ສິງກະໂປ ເພີ່ມເງິນເດືອນຂັ້ນຕ່ຳໃຫ້ແກ່ແຮງງານຕ່າງປະເທດລະດັບວິຊາຊີບ

ຂ່າວຕ່າງປະເທດລາຍງານ ເມື່ອບໍ່ດົນມານີ້, ບໍລິສັດທີ່ຈ້າງແຮງງານຕ່າງປະເທດລະດັບວິຊາຊີບ (Foreign professionals) ໃນສິງກະໂປຕ້ອງຈ່າຍເງິນເດືອນຂັ້ນຕໍ່າສູງຂຶ້ນ ເພື່ອໃຫ້ແຮງງານມີຄຸນສົມບັດກົງກັບຂໍ້ກຳນົດຂໍວີຊາເຮັດວຽກ ຊຶ່ງອາດຈະກະທົບກັບທຸລະກິດທົ່ວໂລກທີ່ມີແຜນສົ່ງແຮງງານຕ່າງປະເທດໄປເຮັດວຽກໃນສູນກາງທາງດ້ານເສດຖະກິດຂອງພາກພື້ນແຫ່ງນີ້.
    ທ່ານ ຕັນ ຊິເລັງ ລັດຖະມົນຕີກະຊວງແຮງງານກ່າວວ່າ: ລັດຖະບານໄດ້ປັບຖານເງິນເດືອນຂັ້ນຕ່ຳສຳລັບການຍື່ນຂໍວີຊາເຮັດວຽກລະດັບວິຊາຊີບ ຂຶ້ນເປັນ 5.600 ໂດລາສິງກະໂປ ຈາກເດີມ5.000 ໂດລາສິງກະໂປຕໍ່ເດືອນ. ສ່ວນພາກການບໍລິການທາງການເງິນ ລັດຖະບານກຳນົດຖານເງິນເດືອນຂັ້ນຕ່ຳສູງກວ່ານັ້ນ ໂດຍຫຼາຍບໍລິສັດຕ້ອງຈ່າຍເງິນເດືອນຂັ້ນຕ່ຳ6.200 ໂດລາສິງກະໂປຕໍ່ເດືອນ ຈາກເດີມ5.500 ໂດລາສິງກະໂປ. ທ່ານ ຕັນ ຊິເລັງກ່າວວ່າ: ການປັບເພີ່ມເງິນເດືອນໃຫ້ກົງກັບຂໍ້ກຳນົດວີຊານັ້ນອ້າງອີງຕາມເກນມາດຕະຖານຄ່າຈ້າງທີ່ກຳນົດໄວ້ ແລະ ໝັ້ນໃຈວ່າຄົນໃນທ້ອງຖິ່ນຈະໄດ້ຮັບຄວາມເທົ່າທຽມ. ສິງກະໂປໄດ້ກຳນົດຖານເງິນເດືອນຂັ້ນຕ່ຳໃຫ້ກັບແຮງງານຕ່າງປະເທດລະດັບວິຊາຊີບມາດົນຫຼາຍປີແລ້ວ ແລະ ກຳນົດກົດເກນເຂັ້ມງວດຫຼາຍຂຶ້ນເພື່ອໃຫ້ໝັ້ນໃຈວ່າ ເກີດການຈ້າງງານຕ່າງປະເທດເທົ່າທຽມ ແລະ ສ້າງຄວາມໝັ້ນໃຈໃຫ້ຄົນໃນທ້ອງຖິ່ນກ່ຽວກັບໂອກາດໃນການຈ້າງງານ ໂດຍຫຼ້າສຸດສິງກະໂປປັບຖານເງິນເດືອນໃຫ້ແກ່ແຮງງານຕ່າງປະເທດກຸ່ມດັ່ງກ່າວຄື: ເດືອນກັນຍາ 2022 ຈາກ 4.000 ໂດລາສິງກະໂປ ເປັນ 5.000 ໂດລາສິງກະໂປ.
    ທັງນີ້, ສິງກະໂປ ເປັນປະເທດທີ່ອາໄສແຮງງານຕ່າງປະເທດຢ່າງຫຼວງຫຼາຍ ຕາມຂໍ້ມູນຂອງກະຊວງແຮງງານລະບຸວ່າ: ໃນເດືອນມິຖຸນາ 2023 ມີແຮງງານຕ່າງປະເທດ 1,48 ລ້ານຄົນ ຊຶ່ງ 197.300 ຄົນເປັນແຮງງານຕ່າງປະເທດວິຊາຊີບ.