 |
ໃນໂອກາດລົງນາມຄັ້ງນີ້, ທ່ານເອກອັກຄະລັດຖະທູດ ໄດ້ຕີລາຄາສູງຕໍ່ການພົວພັນຮ່ວມມື ລະ ຫວ່າງ ສປປ ລາວ ແລະ ອົງການ IAEA ຊຶ່ງໄດ້ຮັບຜົນສໍາເລັດ ແລະ ບາດກ້າວຂະຫຍາຍຕົວ, ພ້ອມທັງສະແດງຄວາມຂອບໃຈຢ່າງສູງຕໍ່ການສະໜັບສະໜູນຊ່ວຍເຫຼືອຂອງອົງການໃນໄລຍະຜ່ານມາ ໂດຍສະ ເພາະແມ່ນການຊ່ວຍເຫຼືອດ້ານເຕັກນິກ ແລະ ການສ້າງຂີດຄວາມສາມາດ, ຄວາມຮູ້ກ່ຽວກັບການນໍາໃຊ້ນິວເຄລຍໃນທາງສັນຕິ. ພ້ອມກັນນີ້, ຍັງສະແດງຄວາມຫວັງວ່າ ອົງການ IAEA ຈະສືບຕໍ່ຊ່ວຍເຫຼືອ ສປປ ລາວ ເພື່ອນໍາໃຊ້ເຕັກໂນໂລຊີທາງດ້ານນິວເຄລຍ ເພື່ອການພັດທະນາແບບຍືນຍົງ.
ໃນໂອກາດກຽວກັນ, ທ່ານ Hua Liu ໄດ້ແຈ້ງໃຫ້ຊາບເຖິງບົດບາດສໍາຄັນຂອງ ອົງການ IAEA ໃນການຮ່ວມມືກັບປະເທດສະມາຊິກ ໃນການສົ່ງເສີມການນໍາໃຊ້ນິວເຄລຍເພື່ອການພັດທະນາ ໂດຍສະ ເພາະແມ່ນການຮ່ວມມືທາງດ້ານເຕັກນິກ. ພ້ອມດຽວກັນ, ກໍເນັ້ນບົດບາດຄວາມເປັນເຈົ້າການຂອງປະເທດສະມາຊິກ ໃນການຈັດຕັ້ງປະຕິບັດ CPF ຊຶ່ງສອດຄ່ອງກັບບຸລິມະສິດ ແລະ ຄວາມຕ້ອງການໃນການພັດທະນາເສດຖະກິດ-ສັງຄົມ ຂອງປະເທດສະມາຊິກ ເປັນຕົ້ນສ້າງຄວາມປອດໄພຈາກລັງສີ, ນໍາໃຊ້ນິວເຄລຍ ເພື່ອທາງກະສິກໍາ, ການແພດ ແລະ ໂພຊະນາການ, ການຄຸ້ມຄອງນໍ້າ ແລະ ສິ່ງແວດລ້ອມ ແລະ ອື່ນໆ. ພ້ອມດຽວກັນ, ທ່ານຍັງສະແດງຄວາມຊົມເຊີຍຕໍ່ຂະແໜງການກ່ຽວຂ້ອງຂອງລາວ ແລະ ໜ່ວຍງານຂອງ ອົງການ IAEA ໄດ້ສໍາເລັດການສ້າງເອກະສານ CPF ສະບັບທີ 3 ແລະ ຢືນຢັນທີ່ຈະສືບຕໍ່ໃຫ້ການຮ່ວມມື ແລະ ສະໜັບສະໜູນ ສປປ ລາວ ໃນການຈັດຕັ້ງປະຕິບັດໃຫ້ບັນລຸຕາມເປົ້າໝາຍທີ່ວາງໄວ້.
ໃນໄລຍະຜ່ານມາ, ສປປ ລາວ ແລະ ອົງການ IAEA ໄດ້ຮ່ວມລົງນາມຮັບຮອງເອົາ ແລະ ຈັດຕັ້ງປະຕິບັດແຜນງານ CPF ຈໍານວນ 2 ສະບັບ ຄື: ສະບັບທີ 1 ສໍາລັບ 2014-2018 ແລະ ສະບັບທີ 2 ສໍາລັບ 2020-2025. ສ່ວນການລົງນາມສະບັບທີ 3 ສໍາລັບ 2026-2033 ນີ້ ແມ່ນເປັນການສືບຕໍ່ສະໜັບສະໜູນທາງດ້ານເຕັກນິກ-ວິຊາການ ທີ່ຕິດພັນກັບວຽກງານລັງສີ-ນິວເຄລຍ, ລວມເຖິງການພັດທະນາຊັບພະຍາກອນມະນຸດ ແລະ ສ້າງຄວາມອາດສາມາດໃນຂົງເຂດສະເພາະທີ່ກ່ຽວຂ້ອງ ເຊັ່ນ: ຄວາມປອດໄພຈາກລັງສີ, ອຸດສາຫະກຳ, ພະລັງງານ, ກະສິກຳ, ໂພຊະນາການ, ນໍ້າ, ສິ່ງແວດລ້ອມ, ການສຶກສາ ແລະ ວິໄຈ ແລະ ເຊື່ອມໂຍງໃນການບັນລຸເປົ້າໝາຍການພັດທະນາແບບຍືນຍົງ (SDGs), ລວມທັງແຜນພັດທະນາເສດຖະກິດສັງຄົມແຫ່ງຊາດ 5 ປີຄັ້ງທີ 10 (2026-2030).
(ຂ່າວ: ກຕທ)
ຄໍາເຫັນ