 |
ທ່ານ ໂຢເກັສວາ ສັງວານ ໄດ້ຍົກໃຫ້ເຫັນເຖິງຄວາມສຳຄັນຂອງໂຍຄະໂລກ ໃນການສົ່ງເສີມສຸຂະພາບທາງກາຍ ແລະ ຈິດໃຈ ຊຶ່ງການສະເຫຼີມສະຫຼອງ ວັນໂຍຄະປີນີ້ພາຍໃຕ້ຫົວຂໍ້ "ໂຍຄະສໍາລັບທຸກຄົນໃນໂລກ ແລະ ເພື່ອສຸຂະພາບຂອງທຸກຄົນ" ໂດຍເນັ້ນເຖິງຄວາມກ່ຽວຂ້ອງຂອງໂຍຄະ ແລະ ສຸຂະພາບຂອງຄົນໃນໂລກ ທີ່ເຊື່ອມຕໍ່ກັນໃນປັດຈຸບັນ.
ສະມັດຊາໃຫຍ່ ອົງການສະຫະປະຊາຊາດ ໄດ້ຕົກລົງເອົາວັນທີ 21 ມິຖຸນາ ຂອງທຸກໆປີເປັນວັນໂຍຄະສາກົນ. ນັບແຕ່ປີ 2016 ເປັນຕົ້ນມາ ສະຖານທູດອິນເດຍ ແລະ ລັດຖະບານລາວ ໄດ້ມີການຮ່ວມມືກັນຈັດສະເຫຼີມສະຫຼອງວັນໂຍຄະສາກົນໃນທຸກໆປີ ຊຶ່ງໂຍຄະ ເປັນຂອງຂວັນອັນລ້ຳຄ່າຂອງປະເພນີບູຮານຂອງອິນເດຍ ທີ່ມອບໃຫ້ແກ່ມະນຸດ. ການຫຼິ້ນກິລາໂຍຄະແມ່ນເພື່ອຜົນປະໂຫຍດຂອງທຸກຄົນ ແລະ ມີຜົນດີຕໍ່ສຸຂະພາບ, ເປັນການສ້າງຄວາມສາມັກຄີ ແລະ ເຮັດໃຫ້ຈິດໃຈມີຄວາມສະຫງົບ. ການປະຕິບັດໂຍຄະແມ່ນວິທີ ທີ່ຈະນໍາພາໄປສູ່ການມີສຸຂະພາບທີ່ດີ.
ທ່ານ ວິລາວົງ ບຸນສຸກໄທ ໄດ້ກ່າວວ່າ: ການຈັດກິດຈະກຳສະເຫຼີມສະຫຼອງ ວັນໂຍຄະສາກົນ ປຽບເໝືອນ ບຸນມະໂຫລານອັນຍິ່ງໃຫຍ່ ຂອງວົງຄະນາຍາດສາກົນ ຊຶ່ງໄດ້ເລີ່ມສະເຫຼີມສະຫຼອງກັນມາ ຕັ້ງແຕ່ປີ 2016 ມາຮອດປັດຈຸບັນ ມີຜູ້ຝຶກຫຼິ້ນໂຍຄະເພີ່ມຂຶ້ນຢ່າງຕໍ່ເນື່ອງ. ພິເສດປີນີ້ການສະເຫຼີມສະຫຼອງວັນດັ່ງກ່າວຢູ່ ສປປ ລາວ ໄດ້ຈັດຂຶ້ນຢູ່ 4 ແຂວງ, 1 ນະຄອນຫຼວງວຽງຈັນ ກໍຄື: ແຂວງຫຼວງພະບາງ, ວຽງຈັນ, ສະຫວັນນະເຂດ ແລະ ແຂວງຈໍາປາສັກ ຊຶ່ງນະຄອນຫຼວງວຽງຈັນ ແມ່ນໄດ້ຈັດຂຶ້ນຢູ່ 3 ຈຸດ ລວມທັງກິດຈະກຳທີ່ເປັນທາງການໃນມື້ນີ້ ເພື່ອເຮັດໃຫ້ການສະເຫຼີມສະຫຼອງ ວັນໂຍຄະສາກົນ ໃຫ້ມີການໂຄສະນາເຜີຍແຜ່ເປັນຂະບວນການຟົດຟື້ນກວ້າງຂວາງ ແຕ່ສູນກາງລົງຮອດທ້ອງຖິ່ນ ເນື່ອງຈາກກິລາໂຍຄະເປັນກິລາປະເພດໜຶ່ງທີ່ມວນຊົນທຸກເພດ-ທຸກໄວ, ທຸກຊັ້ນຄົນໃນສັງຄົມສາມາດເຂົ້າເຖິງໄດ້ງ່າຍ ແລະ ເປັນກິລາຍອດນິຍົມປະເພດໜຶ່ງໃນທົ່ວໂລກ ທີ່ສາມາດຝຶກຫຼິ້ນຢູ່ເຮືອນໃຜລາວໄດ້ຢ່າງສະດວກສະບາຍ. ອີກດ້ານໜຶ່ງ, ໂຍຄະ ຍັງໃຫ້ຜົນປະໂຫຍດຫຼາຍຢ່າງຕໍ່ຄົນເຮົາ ຊຶ່ງນອກຈາກຈະເປັນການອອກກໍາລັງກາຍໂດຍທົ່ວໄປແລ້ວ, ແຕ່ຍັງເປັນການຊ່ວຍເສີມສ້າງພະລັງຈິດ-ພະລັງກາຍ ແລະ ຜ່ອນຄາຍຄວາມຕຶງຄຽດຂອງຄົນເຮົາ ໃຫ້ມີຄວາມເຂັ້ມແຂງຂຶ້ນຕື່ມອີກດ້ວຍ ແລະ ທັງເປັນການປະກອບສ່ວນເຂົ້າໃນການສົ່ງເສີມສັນຕິພາບ, ມິດຕະພາບ ແລະ ຄວາມຜາສຸກ, ລະຫວ່າງບັນດາປະຊາຊາດຢູ່ໃນໂລກ ແລະ ຫວັງວ່າບັນດາທ່ານທີ່ເຂົ້າມາຮ່ວມງານໃນມື້ນີ້ ຈະເປັນກໍາລັງແຮງອີກແຮງໜຶ່ງ ໃນການຊ່ວຍໂຄສະນາເຜີຍແຜ່ ແລະ ຊູກຍູ້ສົ່ງເສີມການຝຶກຫຼິ້ນ ແລະ ຄຸນປະໂຫຍດຂອງກິລາໂຍຄະອອກສູ່ສັງຄົມ ໃຫ້ນັບມື້ນັບກວ້າງຂວາງຂຶ້ນໄປເລື້ອຍໆ.
(ຂ່າວ: ຂປລ).
ຄໍາເຫັນ