 |
ໃນພິທີ, ສະຫາຍ ພົນໂທ ແສງນວນ ໄຊຍະລາດ ກ່າວວ່າ: ກອງປະຊຸມຄັ້ງນີ້ ຈັດຂຶ້ນເພື່ອແນໃສ່ສ້າງຄວາມຮັບຮູ້-ເຂົ້າໃຈຢ່າງເລິກເຊິ່ງຕໍ່ເນື້ອໃນຈິດໃຈສຳຄັນຂອງແນວທາງການເມືອງ ແລະ ແນວທາງການຈັດຕັ້ງທີ່ໄດ້ກຳນົດອອກໃນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກຢ່າງເປັນລະບົບ; ເຊື່ອມຊຶມກຳແໜ້ນເນື້ອໃນທີ່ຈະໄດ້ເອົາມານຳພາ-ຊີ້ນຳ ແລະ ປະຕິບັດຕົວຈິງຢູ່ ສນຫລ; ເພື່ອໃຫ້ບັນດາສະຫາຍຮູ້ຫັນເອົາເນື້ອໃນຈິດໃຈມະຕິດັ່ງກ່າວ ມາສ້າງເປັນແຜນດຳເນີນງານ, ແຜນປະຕິບັດງານລະອຽດ, ກຳນົດໜ້າວຽກ, ແຜນຄົນ, ແຜນເງິນ, ຄວາມຮັບຜິດຊອບ, ກຳນົດເວລາອັນຊັດເຈນ, ແທດຕົວຈິງກັບໜ້າທີ່ການເມືອງຂອງສະຫະພັນນັກຮົບເກົ່າ ແລະ ສາມາດຈັດຕັ້ງປະຕິບັດໃຫ້ມີຜົນສຳເລັດເປັນຮູບປະທຳ; ເພື່ອໃຫ້ບັນດາສະຫາຍມີກົນໄກ, ລະບອບແບບ ແຜນໃນການຜັນຂະຫຍາຍ, ການຕິດຕາມ, ກວດກາ, ການຊຸກຍູ້, ຈັດຕັ້ງປະຕິບັດທີ່ຖືກຕ້ອງແທດເຖິງ ແລະ ມີວິທະຍາສາດ; ເພື່ອໃຫ້ມີຄວາມເປັນເອກະພາບສູງພາຍໃນ, ມີຄວາມຕັດສິນໃຈອັນເດັດດ່ຽວ, ກ້າຫານ, ປະດິດສ້າງເພື່ອຜັນຂະຫຍາຍ ແລະ ຈັດຕັ້ງປະຕິບັດມະຕິດັ່ງກ່າວໃຫ້ເຂົ້າສູ່ລວງເລິກ ແລະ ເປັນຮູບປະທຳ. ໃນນີ້, ຜູ້ເຂົ້າຮ່ວມຍັງຈະໄດ້ກວດກາຄືນບັນດາທິດທາງ, ຄາດໝາຍ ແລະ ໜ້າວຽກອັນລະອຽດຂອງສະຫະພັນນັກຮົບເກົ່າ ທີ່ເຫັນວ່າອັນໃດສອດຄ່ອງກັບເນື້ອໃນຈິດໃຈມະຕິຂອງພັກແລ້ວ ແມ່ນໃຫ້ຮີບຮ້ອນລົງມືຈັດຕັ້ງປະຕິບັດ; ແຕ່ອັນໃດບໍ່ທັນສອດຄ່ອງ, ຂັດກັບມະຕິຂອງພັກ ແລະ ບໍ່ແມ່ນໜ້າທີ່ການເມືອງຂອງນັກຮົບເກົ່າ ກໍຈຳເປັນຕ້ອງໄດ້ປັບປຸງ, ປ່ຽນແປງ, ແກ້ໄຂໂດຍໄວ ຈຶ່ງຈັດຕັ້ງປະຕິບັດ. ຈາກນັ້ນ, ສະຫາຍ ພົນໂທ ວົງຄໍາ ພົມມະກອນ ຮອງເລຂາຄະນະບໍລິຫານງານພັກ ຮອງປະທານ ສນຫລ ໄດ້ໃຫ້ກຽດເຜີຍແຜ່, ເຊື່ອມຊຶມເນື້ອໃນຈິດໃຈເອກະສານສຳຄັນຂອງໂຄງການ ການເມືອງສະບັບທີ 3 ຂອງພັກ; ຮ່າງລາຍງານການເມືອງ; ມະຕິກອງປະຊຸມໃຫຍ່ ຄັ້ງທີ XII ຂອງພັກ. ໃນນັ້ນ, ຍັງໄດ້ຮັບຟັງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X (2026-2030).
 |
ການເຊື່ອມຊຶມເອກະສານຄັ້ງນີ້, ເພື່ອເປັນການສືບຕໍ່ບຸກທະລຸດ້ານຈິນຕະນາການ, ຍົກສູງຫຼັກໝັ້ນການ ເມືອງ, ຄວາມເດັດດ່ຽວໜຽວແໜ້ນ ພ້ອມທັງເປັນການຕ້ານ ແລະ ແກ້ໄຂທັດສະນະຜິດເຂວຕ່າງໆ, ລັດທິຄຳພີກົນຈັກ, ຮັກສາຄວາມສາມັກຄີພາຍໃນພັກໃຫ້ບັນດາຄະນະບໍລິຫານງານພັກ, ຄະນະປະຈຳພັກ, ຄະນະໜ່ວຍພັກ, ສະມາຊິກພັກຢູ່ ສນຫລ ໄດ້ກຳແໜ້ນແນວທາງຂອງພັກ; ແຜນພັດທະນາເສດຖະກິດ-ສັງຄົມຂອງລັດ ເພື່ອສືບຕໍ່ໄປຄົ້ນຄວ້າ, ຜັນຂະຫຍາຍເຂົ້າສູ່ວຽກງານຕົວຈິງຂອງຕົນໃຫ້ເປັນຮູບປະທຳຕໍ່ໄປ.
ຂ່າວ-ພາບ: ວັນເພັງ
ຄໍາເຫັນ