ສອງສະພາແຫ່ງຊາດລາວ - ຫວຽດນາມ ສືບຕໍ່ການຮ່ວມມືຮອບດ້ານ

ໂອກາດດັ່ງກ່າວ ສະຫາຍ ໄຊສົມພອນ ພົມວິຫານ ສະແດງຄວາມຕ້ອນຮັບ ແລະ ພົບປະກັບ ສະຫາຍ ເຈິນ ແທັງ ເໝິ້ນ ພ້ອມດ້ວຍຄະນະ, ສະແດງຄວາມຊົມເຊີຍຢ່າງສຸດໃຈ ຕໍ່ຜົນສຳເລັດຂອງກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIV ຂອງພັກກອມມູນິດຫວຽດນາມ, ພິເສດສະແດງຄວາມຊົມເຊີຍຢ່າງຈິງໃຈ ຕໍ່ສະຫາຍ ເຈິ່ນ ແທັງ ເໝິ້ນ ທີ່ໄດ້ຮັບເລືອກຕັ້ງເປັນກໍາມະການກົມການເມືອງສູນກາງພັກກອມມູນິດ ຫວຽດນາມ ອີກສະໄໝໜຶ່ງ. ໂອກາດດັ່ງກ່າວ, ທັງສອງໄດ້ຜັດປ່ຽນກັນລາຍງານສະພາບການທີ່ພົ້ນເດັ່ນພາຍໃນປະເທດ ແລະ ວຽກງານຕ່າງໆ ໃນໄລຍະທີ່ຜ່ານມາ ໃຫ້ກັນຊາບ ໂດຍຫຍໍ້.

 ສະຫາຍ ໄຊສົມພອນ ພົມວິຫານ ກ່າວວ່າ: ການພົວພັນຮ່ວມມື ລະຫວ່າງ ສະພາແຫ່ງຊາດລາວ ແລະ ສະພາແຫ່ງຊາດຫວຽດນາມ ໄດ້ຮັບການເສີມຂະຫຍາຍທາງກວ້າງ ແລະ ທາງເລິກສະເໝີມາ, ສອງຝ່າຍ ໄດ້ມີການພົວພັນຮ່ວມມື, ສະໜັບສະໜູນຊ່ວຍເຫຼືອ ຊຶ່ງກັນ ແລະ ກັນ ເປັນຢ່າງດີ, ໄດ້ມີການແລກປ່ຽນການຢ້ຽມຢາມ ຂອງການນໍາຂັ້ນສູງໃນລະດັບຂັ້ນປະທານ, ຮອງປະທານສະພາແຫ່ງຊາດ, ຂັ້ນປະທານກໍາມາທິການ, ສະມາຊິກສະພາແຫ່ງຊາດ ແລະ ຂັ້ນວິຊາການນໍາກັນ. ອັນພົ້ນເດັ່ນໃນປີ 2025 ສອງສະພາແຫ່ງຊາດລາວ-ຫວຽດນາມ ໄດ້ຮ່ວມກັນຂຽນປຶ້ມສໍາເລັດ ແລະ ໄດ້ຈັດພິທີເປີດປຶ້ມ “50 ປີແຫ່ງການພົວພັນ ລະຫວ່າງ ສະພາແຫ່ງຊາດລາວ ແລະ ສະພາແຫ່ງຊາດ ຫວຽດນາມ - ການຮ່ວມມືຮອບດ້ານ ແລະ ການພັດທະນາ (1975-2025)” ໃນເດືອນທັນວາ 2025 ຜ່ານມາ. 

ໂອກາດນີ້ ສະຫາຍ ໄຊສົມພອນ ໄດ້ສະແດງຄວາມຮູ້ບຸນຄຸນ ແລະ ຂອບໃຈເປັນຢ່າງສູງ ຕໍ່ສະພາແຫ່ງຊາດຫວຽດນາມ ທີ່ໄດ້ໃຫ້ການສະໜັບສະໜູນອັນລໍ້າຄ່າ ໂດຍສະເພາະການຊ່ວຍເຫຼືອດ້ານການບໍາລຸງຮັກສາຕຶກສະພາແຫ່ງຊາດທີ່ເປັນຕົວແທນແຫ່ງສາຍພົວພັນທີ່ມີລັກສະນະພິເສດ ຂອງສອງປະເທດລາວ-ຫວຽດນາມ; ພ້ອມນັ້ນ, ຍັງໄດ້ສົ່ງຊ່ຽວຊານມາໃຫ້ບົດຮຽນທາງດ້ານກົດໝາຍ ແລະ ຊ່ວຍດ້ານວັດຖຸອຸປະກອນເຄື່ອງໃຊ້ຕ່າງໆ ໃຫ້ແກ່ສະພາແຫ່ງຊາດລາວ.

