈາກເວທີໃຫ້ເປັນແຜນງານທີ່ປະຕິບັດໄດ້ຈິງ.
 |
ເວທີດັ່ງກ່າວ ຈຶ່ງເປັນອີກກ້າວສຳຄັນໃນການຂະຫຍາຍການຮ່ວມມື MICE ລະຫວ່າງຫວຽດນາມ, ລາວ ແລະ ບັນດາປະເທດໃນພາກພື້ນສູ່ການພັດທະນາການທ່ອງທ່ຽວທີ່ຍືນຍົງ.
ລາວ - ຫວຽດາມ ໃນຖານະປະເທດເພື່ອນມິດຍຸດທະສາດ, ຄວາມສາມັກຄີພິເສດ ແລະ ການຮ່ວມມືຮອບດ້ານ ໂດຍສະເພາະ ແຂວງຈຳປາສັກ - ນະຄອນໂຮ່ຈີມິນ ມີຈຸດປະສົງ ເປົ້າໝາຍຮ່ວມກັນພັດທະນາການທ່ອງທ່ຽວທີ່ມີຢູ່ໃຫ້ໜັກແໜ້ນ ແລະ ເລິກເຊິ່ງ ແຕກດອກອອກຜົນສູງຂຶ້ນເລື້ອຍໆ.
 |
ຂ່າວ-ພາບ: ເກດສະໜາ
ຄໍາເຫັນ