ສເກົາຫຼີ ສົ່ງເສີມ ຄວາມປອດໄພການບິນຂອງ ສປປ ລາວ ເປັນຄັ້ງທີ2

ພິທີເປີດການຝຶກອົບຮົມດ້ານຄວາມປອດໄພການບິນ ແລະ ແຜນແມ່ບົດສະໜາມບິນ ໄດ້ຈັດຂຶ້ນຫວ່າງບໍ່ດົນມານີ້ທີ່ໂຮງແຮມຄຣາວພລາຊາ ນະຄອຫຼວງວຽງຈັນ, ນຳພາການຝຶກອົບຮົມຄັ້ງນີ້ໂດຍ ບໍລິສັດ Dohwa Engineering Co.,Ltd. ແລະ ບໍລິສັດ Korea Airports Corporation ຈາກ ສເກົາຫຼີ; ການຝຶກອົບຮົມຄັ້ງນີ້ແມ່ນຈັດຂຶ້ນພາຍໃຕ້ການຮ່ວມມືລະຫວ່າງ ກົມການບິນພົນລະເຮືອນ, ບັນດາສະໜາມບິນໃນລາວ ແລະ ສະໜາມບິນສາກົນວັດໄຕຊຶ່ງຂຶ້ນກັບກະຊວງໂຍທາທິການ ແລະ ຂົນສົ່ງຂອງລາວ; ແຜນງານດັ່ງກ່າວແນໃສ່ຊຸກຍູ້ໂຄງການຂະຫຍາຍສະໜາມບິນໃນລາວ ແລະ ຮັບປະກັນການປະຕິບັດການດ້ານຄວາມປອດໄພສະໜາມບິນຕາມມາດຕະຖານສາກົນ, ຊຶ່ງການຝຶກອົບຮົມດັ່ງກ່າວໄດ້ຮັບການສະໜັບສະໜູນຈາກ ສ ເກົາຫຼີ ຜ່ານໂຄງການ Global ESG+ ຂອງອົງການສົ່ງເສີມການຄ້າ-ການລົງທຶນ ສເກົາຫຼີ (KOTRA) ແລະ ຈັດຝຶກອົບຮົມໂດຍອົງການ KOTRA ວຽງຈັນ.
ເປັນກຽດເຂົ້າຮ່ວມງານຝຶກອົບຮົມຄັ້ງນີ້ໂດຍ ທ່ານ ພິລຊອງ ຄິມ (MrPilseongKim) ຜູ້ອຳນວຍການອົງການ KOTRA ວຽງຈັນ, ທ່ານ ບຸນແຕ່ງ ສີມູນ ຮອງຫົວໜ້າກົມການບິນພົນລະເຮືອນ ຕົວແທນຈາກບໍລິສັດ Dohwa Engineering Co.,Ltd ແລະ Korea Airports Corporation ພ້ອມທັງ ບັນດາສຳມະນາກອນ ຜູ້ບັນລະຍາຍ ແລະ ຜູ້ເຂົ້າຮ່ວມຝຶກອົບຮົມ 32 ທ່ານ ຈາກກົມການບິນພົນລະເຮືອນ ບັນດາສະໜາມບິນໃນລາວ ແລະ ຜູ້ທີ່ມີສ່ວນກ່ຽວຂ້ອງໃນບັນດາສະໜາມບິນຕ່າງໆ; ແຜນງານຝຶກອົບຮົມຄວາມປອດໄພການບິນ ແລະ ຄວາມປອດໄພທາງອາກາດ, ໄດ້ລິເລີ່ມໃນປີ 2022 ແລະ ໄດ້ດຳເນີນຕໍ່ໃນປີ 2023 ໂດຍສຸມໃສ່ແຜນແມ່ບົດຄວາມປອດໄພດ້ານການບິນ ແລະ ແຜນແມ່ບົດຢູ່ສະໜາມບິນ; ການຝຶກອົບຮົມຖືກແບ່ງເປັນ ສອງຊ່ວງ ຊຶ່ງກວມເອົາຫຼາຍຫົວຂໍ້ທີ່ສຳຄັນ ຊຶ່ງລວມທັງການປຶກສາຫາລືຢ່າງເລິກເຊິ່ງກ່ຽວກັບລະບຽບການຂອງ ສເກົາຫຼີ ທີ່ກ່ຽວຂ້ອງກັບລະບົບການປະຕິບັດງານດ້ານການບິນ ແລະ ການຄຸ້ມຄອງຄວາມປອດໄພ; ໂຄງການດັ່ງກ່າວໄດ້ພິຈາລະນາເຖິງເນື້ອໃນສຳຄັນຂອງການວາງແຜນແມ່ບົດສະໜາມບິນ, ເນັ້ນໜັກເຖິງການພິຈາລະນາການນຳໃຊ້ທີ່ດິນຢູ່ເຂດອ້ອມຂ້າງ, ການປະເມີນສະພາບແວດລ້ອມແລະການກໍ່ສ້າງສິ່ງຈຳເປັນໃນສະໜາມບິນ ແລະ ຍັງລວມເຖິງມາດຕະຖານການອອກແບບ ແລະ ການຈັດແບ່ງປະເພດ.
