ທ່ານ ສົມມາດ ພົນເສນາ ຮອງປະທານສະພາແຫ່ງຊາດ,ຕາງໜ້າຄະນະປະຈຳສະພາແຫ່ງຊາດ ໄດ້ປະກອບຄຳເຫັນຕໍ່ບົດລາຍງານການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມທຸກຍາກດ້ານເສດຖະກິດ ແລະ ການເງິນໃນໄລຍະ 5ປີ(2021-2025) ແລະ ທິດທາງໃນຕໍ່ໜ້າ,ໃນກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດ ຊຸດທີ IX,ໃນວັນທີ 12 ພະຈິກນີ້,ທີ່ສະພາແຫ່ງຊາດ, ໂດຍການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ.
ທ່ານ ສົມມາດ ພົນເສນາ ໄດ້ສະສະແດງຄວາມຊົມເຊີຍຕໍ່ລັດຖະບານສາມາດເກັບລາຍຮັບໄດ້ 18.43% ຂອງ GDP (ມະຕິສະພາ 17% ຂອງ GDP), ເນື່ອງຈາກສາມາດປະຕິບັດມາດຕະການຫັນເປັນທັນສະໄໝໃນການເກັບລາຍຮັບມີປະສິດທິພາບ ແລະ ປະສິດທິຜົນດີຂຶ້ນ, ຊຶ່ງສອດຄ່ອງກັບຫຼັກການຫັນເປັນມືອາຊີບເປັນບາດກ້າວທີ່ເປັນຮູບປະທຳດີຂຶ້ນ,ຄຸ້ມຄອງກະແສເງິນຕາ ຈາກການສົ່ງອອກສິນຄ້າ ໃຫ້ກັບຄືນສູ່ປະເທດ ສາມາດບັນລຸໄດ້ 72,46% (ມະຕິສະພາ ບໍ່ຫຼຸດ 70% ຂອງມູນຄ່າສົ່ງອອກ),ຄັງສຳຮອງເງິນຕາຕ່າງປະເທດ ສາມາດກຸ້ມການນຳເຂົ້າໄດ້ 5.28 ເດືອນ (ມະຕິສະພາ ສາມາດກຸ້ມການນຳເຂົ້າບໍ່ຫຼຸດ 3 ເດືອນ), ອັດຕາສ່ວນການສົ່ງອອກຜະລິດຕະພັນກະສິກໍາ ບັນລຸໄດ້ 31.49% (ມະຕິສະພາ 30% ຂອງມູນຄ່າສົ່ງອອກຜະລິດຕະພັນກະສິກຳທັງໝົດ),ຜະລິດທົດແທນການນໍາເຂົ້າຫົວອາຫານສັດ ປະຕິບັດໄດ້ 77% ຂອງຄວາມຕ້ອງການພາຍໃນທັງໝົດ ປີ 2025 (ມະຕິສະພາ 70% ຂອງການສະໜອງຫົວອາຫານສັດຢູ່ຕະຫຼາດພາຍໃນ),ການຜະລິດທົດແທນການນໍາເຂົ້າ ຝຸ່ນຊີວະພາບ ປະມານ 50% (ມະຕິສະພາ 50% ຂອງການສະໜອງຝຸ່ນຊີວະພາບຢູ່ຕະຫຼາດພາຍໃນ),ການຜະລິດຊີມັງສາມາດຕອບສະໜອງຄວາມຕ້ອງການຂອງຕະຫຼາດພາຍໃນ.
ເພື່ອສືບຕໍ່ເປັນແຜນວຽກບູລິມະສິດທີ່ເຊື່ອມສານເຂົ້າໃນແຜນພັດທະນາເສດຖະກິດ-ສັງຄົງ 5 ປີ ຄັ້ງທີ X (2026-2030) ແລະ ເພື່ອຮັບປະກັນການຈັດຕັ້ງປະຕິບັດທິດທາງແຜນການດັ່ງກ່າວ ໃຫ້ມີຈຸດສຸມ, ຄະນະປະຈຳສະພາແຫ່ງຊາດ ສະເໜີໃຫ້ລັດຖະບານ,ສືບຕໍ່ຈັດຕັ້ງຜັນຂະຫຍາຍ ມະຕິກອງປະຊຸມສະພາແຫ່ງຊາດ ສະບັບເລກທີ 03/ສພຊ, ລົງວັນທີ 10 ສິງຫາ 2021 ແລະ ສະບັບເລກທີ 111/ສພຊ, ລົງວັນທີ 21 ພະຈິກ 2023 ໂດຍການ ເຊື່ອມສານເຂົ້າໃນຄາດໝາຍສູ້ຊົນ ຂອງແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ X (2026-2030),ສຸມໃສ່ແກ້ໄຂຂໍ້ຄົງຄ້າງທາງດ້ານກົນໄກ, ຂອດອຸດຕັນ, ລະບອບລະບຽບ ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ໃນໄລຍະຜ່ານມາ ໃຫ້ມີປະສິດທິພາບ ແລະ ປະສິດທິຜົນ ໃຫ້ດີຂຶ້ນ,ປະເມີນຜົນການຈັດຕັ້ງປະຕິບັດວາລະແຫ່ງຊາດໃນໄລຍະຜ່ານມາ ໃຫ້ເຫັນໄດ້ຜົນສໍາເລັດ, ຂໍ້ຄົງຄ້າງ, ສາເຫດ,ບົດຮຽນທີ່ຖອດຖອນໄດ້ເພື່ອຄົ້ນຄວ້າສ້າງເປັນແຜນການລະອຽດຂອງບັນດາຂະແໜງການທີ່ກ່ຽວຂ້ອງ ນໍາໄປຈັດຕັ້ງປະຕິບັດຢ່າງກົມກຽວ ແລະ ເປັນເອກະພາບ.
(ຂ່າວ:ສຳນານ,ພາບ:ບຸນຕອມ)
ຄໍາເຫັນ