 |
ໃນພິທີ, ທ່ານ ນາງ ສິລິພອນ ສຸພັັັັັນທອງ ໄດ້ກ່າວຕ້ອນຮັບບັນດາຜູ້ແທນມາຮ່ວມກອງປະຊຸມເຈົ້າໜ້າທີ່ອາວຸໂສປ່າໄມ້ອາຊຽນ (ASOF) ຄັ້ງທີ 28 ທີ່ໄດ້ຈັດຂຶ້ນທີ່ ນະຄອນ-ຫຼວງພະບາງ ເມືອງມໍລະດົກແຫ່ງນີ້. ແຂວງຫຼວງພະບາງຮູ້ສຶກພາກພູມໃຈຢ່າງຍິ່ງ ທີ່ໄດ້ເປັນເຈົ້າພາບຕ້ອນຮັບການປະຊຸມລະດັບພາກພື້ນອາຊຽນທີ່ສຳຄັນນີ້. ກອງປະຊຸມຄັ້ງນີ້ສະທ້ອນໃຫ້ເຫັນເຖິງຄວາມເຂົ້າໃຈຮ່ວມກັນຂອງພວກເຮົາທີ່ເຫັນໄດ້ວ່າປ່າໄມ້ບໍ່ພຽງແຕ່ເປັນຊັບພະຍາກອນທຳມະຊາດເທົ່ານັ້ນຍັງເປັນສ່ວນສຳຄັນ ແລະ ຕິດພັນກັບການດຳລົງຊີ ວິດ, ວັດທະນະທຳ, ແລະ ການຮັບມືກັບວິກິດລະດັບໂລກເຊັ່ນ: ການປ່ຽນແປງຂອງດິນຟ້າອາກາດ ແລະ ການສູນເສຍຄວາມຫຼາກຫຼາຍທາງຊີວະນາໆພັນ.
ຈາກນັ້ນ, ທ່ານ ກິແກ້ວ ສິງນາວົງ ໄດ້ກ່າວເປີດກອງປະຊຸມວ່າ: ກອງປະຊຸມ ASOF ຄັ້ງທີ 28ເປັນການເພີ່ມຄວາມສາມັກຄີຂອງພວກເຮົາໃຫ້ມີຄວາມຮັບຜິດຊອບຕໍ່ ປ່າໄມ້ ແລະ ຊັບພະຍາກອນປ່າ ໄມ້ ໃນບັນດາປະເທດສະມາຊິກອາຊຽນ ແລະ ປະເທດສັງເກດການຂອງພວກເຮົາ ໃຫ້ມີຄວາມຍືນຍົງ ແລະ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມໃຫ້ແກ່ບັນດາປະເທດຊາດຂອງພວກເຮົາ ໃນອະນາຄົດ. ໃນນີ້, ຈະເປັນການເພີ່ມພູນຄູນສ້າງ ແລະ ເສີມຂະຫຍາຍການຮ່ວມມື ດ້ານການຄຸ້ມຄອງ, ປົກປັກຮັກສາ ແລະ ພັດທະນາຂະແໜງການປ່າໄມ້ຂອງພວກເຮົາໃຫ້ໜັກແໜ້ນ ແລະ ໝັ້ນຄົງຂຶ້ນກວ່າເກົ່າ, ໃນນັ້ນ ກໍເປັນກອງປະຊຸມທີ່ຈະຊອກຫາວິທາງໃນການແກ້ໄຂບັນຫາໄພຂົ່ມຂູ່ ຕໍ່ຊັບພະຍາກອນປ່າໄມ້, ຊີວະນາໆພັນ ແລະ ຊອກທຸກວິທີທາງເພື່ອປ້ອງກັນ ສະພາບການປ່ຽນແປງດິນຟ້າອາກາດ ແລະ ໄພພິບັດ ທີ່ອາດຈະເກີດຂຶ້ນ ແລະ ເປັນໄພຂົ່ມຂູ່ຕໍ່ຊີວິດ ແລະ ຊັບສິນຂອງປະຊາຊົນ ໃນພາກພື້ນຂອງພວກເຮົາໃນອະນາຄົດ.
