 |
ໃນການພົບປະຄັ້ງນີ້, ສະຫາຍ ກິແກ້ວ ໄຂຄໍາພິທູນ ໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ການມາຢ້ຽມຢາມຂອງຄະນະຜູ້ແທນຫວຽດນາມ, ເຊື່ອໝັ້ນວ່າການຢ້ຽມຢາມ ແລະ ເຮັດວຽກຂອງຄະນະຜູ້ແທນໃນຄັ້ງນີ້ ຈະປະສົບຜົນສໍາເລັດຢ່າງຈົບງາມ ທັງເປັນການປະກອບສ່ວນເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ການເປັນຫຸ້ນສ່ວນຍຸດທະສາດ ລາວ-ຫວຽດນາມ ໃຫ້ໝັ້ນຄົງຂະໜົງແກ່ນ ແລະ ແຕກດອກອອກຜົນຍິ່ງໆຂຶ້ນ.
ການຢ້ຽມຢາມຄັ້ງນີ້ ດໍາເນີນໄປໃນທ່າມກາງບັນຍາກາດທີ່ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ກໍາລັງຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ຂອງຕົນ. ພິເສດແມ່ນຢູ່ໃນໄລຍະທີ່ ສປປ ລາວ ກໍາລັງຈັດຕັ້ງການເຊື່ອມຊຶມມູນເຊື້ອ 2 ວັນປະຫວັດສາດ ຄື: ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 64 ປີ, ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 49 ປີ.
ພ້ອມນີ້, ທັງສອງຝ່າຍຍັງໄດ້ກຽມຄວາມພ້ອມໃນການປະສານສົມທົບກັນ ເພື່ອຫ້າງຫາກະກຽມຈັດຕັ້ງສະເຫຼີມສະຫຼອງສອງວັນປະຫວັດສາດ ໃນປີຕໍ່ໄປຢ່າງມີຄວາມໝາຍຕື່ມອີກ.
ໂອກາດດັ່ງກ່າວ, ສະຫາຍ ກິແກ້ວ ໄຂຄໍາພິທູນ ໄດ້ແຈ້ງໃຫ້ຝ່າຍຫວຽດນາມຊາບກ່ຽວກັບຜົນສໍາເລັດອັນສໍາຄັນຂອງພັກປະຊາຊົນ ປະຕິວັດລາວ ໃນໄລຍະຜ່ານມາ ເປັນຕົ້ນແມ່ນການສໍາເລັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ ໃນຕົ້ນປີ 2026, ການສໍາເລັດກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ 12, ວຽກງານກວດກາພັກ ຄັ້ງທີ 6, ວຽກງານສື່ມວນຊົນ ຄັ້ງທີ 1 ແລະ ກອງປະຊຸມອົງຄະນະພັກໃນຂົງເຂດການເມືອງຈໍານວນໜຶ່ງ.
ກ່ຽວກັບການຮ່ວມມືລະຫວ່າງ ສອງສະພາທິດສະດີສູນກາງພັກ, ທັງສອງຝ່າຍໄດ້ຈັດຕັ້ງປະຕິບັດຕາມບົດບັນທຶກການຮ່ວມມືຢ່າງມີຜົນສໍາເລັດຫຼາຍດ້ານ. ການຜັດປ່ຽນກັນເປັນເຈົ້າພາບກອງປະຊຸມ ແລະ ການແລກປ່ຽນບົດຮຽນດ້ານທິດສະດີ-ພຶດຕິກໍາ ໄດ້ກາຍເປັນພື້ນຖານອັນສໍາຄັນໃນການປັບປຸງບູລະນະແນວທາງນະໂຍບາຍຂອງສອງພັກ. ກອງປະຊຸມສໍາມະນາທິດສະດີ ສອງພັກ ຄັ້ງທີ XIII ທີ່ຝ່າຍລາວຈະເປັນເຈົ້າພາບຫົວຂໍ້ຫຼັກ: "ເພີ່ມທະວີການເຊື່ອມໂຍງ ເຊື່ອມຈອດພາກພື້ນ ແລະ ສາກົນ ໃຫ້ເຂົ້າສູ່ລວງເລິກ ບົດຮຽນລາວ, ຫວຽດນາມ" ຊຶ່ງຄາດຄະເນວ່າຈະຈັດຂຶ້ນຢູ່ ແຂວງອຸດົມໄຊ ໃນໄຕມາດທີ 4 ຂອງປີ 2026.
ໃນໄລຍະຈັດກອງປະຊຸມ ສະເໜີໃຫ້ມີການສືບຕໍ່ເຊັນບົດບັນທຶກການຮ່ວມມືສະບັບໃໝ່ຂອງສະພາທິດສະດີສູນກາງພັກ (2026-2030) ເພື່ອປ່ຽນແທນສະບັບເກົ່າທີ່ຈະໝົດອາຍຸໃນທ້າຍປີ 2026 ນີ້.
(ຂ່າວ: ແສງຈັນ)
ຄໍາເຫັນ