ທ່ານ ບຸນແຕ່ງ ສີມູນກ່າວວ່າ: ໂຄງການຝຶກອົບຮົມຂອງ ສ.ເກົາຫຼີ ໃຫ້ກັບ ບັນດາເຈົ້າໜ້າທີ່ ແລະ ພະນັກງານການບິນໃນລາວ ໄດ້ເປີດໂອກາດ ໃຫ້ຄົ້ນພົບ ໄພອັນຕະລາຍທີ່ເຊື່ອງຊ້ອນໃນການປະຕິບັດວຽກງານປະຈຳວັນ ແລະ ສິ່ງອໍານວຍຄວາມສະດວກຕ່າງໆ.
ທ່ານຍັງກ່າວຕື່ມວ່າ: ການຝຶກອົບຮົມຄັ້ງນີ້ ຈະຍົກລະດັບຄວາມສາມາດໃນການດຳເນີນງານ ລວມທັງ ມາດຕະການຄວາມປອດໄພ ຄວາມຍືນຍົງດ້ານສິ່ງແວດລ້ອມ ແລະ ການວາງແຜນໄລຍະຍາວ ຊຶ່ງຈະເຮັດໃຫ້ສະໜາມບິນດຳເນີງານສອດຄ່ອງກັບມາດຕະຖານສາກົນ ປະກອບສ່ວນເຂົ້າໃນການພັດທະນາ ແລະ ການຂະຫຍາຍຕົວຂອງການບິນໃນລາວໂດຍລວມ; ທ່ານ ພິລ ຊອງຄິມ ກ່າວຕື່ມວ່າ: ແຜນງານຝຶກອົບຮົມຄວາມປອດໄພທາງການບິນ ແລະ ຄວາມປອດໄພທາງອາກາດ ໄດ້ຮັບການຈັດຕັ້ງປະຕິບັດເປັນຄັ້ງທີສອງໃນປີທີ່ຜ່ານມາ.ປັດຈຸບັນ, ຫ້ອງການຂອງພວກເຮົາພວມກະກຽມໂຄງການແລກປ່ຽນຄວາມຮູ້ໃຫ້ແກ່ກົມການບິນພົນລະເຮືອນ ໂດຍສຸມໃສ່ການການນຳໃຊ້ບັນດານະວັດຕະກຳຕ່າງໆ ຢູ່ສະໜາມບິນຫຼວງພະບາງ.
ໂຄງການແບ່ງປັນຄວາມຮູ້ທີ່ກ່າວມາ ແມ່ນຢູ່ໃນຂັ້ນຕອນການປະມູນໃນສເກົາຫຼີ ແລະ ຄາດວ່າໂຄງການດັ່ງກ່າວຈະດໍາເນີນການໃນເດືອນກຸມພາປີໜ້າ ໂດຍໃຊ້ເວລາປະມານສອງປີ; ໂຄງການ KOTRA Global ESG+ ແມ່ນໂຄງການທີ່ແນໃສ່ ການນຳໃຊ້ຄວາມສາມາດຂອງບັນດາບໍລິສັດຂອງສເກົາຫຼີ ເພື່ອຜົນປະໂຫຍດຂອງບັນດາຂະແໜງການຕ່າງໆໃນຕ່າງປະເທດ ພ້ອມທັງເພີ່ມທະວີການພົວພັນຍຸດທະສາດກັບບັນດາຄູ່ຮ່ວມມືພາຍໃນປະເທດ; ການຝຶກອົບຮົມຄັ້ງນີ້ ແມ່ນໂຄງການຄັ້ງທີ4ໃນປີ 2023 ທີ່ຈັດຂຶ້ນພາຍໃຕ້ໂຄງການ ຂອງ KOTRA Global ESG+ຊຶ່ງ ສປປ ລາວ ຈະໄດ້ຮັບບຸລິມະສິດດ້ານຄວາມປອດໄພດ້ານການບິນຕື່ມອີກ ແລະ ສາມາດຍົກລະດັບຄວາມອາດສາມາດໃນຂົງເຂດຄວາມປອດໄພດ້ານການບິນຕື່ມອີກໃນອະນາຄົດ.
(ຂ່າວ-ພາບ: ແສງຈັນ)