ສປປ ລາວ ສືບຕໍ່ຮັກສາໄດ້ສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ຄວາມເປັນລະບຽບຮຽບຮ້ອຍ; ເສດຖະກິດ ມີການຂະຫຍາຍຕົວໃນທ່ວງທ່າທີ່ດີຂຶ້ນຢ່າງຕໍ່ເນື່ອງ (ໃນປີ 2025 ສາມາດບັນລຸໄດ້ ໃນລະດັບ 4,8%).

ເພື່ອສືບຕໍ່ເສີມຂະຫຍາຍສາຍພົວພັນຮ່ວມມືແບບພິເສດ ລະຫວ່າງ ສອງສະພາແຫ່ງຊາດພວກເຮົາ, ສະເໜີທິດທາງການພົວພັນຮ່ວມມືໃນຕໍ່ໜ້າຄື: 

ສືບຕໍ່ປັບປຸງເນື້ອໃນຂອງບົດບັນທຶກ ວ່າດ້ວຍການຮ່ວມມື (MOU) ລະຫວ່າງ ສອງສະພາແຫ່ງຊາດ ລາວ-ຫວຽດນາມ ແລະ ສອງຫ້ອງວ່າການສະພາແຫ່ງຊາດ ລາວ-ຫວຽດນາມ ສະບັບປີ 2022 ທີ່ຈະໝົດອາຍຸໃນປີ 2026 ໃຫ້ມີຄວາມສອດຄ່ອງກັບສະພາບການຕົວຈິງແຕ່ລະໄລຍະ;

ສືບຕໍ່ຊຸກຍູ້ການຈັດຕັ້ງປະຕິບັດບັນດາສັນຍາ, ສົນທິສັນຍາ ແລະ ຂໍ້ຕົກລົງ ລະຫວ່າງສອງລັດຖະບານ ກໍຄືຜົນຂອງກອງປະຊຸມ ຂອງການນໍາຂັ້ນສູງ ຂອງສອງພັກ, ສອງລັດ ແລະ ບັນດາໂຄງການຮ່ວມມືຂອງສອງປະເທດ ໂດຍສະເພາະການຮ່ວມມືທາງດ້ານເສດຖະກິດ, ການຄ້າ ແລະ ການລົງທຶນ ລະຫວ່າງ ສອງປະເທດ ໃຫ້ຂະຫຍາຍຕົວສູງຂຶ້ນ ສົມຄູ່ກັບການພົວພັນຮ່ວມມືດ້ານການເມືອງ ໂດຍສະເພາະການຈັດຕັ້ງຜັນຂະຫຍາຍຂໍ້ຕົກລົງຂອງການນໍາສູງສຸດ ໃນໂອກາດທີ່ ສະຫາຍ ທອງລຸນ ສີສຸລິດ ຢ້ຽມຢາມລັດຖະກິດ ທີ່ ສສ ຫວຽດນາມ ໃນທ້າຍເດືອນມັງກອນ ທີ່ຜ່ານມາ;

ສະເໜີສະພາແຫ່ງຊາດຫວຽດນາມ ສືບຕໍ່ໃຫ້ບົດຮຽນກ່ຽວກັບການສ້າງນິຕິກໍາຕ່າງໆ ທີ່ຕິດພັນກັບການສ້າງ ແລະ ປັບປຸງກົດໝາຍ ໃຫ້ສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ແລະ ບັນດາຂະແໜງການທີ່ກ່ຽວຂ້ອງ ເພື່ອສ້າງລັດໃຫ້ຄຸ້ມຄອງດ້ວຍກົດໝາຍ;