ທ່ານ ສົມຫວັງ ພິມມະວົງ ກ່າວວ່າ: ສປປ ລາວ ມີຄວາມຕັ້ງໃຈຈະສົ່ງເສີມເປົ້າໝາຍຂອງ ASOF ໃຫ້ສອດຄ່ອງກັບວິໄສທັດຮ່ວມກັນຂອງອາຊຽນ ດ້ານການພັດທະນາປ່າໄມ້ທີ່ຍືນຍົງ, ບວກກັບຄວາມອາດສາມາດໃນການຟື້ນຕົວ. ການເປັນປະທານຂອງພວກເຮົາຈະເນັ້ນໃສ່ບັນດາເປົ້າໝາຍຕົ້ນຕໍດັ່ງ ນີ້, ເລັ່ງການຈັດຕັ້ງປະຕິບັດ ການຄຸ້ມຄອງປ່າໄມ້ແບບຍືນຍົງ (SFM) ຜ່ານການຕິດຕາມປະເມີນຜົນ, ການບໍລິຫານປ່າໄມ້ແບບມີສ່ວນຮ່ວມ ແລະ ແຜນງານປ່າໄມ້ຊຸມຊົນ, ສືບຕໍ່ຮ່ວມມືກັບໜ່ວຍງານບັງຄັບໃຊ້ກົດໝາຍ ຈາກ ກຳປູເຈຍ, ສປ ຈີນ, ມາເລເຊຍ, ມຽນມາ, ສິງກະໂປ, ໄທ, ແລະ ສສ ຫວຽດນາມ, ລວມທັງພາຍໃນກຸ່ມເຮັດວຽກອາຊຽນດ້ານ CITES ແລະ ການບັງຄັບໃຊ້ກົດໝາຍສັດປ່າ, ກອງປະຊຸມອາຊຽນດ້ານອາຊະຍາກຳຂ້າມຊາດ (SOMTC) ແລະ ເຄືອຂ່າຍອື່ນໆ ເພື່ອປັບປຸງການຮ່ວມມືລະຫວ່າງໜ່ວຍງານບັງຄັບໃຊ້ກົດໝາຍລວມທັງດ້ານຍຸຕິທຳ, ຕຳຫຼວດ, ແລະ ສຳນັກງານກ່ຽວກັບບັນຫາການຄ້າສັດ ປ່າແບບຜິດກົດໝາຍ ແລະ ການທ່ອງທ່ຽວ, ສົ່ງເສີມບົດບາດຂອງປ່າໄມ້ໃນການແກ້ໄຂບັນຫາສະພາບອາກາດປ່ຽນແປງ ໂດຍສະເພາະຜ່ານການແກ້ໄຂອີງໃສ່ທຳມະຊາດ (NbS), ການຟື້ນຟູປ່າໄມ້, ແລະ ການເຂົ້າຮ່ວມໃນຕະຫຼາດກາກບອນ, ສົ່ງເສີມປ່າໄມ້ຊຸມຊົນ ແລະ ທາງເລືອກການດຳລົງຊີວິດ ສຳລັບຊຸມຊົນທີ່ນໍາໃຊ້ປະໂຫຍດຈາກປ່າໄມ້ ໂດຍການນຳໃຊ້ບໍລິການລະບົບນິເວດ ເຊັ່ນ: ໄມ້ໄຜ່, ເຄື່ອງປ່າຂອງດົງ, ແລະ ພືດເປັນຢາ, ຈັດຕັ້ງປະຕິບັດແນວທາງ ແລະ ຊຸດເຄື່ອງມືອາຊຽນດ້ານ NbS ແລະ ວິທີການແບບອີງໃສ່ລະບົບນິເວດ, ດັ່ງທີ່ໄດ້ຮັບຮອງໂດຍກຸ່ມເຮັດວຽກອາຊຽນດ້ານປ່າໄມ້ຊຸມຊົນ, ສ້າງຄວາມເຂັ້ມແຂງໃນການຮ່ວມມືກັບຄູ່ສົນທະນາ ແລະ ຄູ່ຮ່ວມພັດທະນາ, ລວມທັງ AFoCO, UN-REDD, EFI, ສສ ຫວຽດນາມ, ສປ ຈີນ, ແລະ ອື່ນໆ, ເພື່ອດຶງດູດການຊ່ວຍເຫຼືອດ້ານວິຊາການ ແລະ ທຶນຮອນ ສຳລັບແຜນງານປ່າໄມ້ພາກພື້ນ, ສົ່ງເສີມການປະສານງານນະໂຍບາຍຂ້າມຂະແໜງ ຜ່ານການຈັດຕັ້ງປະຕິບັດ ເອກະສານອາຊຽນດ້ານການປ່ຽນແປງສະພາບອາກາດ ແລະ ຄວາມປອດໄພດ້ານສະບຽງອາຫານ (AFCC) ແລະ ການສອດຄ່ອງຂອງຂະແໜງການປ່າໄມ້ກັບວິໄສທັດຊຸມຊົນອາຊຽນຫຼັງປີ 2025.
 |
ກອງປະຊຸມເຈົ້າໜ້າທີ່ອາວຸໂສປ່າໄມ້ອາຊຽນ ຄັ້ງທີ 28 ຄັ້ງນີ້: ໄດ້ທົບທວນແຜນການດໍາເນີນງານພາຍໃນຂອງຍຸດທະສາດຄວາມຮ່ວມມື ດ້ານປ່າໄມ້ ອາຊຽນ 2016–2025 ແລະ ວາງແຜນການຮ່ວມມື 2026-2030, ກອງປະຊຸມຍັງໄດ້ຮັບຟັງການລາຍງານຄວາມຄືບໜ້າຂອງປະເທດສະມາຊິກ ກ່ຽວກັບການຄຸ້ມຄອງປ່າໄມ້ແບບຍືນຍົງ (Sustainable Forest Management “SFM”), ການອະນຸມັດເອກະສານສໍາຄັນຄື: ຄູ່ມືການດໍາເນີນການ Foest Low Enforcement, Governance and Trade“FLEGT” ໃນອາຊຽນ, ຂໍ້ແນະນຳ ແລະ ຊຸດເຄື່ອງມືວ່າດ້ວຍ Nature-Based Solutions “NbS” ໃນສາຂາປ່າໄມ້, ແຜນປະຕິບັດການຈັດການລະບົບນິເວດຢ່າງຍືນຍົງ ແລະ ການປຶກສາຫາລືກັບພັນທະມິດພັດທະນາຫຼາຍຝ່າຍ ເຊັ່ນ: FAO, UNEP, AFoCO, CIFOR-ICRAF, WWF, EU-TAF GTEI, ລັດຖະບານ ສປ ຈີນ ແລະ ສະຫະລາຊະອານາຈັກ ອັງກິດ ແລະ ກຳນົດໃຫ້ ປະເທດມາເລເຊຍ ເປັນເຈົ້າພາບ ກອງປະຊຸມ ASOF ຄັ້ງທີ 29 ໃນປີ 2026.
(ຂ່າວ-ພາບ: ສຳນານ)
ຄໍາເຫັນ