 |
ກອງປະຊຸມຄັ້ງນີ້, ໄດ້ທົບທວນບົດບັນທຶກ ຂໍ້ຕົກລົງຄວາມຮ່ວມມືສາທາລະນະສຸກຊາຍແດນໄທ-ລາວ ລະຫວ່າງແຂວງຄໍາມ່ວນ ແລະ ຈັງຫວັດນະຄອນພະນົມ ຄັ້ງທີ 6 ໃນລະຫວ່າງວັນທີ 16 ສິງຫາ 2025 ຈັດຂຶ້ນທີ່ຈັງຫວັດນະຄອນພະນົມ. ກອງປະຊຸມໄດ້ປຶກສາຫາລືດ້ານການຮ່ວມມືໃນ 4 ຫົວຂໍ້ຄື: ຄວາມຮ່ວມມືໃນການເຝົ້າລະວັງປ້ອງກັນພະຍາດ ແລະ ໄພສຸຂະພາບ; ຄວາມຮ່ວມມືດ້ານສົ່ງເສີມສຸຂະພາບ, ການຮັກສາພະຍາບານ ແລະ ການຮັບສົ່ງຕໍ່ຄົນເຈັບ; ຄວາມຮ່ວມມືດ້ານການຄຸ້ມຄອງຜູ້ບໍລິໂພກ ດ້ານສາທາລະນະສຸກ; ຄວາມຮ່ວມມືດ້ານການພັດທະນາບຸກຄະລາກອນຮ່ວມກັນ. ພ້ອມນີ້, ສອງຝ່າຍຍັງໄດ້ສືບຕໍ່ປຶກສາຫາລື ແລະ ແລກປ່ຽນບົດຮຽນດ້ານວິຊາການ ເປັນຕົ້ນ ບັນລະຍາຍເລື່ອງ ແນວທາງການເຝົ້າລະວັງ ແລະ ສອບສວນພະຍາດທີ່ຕິດເຊື້ອໄວຣັສອີໂບລາ ແລະ ແນວທາງການຕອບໂຕ້ພາວະສຸກເສີນທາງດ້ານການແພດ, ສາທາລະນະສຸກ ແລະ ຂະບວນການຝຶກຊ້ອມແຜນ ໂດຍວິທະຍາກອນສໍານັກງານປ້ອງກັນຄວບຄຸມພະຍາດທີ່ 8 ຈັງຫວັດອຸດອນທານີ, ຝຶກປະຕິບັດຊ້ອມແຜນຕອບໂຕ້ພາວະສຸກເສີນທາງດ້ານການແພດ ແລະ ສາທາລະນະສຸກ ຕາມສະຖານະການສົມມຸດກໍລະນີທີ່ມີພະຍາດເກີດຂຶ້ນໃໝ່, ພະຍາດເກີດຂຶ້ນຊໍ້າ, ພະຍາດຕິດຕໍ່ທີ່ເປັນບັນຫາສໍາຄັນ (ພະຍາດຕິດເຊື້ອໄວຣັສອີໂບລາ). ນອກຈາກນີ້, ຍັງໄດ້ຈັດກຸ່ມຝຶກຊ້ອມແຜນກຽມຄວາມພ້ອມ ເພື່ອຕອບໂຕ້ພາວະສຸກເສີນທາງສາທາລະນະສຸກ ພ້ອມທັງທົບທວນຄືນຫຼັງການປະຕິບັດການຝຶກຊ້ອມແຜນ ເພື່ອກຽມຄວາມພ້ອມຕອບໂຕ້ພາວະສຸກເສີນທາງດ້ານການແພດ ແລະ ສາທາລະນະສຸກ.
 |
ການທົບທວນ ການຮ່ວມມືດ້ານສາທາລະລະສຸກ ແລະ ການດໍາເນີນງານແກ້ໄຂບັນຫາສາທາລະນະສຸກຊາຍແດນ ແລະ ຝຶກຊ້ອມແຜນກຽມຄວາມພ້ອມຕອບໂຕ້ພາວະສຸກເສີນ ດ້ານສາທາລະນະສຸກຂອງສອງແຂວງ, ສອງປະເທດ ລະຫວ່າງແຂວງຄໍາມ່ວນ ແລະ ສາທາລະນະສຸກຈັງຫວັດນະຄອນພະນົມໃນຄັ້ງນີ້, ໄດ້ປະສົບຜົນສໍາເລັດຕາມຄາດໝາຍທີ່ວາງໄວ້ຢ່າງມີປະສິດທິພາບ ແລະ ປະສິດທິຜົນ. ຂ່າວ-ພາບ: ແດງສະຫວັດ ແສນພານິດ
ຄໍາເຫັນ