ມີ ທ່ານ ກາວ ກິມ ຮຸນ ເລຂາທິການໃຫຍ່ອາຊຽນ, ບັນດາທ່ານລັດຖະມົນຕີສະພາເຂດການຄ້າເສລີອາຊຽນ, ທ່ານລັດຖະມົນຕີ ກະຊວງການຄ້າ ແລະ ອຸດສາຫະກໍາ ຈາກປະເທດຕີມໍແລັດສະເຕ, ບັນດາທ່ານຫົວໜ້າຄະນະຜູ້ແທນຂອງປະເທດສະມາຊິກອາຊຽນເຂົ້າຮ່ວມ.
ທ່ານ ມະໄລທອງ ກົມມະສິດ ໄດ້ກ່າວເປີດກອງປະຊຸມວ່າ: ກອງປະຊຸມຄັ້ງນີ້ ສະແດງເຖິງຄວາມໝາຍໝັ້ນຂອງປະເທດສະມາຊິກທີ່ຈະສືບຕໍ່ຮ່ວມກັນເພື່ອສ້າງໃຫ້ອາຊຽນ ກາຍເປັນຖານການຜະລິດໜຶ່ງດຽວທີ່ມີຄວາມສາມາດດ້ານການແຂ່ງຂັນໃນພາກພື້ນຊຶ່ງກອງປະຊຸມຈະໄດ້ສືບຕໍ່ເພີ່ມທະວີການເຊື່ອມໂຍງການຄ້າດ້ານສິນຄ້າໃນພາກພື້ນໃຫ້ກວ້າງ
ຂວາງ ແລະ ເລິກເຊິ່ງຕື່ມອີກ, ພ້ອມທັງ ຈະໄດ້ສຸມໃສ່ ປຶກສາຫາລື, ພິຈາລະນາ ແລະ ຮັບຮອງເອົາບົດລາຍງານຂອງ ຄະນະເຈົ້າໜ້າທີ່ອາວຸໂສເສດຖະກິດອາຊຽນ, ບົດລາຍງານຄະນະເຈລະຈາຍົກລະດັບສັນຍາການຄ້າດ້ານສິນຄ້າອາຊຽນ ແລະ ຖະແຫຼງການຮ່ວມຂອງກອງປະຊຸມສະພາເຂດການຄ້າເສລີອາຊຽນ ຄັ້ງທີ 38.ນັບແຕ່ອາຊຽນໄດ້ສ້າງຕັ້ງເຂດການຄ້າເສລີອາຊຽນ ໃນປີ 1992 ເປັນຕົ້ນມາ, ພາກພື້ນອາຊຽນ ໄດ້ມີການພັດທະນາຢ່າງຕໍ່ເນື່ອງ ໂດຍສະເພາະການຫຼຸດຜ່ອນ ແລະ ລຶບລ້າງອັດຕາພາສີ, ການສ້າງຄວາມສະດວກທາງດ້ານການຄ້າ ແລະ ການຫັນເປັນທັນສະໄໝດ້ານການເຊື່ອມໂຍງລະບົບແຈ້ງພາສີ ແລະ ອື່ນໆ. ມາເຖິງປັດຈຸບັນ, ອາຊຽນ ໄດ້ລຶບລ້າງອັດຕາພາສີເກືອບໝົດທຸກລາຍການສິນຄ້າ, ກວມເອົາ 98,6% ຂອງລາຍການອັດຕາພາສີທັງໝົດ ແລະ ສືບຕໍ່ພັດທະນາລະບົບແຈ້ງພາສີ ປະຕູດຽວອາຊຽນຢ່າງຕໍ່ເນື່ອງ ຊຶ່ງເປັນການຫຼຸດຜ່ອນຕົ້ນທຶນການຄ້າ ແລະ ອໍານວຍຄວາມສະດວກແກ່ພາກທຸລະກິດໃນພາກພື້ນຂອງພວກເຮົາ. ບັນດາຜົນສໍາເລັດດັ່ງກ່າວ ໄດ້ຊຸກຍູ້ການຄ້າພາຍໃນອາຊຽນ ໃຫ້ມີການຂະຫຍາຍຕົວ, ສະແດງອອກ ໃນປີ 2023 ມູນຄ່າການຄ້າພາຍໃນອາຊຽນ ສາມາດບັນລຸໄດ້ 759 ຕື້ ໂດລາ, ກວມເອົາ 21,5% ຂອງມູນຄ່າການຄ້າທັງໝົດຂອງອາຊຽນ.
ທ່ານ ມະໄລທອງ ກົມມະສິດ ຍັງໄດ້ກ່າວອີກວ່າ: ໃນປີຜ່ານມາ, ພວກເຮົາໄດ້ຈັດຕັ້ງປະຕິບັດບັນດາແຜນວຽກກ່ຽວກັບການສ້າງເຂດການຄ້າເສລີອາຊຽນ ໄດ້ບັນລຸຕາມເປົ້າໝາຍຫຼາຍດ້ານໂດຍສະເພາະພວກເຮົາສາມາດແກ້ໄຂບັນດາຂໍ້ຄົງຄ້າງທີ່ເກີດຈາກການຈັດ
ຕັ້ງປະຕິບັດສັນຍາການຄ້າດ້ານສິນຄ້າອາຊຽນ ແລະ ການນໍາໃຊ້ການແລກປ່ຽນບັນດາເອກະສານການຄ້າແບບເອເລັກໂຕຣນິກ ຜ່ານລະບົບບໍລິການແຈ້ງພາສີປະຕູດຽວອາຊຽນ. ພ້ອມນັ້ນ,ສະແດງຄວາມຊົມເຊີຍ ຕໍ່ຄວາມຄືບໜ້າຂອງການເຈລະຈາຍົກລະດັບສັນຍາການຄ້າດ້ານສິນຄ້າອາຊຽນ ແລະ ຫວັງຢ່າງຍິ່ງວ່າ ການເຈລະຈາຍົກລະດັບສັນຍາດັ່ງກ່າວ ຈະສາມາດສຳເລັດໃນປີ 2025 ຕາມທີ່ໄດ້ກໍານົດໄວ້.
(ຂ່າວ: ຍຸພິນທອງ-ພາບ: ແສງຈັນ)
ຄໍາເຫັນ