ສາຍພົວພັນອັນໝັ້ນແກ່ນ ຫວຽດນາມ – ລາວ ບົນພື້ນຖານປະຫວັດສາດໝັ້ນຄົງ ຮ່ວມມືຮອບດ້ານ

ສາຍພົວພັນ ລະຫວ່າງ ຫວຽດນາມ – ລາວ ໄດ້ວາງຮາກຖານໂດຍ ປະທານ ໂຮ່ຈິມິນ ຜູ້ນຳອັນຍິ່ງໃຫຍ່, ປະທານ ໄກສອນ ພົມວິຫານ ແລະ ປະທານ ສຸພານຸວົງ ທີ່ແສນເຄົາລົບຮັກ, ທີ່ໄດ້ກຳນົດຢ່າງຊັດເຈນເສັ້ນທາງການພັດທະນາສາຍພົວພັນທີ່ສະໜິດແໜ້ນລະຫວ່າງ ສອງຊາດ. ການກໍ່ຕັ້ງຂອງພັກກອມມູນນິດອິນດູຈີນ ໃນປີ 1930 ແມ່ນເຫດການສຳຄັນທີ່ມີຄວາມໝາຍຢ່າງໃຫຍ່ຫຼວງ, ໄດ້ນຳພາການປະຕິວັດຂອງສອງປະເທດໃຫ້ເດີນໄປຕາມເສັ້ນທາງດຽວກັນ, ສ້າງພື້ນຖານໃຫ້ແກ່ການຮ່ວມມື ແລະ ຮ່ວມສໍາພັນຕສູ້ຮົບໃນຕະຫຼອດໄລຍະປະຫວັດສາດທີ່ຍາກລຳບາກ ແຕ່ກໍ່ຍິ່ງໃຫຍ່ທີ່ສຸດຂອງສອງຊາດ.

ໃນຕະຫຼອດຊຸມປີແຫ່ງການຕໍ່ສູ້ຕ້ານສົງຄາມອັນຍາກລຳບາກ, ປະຊາຊົນ ຫວຽດນາມ ແລະ ປະຊາຊົນລາວ ໄດ້ຢືນຄຽງບ່າຄຽງໄຫຼ່ ຜ່ານຜ່າອຸປະສັກນານາປະມານ, ຮ່ວມກັນຕໍ່ສູ້ຕ້ານສັດຕູໂຕດຽວ. ການເຂົ້າຮ່ວມຂອງກອງກໍາລັງທະຫານອາສາສະໝັກຫວຽດນາມ ແລະ ຄະນະຊ່ຽວຊານ ຫວຽດນາມ ຢູ່ ສປປ ລາວ ແມ່ນສັນຍາລັກແຫ່ງນໍ້າໃຈສາກົນອັນບໍລິສຸດ ແລະ ປະກອບສ່ວນສຳຄັນໃນພາລະກິດປົດປ່ອຍຊາດລາວ ບັນລຸຜົນສຳເລັດ.

ໃນຂະນະດຽວກັນນັ້ນ, ປະຊາຊົນລາວ ໄດ້ໃຫ້ການປົກປ້ອງອັນອົບອຸ່ນ ແລະ ສະໜັບສະໜູນຢ່າງບໍລິສຸດໃຈແກ່ກຳລັງທະຫານຫວຽດນາມ, ສ້າງກໍາລັງແຮງສໍາພັນທະມິດ ອັນໝັ້ນແກ່ນ. ເສັ້ນທາງສາຍພູຫຼວງ ແມ່ນສັນຍາລັກແຫ່ງຄວາມມິດຈິດມິດໃຈ ແລະ ການເສຍສະຫຼະ, ໄດ້ກາຍເປັນຫຼັກຖານປະຫວັດສາດອັນສຳຄັນ ດ້ວຍການປະສານສົມທົບ ແລະ ການປົກປ້ອງຊ່ວຍເຫຼືອຂອງປະຊາຊົນລາວ.