ຂໍຂອບໃຈການບິແບ່ງທຶນຮອນອັນໃຫຍ່ຫຼວງ ເພື່ອກໍ່ສ້າງຫໍສະພາແຫ່ງຊາດລາວຫຼັງນີ້ ທີ່ເປັນອາຄານທີ່ທັນສະໄໝ, ນຳໃຊ້ໄດ້ຮັບຜົນປະໂຫຍດທີ່ສຸດ. ຜ່ານການນຳໃຊ້ຕົວຈິງເຫັນວ່າ ຍັງມີຄວາມຈຳເປັນ ແລະ ຕ້ອງການການບໍາລຸງຮັກສາທີ່ເໝາະສົມ, ໂດຍສະເພາະການຮັກສາລະບົບທີ່ທັນສະໄໝ, ການສ້າງບຸກຄະລາກອນທີ່ເປັນມືອາຊີບເພື່ອເຮັດຫຼ້ອນໜ້າທີ່ ໃນການບົວລະບັດຮັກສາລະບົບຕ່າງໆໃນອາຄານ.

ສືບຕໍ່ເຜີຍແຜ່ເນື້ອໃນປຶ້ມ “50 ປີ ແຫ່ງສາຍພົວພັນ ລະຫວ່າງ ສະພາແຫ່ງຊາດລາວ ແລະ ສະພາແຫ່ງຊາດຫວຽດນາມ-ການຮ່ວມມືຮອບດ້ານ ແລະ ພັດທະນາ” ໃຫ້ກວ້າງຂວາງ ເພື່ອໃຫ້ຄົນຮຸ່ນໜຸ່ມໄດ້ສຶກສາ, ສືບທອດ ແລະ ປົກປັກຮັກສາສາຍພົວພັນແບບພິເສດລາວ-ຫວຽດນາມ ມີໜຶ່ງດຽວໃນໂລກນີ້ ໃຫ້ໝັ້ນຄົງຕະຫຼອດໄປ;

ສືບຕໍ່ສະໜັບສະໜູນ ແລະ ຮ່ວມມືກັນ ໃນການເຄື່ອນໄຫວ ໃນອົງການລັດຖະສະພາພາກພື້ນ ແລະ ສາກົນ.

ໃນໂອກາດທີ່ມີຄວາມໝາຍສໍາຄັນນີ້, ສະຫາຍ ໄຊສົມພອນ ພົມວິຫານ ໄດ້ສະແດງຄວາມຂອບໃຈ ແລະ ຮູ້ບຸນຄຸນເປັນຢ່າງສູງຕໍ່ພັກ-ລັດ ແລະ ປະຊາຊົນຫວຽດນາມອ້າຍນ້ອງ ທີ່ໄດ້ໃຫ້ການຊ່ວຍເຫຼືອອັນໃຫຍ່ຫຼວງລໍ້າຄ່າ, ທັນການ ແລະ ມີປະສິດທິຜົນແກ່ພັກ, ລັດ ແລະ ປະຊາຊົນລາວບັນດາເຜົ່າ ໃນໄລຍະຕໍ່ສູ້ເພື່ອຍາດເອົາເອກະລາດແຫ່ງຊາດ ກໍຄືໃນໄລຍະປົກປັກຮັກສາ ແລະ ສ້າງສາປະເທດໃນປັດຈຸບັນ; ເນື່ອງໃນໂອກາດປີໃໝ່ປະຈຳຊາດຫວຽດນາມ (2026), ສະຫາຍ ໄຊສົມພອນ ພົມວິຫານ ຍັງໄດ້ອວຍພອນໄຊອັນປະເສີດມາຍັງ ສະຫາຍ ເຈີນ ແທັງ ເໝິ້ນ ຈົ່ງມີສຸຂະພາບແຂງແຮງ, ມີຄວາມຜາສຸກ ແລະ ປະສົບຜົນສຳເລັດໃໝ່ໃຫຍ່ຫຼວງກວ່າເກົ່າໃນໜ້າທີ່ອັນມີກຽດສະຫງ່າຂອງຕົນ; ອວຍພອນໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດ ລະຫວ່າງ ລາວ-ຫວຽດນາມ ຈົ່ງໝັ້ນຄົງຂະໜົງແກ່ນຕະຫຼອດກາລະນານ.  

(ຂ່າວ: ແສງຈັນ)