ສາທາສະຫວັນນະເຂດແລະ ສາທາກວາງບິງເພີ່ມທະວີການຮ່ວມມື 2 ຝ່າຍ

ພະແນກສາທາລະນະສຸກແຂວງສະຫວັນນະເຂດສປປ ລາວແລະພະແນກສາທາລະນະສຸກແຂວງກວາງບິງສສ ຫວຽດນາມ ໄດ້ຈັດກອງປະຊຸມພົບປະແລກປ່ຽນບົດຮຽນ ເພື່ອຮ່ວມມືພັດທະນາວຽກງານສາທາລະນະສຸກຂຶ້ນເມື່ອບໍ່ດົນມານີ້ ທີ່ພະແນກສາທາລະນະສຸກແຂວງສະຫວັນນະເຂດ ໂດຍການເປັນປະທານຂອງທ່ານ ແສງດາວ ສີດາໄລ ຫົວໜ້າພະແນກສາທາລະນະສຸກແຂວງສະຫວັນນະເຂດ ແລະທ່ານ ເຍືອງແທງບິງ ຫົວໜ້າພະແນກສາທາລະນະສຸກແຂວງກວາງບິງພ້ອມດ້ວຍຜູ້ແທນສອງແຂວງເຂົ້າຮ່ວມ.
       ໂອກາດນີ້, ຫົວໜ້າພະແນກສາທາລະນະສຸກທັງ 2 ແຂວງ ໄດ້ລາຍງານສະພາບລວມທາງດ້ານການພັດທະນາຂະແໜງສາທາລະນະສຸກ ເພື່ອເປັນແນວທາງໃນການຮ່ວມມືພັດທະນາໃນຕໍ່ໜ້າ ຊຶ່ງປະກອບມີ: ຂົງເຂດກັນ-ຄວບຄຸມພະຍາດຕິດຕໍ່ ແລະສົ່ງເສີມສຸຂະພາບທັງສອງຝ່າຍພ້ອມກັນສືບຕໍ່ສຶກສາ, ຮ່ວມມື, ແລກປ່ຽນຂໍ້ມູນຂ່າວສານໃນການກັນ ແລະຄວບຄຸມພະຍາດຕິດຕໍ່ ໂດຍເນັ້ນໃສ່ 18 ພະຍາດທີ່ເຝົ້າລະວັງເປັນຕົ້ນ ໄຂ້ເລືອດອອກ, ໄຂ້ມາເລເຣຍ, ໄຂ້ທໍລະພິດ, H5N1, H1N1, ໂຄວິດ-19 ແລະພະຍາດຕິດຕໍ່ອື່ນໆຕາມ IHR, ໂດຍສະເພາະພື້ນທີ່ຊາຍແດນເມືອງຕິດຈອດກັນເຊັ່ນ: ເມືອງເຊໂປນ ແລະເມືອງເຫຼ້ຖຸ້ຍ, ຂົງເຂດປິ່ນປົວ ແລະຟື້ນຟູໜ້າທີ່ການຮັບປະກັນເງື່ອນໄຂ ແລະສະໜອງການບໍລິການທີ່ຈຳເປັນຂອງສະຖານທີ່ບໍລິການປິ່ນປົວພະຍາດໃຫ້ທ່ວງທັນໃນກໍລະນີສຸກເສີນ, ກວດ ແລະປິ່ນປົວພະຍາດໃຫ້ພະນັກງານ-ລັດຖະກອນ ແລະພໍ່ແມ່ປະຊາຊົນທັງສອງແຂວງໃນເວລາເຈັບເປັນ, ສືບຕໍ່ຮ່ວມມືເພີ່ມທະວີແລກປ່ຽນປະສົບການ, ກໍ່ສ້າງ ແລະແລກປ່ຽນດ້ານວິຊາການ ເມື່ອແຕ່ລະຝ່າຍມີຄວາມຕ້ອງການ, ສະໜອງອຸປະກອນທາງການແພດບົນພື້ນຖານຄວາມຕ້ອງການ ແລະສະພາບຕົວຈິງ ເພື່ອປະຕິບັດການຮ່ວມມືໃນຂົງເຂດສະໜອງຢາປິ່ນປົວໃຫ້ບັນດາສະຖານທີ່ກວດແລະປິ່ນປົວພະຍາດໃຫ້ແກ່ປະຊາຊົນໃນເຂດຊາຍແດນ ກໍຄືບັນດາສະຖານບໍລິການສາທາອື່ນໆ.ຈາກນັ້ນ, ຄະນະນໍາທັງສອງຝ່າຍໄດ້ລົງນາມຮ່ວມມືໂດຍທ່ານແສງດາວ ສີດາໄລ ແລະ ທ່ານ ເຢືອງ ແທງ ບິງ.
       ໂອກາດນີ້, ຄະນະຜູ້ແທນ 2 ຝ່າຍໄດ້ເຄື່ອນໄຫວຢ້ຽມຢາມໂຮງໝໍແຂວງສະຫວັນນະເຂດ ໂດຍການຕ້ອນຮັບຂອງທ່ານ ຈັນທະລາ ພາມີສິດ ຜູ້ອໍານວຍການໂຮງໝໍແຂວງສະຫວັນນະເຂດ ພ້ອມຄະນະ.
ຂ່າວ-ພາບ: ສະຫວັນນະເຂດ