ສາຍພົວພັນ ລະຫວ່າງ ຫວຽດນາມ – ລາວ ໄດ້ຖືກຮັບຮອງຢ່າງເປັນທາງການຜ່ານການສ້າງຕັ້ງສາຍພົວພັນທາງການທູດ ໃນວັນທີ 5 ກັນຍາ 1962. ໂດຍສະເພາະ ໃນວັນທີ 18 ກໍລະກົດ 1977, ສົນທິສັນຍາມິດຕະພາບ ແລະ ການຮ່ວມມື ຫວຽດນາມ – ລາວ ໄດ້ຖືກລົງນາມ, ອັນເປັນພື້ນຖານທາງດ້ານນິຕິກຳ ທີ່ມີຄວາມສຳຄັນຢ່າງຍິ່ງ ສຳລັບໄລຍະການປະສານສົມທົບ ໃນການສ້າງສາ ແລະ ປົກປັກຮັກສາປະເທດຊາດ ແຫ່ງ ສັງຄົມນິຍົມຂອງແຕ່ລະປະເທດ. ບັນດາເອກະສານຮ່ວມມືເຫຼົ່ານີ້ ໄດ້ສືບຕໍ່ເສີມຂະຫຍາຍຄຸນຄ່າອັນສຳຄັນຈົນຮອດປັດຈຸບັນ, ຢືນຢັນເຖິງຄວາມຕັດສິນໃຈ ແລະ ຄວາມມຸ່ງໝັ້ນຂອງສອງພັກ ແລະ ສອງລັດ ໃນການປັບປຸງສາຍພົວພັນພິເສດ ຫວຽດນາມ – ລາວ ໃຫ້ເຂົ້າສູ່ລວງເລິກແລະ ບັນລຸບັນດາຂີດໝາຍປະຫວັດສາດໃໝ່.

ເມື່ອກ້າວເຂົ້າສູ່ໄລຍະສັນຕິພາບ ແລະ ການພັດທະນາ, ສາຍພົວພັນ ຫວຽດນາມ – ລາວ ໄດ້ສືບຕໍ່ຂະຫຍາຍຕົວ ແລະ ກ້າວເຂົ້າສູ່ລວງເລິກໃນຫຼາຍຂົງເຂດ ແລະ ໄດ້ຮັບບົດບາດສຳຄັນໃນຍຸດທະສາດການພັດທະນາຂອງແຕ່ລະປະເທດ. ໃນຂົງເຂດການຕ່າງປະເທດ, ສອງປະເທດ ໄດ້ຮັກສາການຢ້ຽມຢາມ ແລະ ການຕິດຕໍ່ລະດັບສູງເປັນປົກກະຕິ, ພ້ອມທັງກອງປະຊຸມ ແລະ ກົນໄກການແລກປ່ຽນລະຫວ່າງການນໍາ ພັກ, ລັດ, ສະພາແຫ່ງຊາດ ແລະ ລັດຖະບານ. ຄວາມໄວ້ເນື້ອເຊື່ອໃຈທາງການເມືອງໄດ້ຮັບການກໍ່ສ້າງ ແລະ ເສີມຂະຫຍາຍຢ່າງແຂງແຮງຕໍ່ເນື່ອງ, ອັນໄດ້ກາຍເປັນເງື່ອນໄຂອຳນວຍຄວາມສະດວກໃຫ້ແກ່ການດຳເນີນໂຄງການຮ່ວມມືໃນທຸກຂົງເຂດ.

ໃນຂົງເຂດການປ້ອງກັນປະເທດ – ປ້ອງກັນຄວາມສະຫງົບ, ຫວຽດນາມ ແລະ ລາວ ໄດ້ປະສານງານກັນຢ່າງໃກ້ຊິດ ໃນການປົກປ້ອງແນວຊາຍແດນ, ຮັກສາຄວາມປອດໄພ ແລະ ຄວາມເປັນລະບຽບຮຽບຮ້ອຍ, ພ້ອມທັງຮ່ວມມືຕ້ານການກໍ່ອາຊະຍາກຳຂ້າມຊາດດ້ວຍທຸກຮູບແບບ. ບັນດາກົນໄກການຮ່ວມມືສອງຝ່າຍ ໄດ້ຖືກດຳເນີນຢ່າງມີປະສິດທິຜົນ, ປະກອບສ່ວນສຳຄັນໃນການຮັບປະກັນຄວາມໝັ້ນຄົງທາງການເມືອງ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງສອງປະເທດ.

ການຮ່ວມມືທາງເສດຖະກິດ ລະຫວ່າງ ຫວຽດນາມ ແລະ ລາວ ໄດ້ບັນລຸບາດກ້າວພັດທະນາຫຼາຍສົມຄວນ ໃນຕະຫຼອດກວ່າ ສອງທົດສະວັດທີ່ຜ່ານມາ. ຫວຽດນາມ ແມ່ນໜຶ່ງໃນສາມປະເທດນັກລົງທຶນທີ່ໃຫຍ່ທີ່ສຸດ ໃນ ສປປ ລາວ, ມີໂຄງການລົງທຶນຈຳນວນຫຼາຍໃນຂົງເຂດພະລັງງານ, ກະສິກຳ, ການຂຸດຄົ້ນແຮ່ທາດ, ການເງິນ ແລະ ຂົງເຂດອື່ນໆ. ບັນດາໂຄງການລົງທຶນຂອງຫວຽດນາມ ໄດ້ປະກອບສ່ວນສຳຄັນໃນການສົ່ງເສີມການເຕີບໂຕທາງເສດຖະກິດ ແລະ ແຫຼ່ງລາຍຮັບງົບປະມານຂອງລາວ, ພ້ອມທັງສ້າງເງື່ອນໄຂໃຫ້ວິສາຫະກິດຂອງສອງປະເທດ ມີການເຊື່ອມໂຍງກັນຢ່າງກວ້າງຂວາງ ແລະ ເລິກເຊິ່ງຍິ່ງຂຶ້ນ.

ໃນຊຸມປີທີ່ຜ່ານມາ, ສອງປະເທດ ໄດ້ສືບຕໍ່ໃຫ້ຄວາມສຳຄັນ ແລະ ຖືການເຊື່ອມໂຍງໂຄງລ່າງພື້ນຖານ ເປັນຈຸດເດັ່ນໃນການຮ່ວມມືສອງຝ່າຍ, ພ້ອມກັນຜັກດັນຢ່າງແຂງແຮງບັນດາໂຄງການຄົມມະນາຄົມທີ່ສຳຄັນ, ໃນນັ້ນ ມີທາງບົກ, ການຮ່ວມມືທາງທະເລ ແລະ ພະລັງງານ, ໄດ້ເປີດພື້ນທີ່ການພັດທະນາໃໝ່. ການທີ່ຫວຽດນາມ ສ້າງເງື່ອນໄຂອຳນວຍຄວາມສະດວກໃຫ້ແກ່ລາວ ໃນການໃຊ້ງານ ທ່າເຮືອ ຫວຸງອາງ ຊຶ່ງມີຄວາມໝາຍພິເສດຢ່າງຍິ່ງ, ຊ່ວຍໃຫ້ ລາວ ຈາກປະເທດທີ່ບໍ່ມີທາງອອກສູ່ຕິດທະເລ ກາຍເປັນປະເທດເຊື່ອມຕໍ່ ສາມາດຂະຫຍາຍການຄ້າຂາຍກັບນານາຊາດ ແລະ ຊຸກຍູ້ເປົ້າໝາຍໃນການກ້າວເຂົ້າສູ່ການເປັນສູນກາງການເຊື່ອມຕໍ່ໃນພາກພື້ນ.

ຄຽງຄູ່ກັນນັ້ນ, ຂົງເຂດການສຶກສາ – ບໍາລຸງສ້າງ ໄດ້ສືບຕໍ່ເປັນຂົງເຂດທີ່ໄດ້ຮັບການໃຫ້ຄວາມສຳຄັນອັນດັບຕົ້ນ. ແຕ່ລະປີ, ຫວຽດນາມ ໄດ້ຈັດສັນທຶນການສຶກສານັບພັນທຶນໃຫ້ແກ່ນັກສຶກສາ ແລະ ບຸກຄະລາກອນຂອງລາວ, ສະໜັບສະໜູນບໍາລຸງສ້າງແຫຼ່ງຊັບພະຍາກອນມະນຸດທີ່ມີຄຸນນະພາບສູງໃຫ້ແກ່ລາວ. ບັນດາພະນັກງານການນຳ - ຄຸ້ມຄອງຂອງລາວ ຈຳນວນຫຼາຍ ເຄີຍໄດ້ຮໍ່າຮຽນຢູ່ຫວຽດນາມ ແລະ ໄດ້ກາຍເປັນຂົວຕໍ່ສຳຄັນໃນສາຍພົວພັນຂອງສອງປະເທດ.

ພ້ອມກັນນັ້ນ, ການແລກປ່ຽນວັດທະນະທຳ, ກິລາ ແລະ ການທ່ອງທ່ຽວ ໄດ້ຖືກເສີມຂະຫຍາຍຢ່າງແຂງແຮງຕໍ່ເນື່ອງ, ໄດ້ປະກອບສ່ວນສຳຄັນໃນການຊຸກຍູ້ຄວາມເຂົ້າໃຈຊຶ່ງກັນ ແລະ ກັນ, ໂດຍສະເພາະ ໃນຄົນຮຸ້ນໃໝ່ຊາວໜຸ່ມ. ບັນດາການເຄື່ອນໄຫວເຫຼົ່ານີ້ ໄດ້ຊ່ວຍໃຫ້ເກີດການແຜ່ຂະຫຍາຍຄວາມໝາຍ ແລະ ຄຸນຄ່າຂອງສາຍພໄວພັນພິເສດ, ພ້ອມທັງເສີມສ້າງຄວາມຮັບຮູ້ ແລະ ຄວາມຮັບຜິດຊອບລວມ ໃນການປົກປັກຮັກສາ ແລະ ພັດທະນາສາຍພົວພັນ ຫວຽດນາມ – ລາວ ໃນສະພາບການໃໝ່.

ສາຍພົວພັນ ຫວຽດນາມ – ລາວ ແມ່ນຜົນງານແຫ່ງຂະບວນວິວັດສູ້ຊົນອັນຍາວນານ, ໄດ້ຮັບການກໍ່ສ້າງດ້ວຍຄວາມໄວ້ເນື້ອເຊື່ອໃຈ, ຄວາມຈິງໃຈ ແລະ ຜົນປະໂຫຍດລວມຂອງສອງຊາດ. ໃນສະພາບການຂອງໂລກ ແລະ ພາກພື້ນ ມີການປ່ຽນແປງຫຼາຍຮູບແບບ, ສາຍພົວພັນພິເສດ ຫວຽດນາມ – ລາວ ໄດ້ສືບຕໍ່ຢືນຢັນບົດບາດອັນສຳຄັນ, ເປັນບ່ອນອີງທາງຍຸດທະສາດໃຫ້ແກ່ຄວາມໝັ້ນຄົງ ແລະ ການພັດທະນາຂອງແຕ່ລະປະເທດ, ກ້າວສູ່ການພັດທະນາຍືນຍົງ, ປະກອບສ່ວນຢ່າງຕັ້ງໜ້າໃຫ້ແກ່ສັນຕິພາບ, ຄວາມໝັ້ນຄົງ ແລະ ການຮ່ວມມືໃນພາກພື້ນ.

ໂດຍ: ສີວັນ